AYUB 22 - Allah Wene Fano Wene Hupla Inane

INANE HENAGANEK MENE MATUKWA WENE

^1-2 A'nogo isukwama at Elifas awi Teman mene a'nogo nen ikhi logolik he, ”Nit afuni hokhorogo welago mene ninanggele'ma nen he ap ekhe Allah lebetha mene ekhe werek nogo? Nen, ap inungguloak kagalek mene ogore, we at onggwarek faget nek werego.

³ Nen, haren At Allah endawimo agaiyek anggili'lago mene hilingiti lagen halok he, At Allah nen hela mene ekhe werega? Nen, hat hebe mondok fano nek hilingitu mene welagen halok ogore, andiba ambisangma At hela mene ekhe weregara? Mondok lego.

⁴ Haren Allahba hailo anggaluk hilingiti lagen andiba, At Allah nen wene hoba fili'lagore lego.

⁵ Athe hat haweak hilingiten mene re mondok hokho-pokhorogo were'ma re, hat hobabut inom, hilingiti lagen mene inom, mondok kwanirogo hilingiti lagenma, wene hoba fili'lago.

⁶ Nen, haren hat agailak ekheba hombalegengge werek mene omanogo obali'mo wokhesu elo'lek agunem he, haren at asu mondogat telugunem he at labetu mene ekhe werek lek.

⁷ It afuni inoba lebelekhogo werek menere haren hagai hinagisikhi lagen lek, nen it afuni inamburu nelerogo wagu mene re, sumburu helani iluk yagaisikhi lagen legat.

⁸ Hat hebe halong werek logolik yabu lego meneba hurek logolik he kweang omanogo mondogat telogo helageluk enek hilingiti lagen.

⁹ Haren it hemi sogwe mene leberisikhi lagen lek mene andi faget enek he fuk, athe it yenggerugwi suarek mene ogore haren homameba sebelogo fisikhi lagenat.

¹⁰ A'nogo nek hilingiti lagen andiba re, it hat sen habuogeluk haningisogo kwelakhafunem he, ferekhogo aremnogoat hat hendawimo hailo mene asi weri'lago andi.

¹¹ O mondogat hubagunem he, hat heilenggen ha re elo'lek. Nen hat hebe re i fu hokho mene nen sebelhabi weri'lago.

¹² At Allah andi re Lego Mondok welagarek mene At ebe re pogot inom hesagal inom he a'ma hak werek kwelek At enek he mondok legoma po'lima welagarek.

¹³ A'nogo werek oba nen haren ikhi logolik he, ”At he nena mene elu a?” At ebe anggulok ambol fikhit andoma were'ma re, Aren nit faget ayo wurogo pilingninabu lek hak,” ikhi lagen.

¹⁴ Haren anggikhi logolik he At elokhoma re anggulok hokho mene nen kwe pale'mare, At he we pogot hilingi'luk kweang hilingi'luk tulem huli-hulikwe andoma lak wagengge hilingiterek iluk anggikhi logolik ikhi lagen a?

¹⁵ Hat he it ap kwanirogo hilingitarek mene nen kwe herakfuluk lagaikharek mene a'nogoba laga logolik ikhi lagen a?

¹⁶ Athe inebe wa'lagaikharek oba oan asi wagi'lek werek kwelek weak-weak woginaferek, nen i fu wagu mene nen sebelinabi we'luk woginapluk lagarek.

¹⁷ It ap ariginik mene andi re At Allah Omame Mondok Hokho mene a'nogo ninabiro, iluk kofologo herakfuluk logolik iren ikhi logolik he, ”At Allah nen nit ninoba yi'nogo ti'nogo ekhe hilingninobagau lek hak,” iluk anggikhi logolik hilingiri'lagwi.

¹⁸ Meneat he, At Allah nen it inenggi werek logouwageluk hilingitu kwelegat. Ibi-eberogo nen it ap mondok morue ariginik mene nen eberi'lagwi mene andi re an he futfikhi lagi lek!

¹⁹ It ap kwanirogo hilingiri'lagwi mene andi unggum helugunem he, it fano hilingiri'lagwi mene omanogo re inagaiyek oba endo yaginafi logolik werek.

²⁰ It ap kwanirogo hilingiri'lagwi mene omanogo inanggere mondok wolelenggen tagalogo leget fisugunem he, alinlan endebengge ekhe welaga mene aremnogo re endu nen al sakukhogo ningge.

²¹ Andi halok he Ayub a o, hat hoba hambukhogo logoinogen he, At Tuhan hinom fano-fano a'ni o, Nen, haren a'nogo hilingisigin oba re, ambisangma hokhorogo saburogo helagain werego.

²² At Tuhan nen yagaheri'lago mene andi re furogo helaluk he, mondogat andoma hendawimo foukhogo fisogo logoin o.

²³ Hat hawiloba nen kwanirogo hilingiti lagen mene andoma herakfuluk he, hendawinggen sebel fakhaluk Tuhan ambit waga logoin o.

²⁴ Hat hangge emas eil mondok wurik fano mene andi re hugisano, i ebe yenggelek lek meneba mali'ma pelak fisano o.

²⁵ Pelak fisambik At Omame Mondok Hokho mene andi emas higit hilingisogo fakhigik, Nen perak fano mene hak fetaluk welagik ikhi logoino.

²⁶ A'nogo hilingisigin andiba re haren Allahba tipsek mondok welagik, nen Aren hat hoba fanot hobagagu mondok were'ma helu asigin.

²⁷ Nen, haren samban ugu halok he At esanggo holuk onggo yagaheti logoginat, nen haren wene hinom wasugun mene a'nogo re tiphogo nek aga logogin.

²⁸ Haren hilingiti logogin mene andoma re ambisangma fano nek agunem hikhi logogin, nen hat heluk oba re selegen liathafi logogin.

²⁹ At Allah nen he it afuni wonoget fakhagarek mene re sebelogo fisikherek, oba nen he it afuni sebel fakhagarek mene re inagap telinaferek.

³⁰ Haren weak hilingiti'lek welagik, At anggikherek mene nek higithogo hilingitik, ikhi logogin halok he, At Allah nen elok lebethiikhi logogin o,” iluk yagatikhe.