AYUB 2 - Allah Wene Fano Wene Hupla Inane

At Iblis afuni inendawimo kagalik nikherek mene a'nogo nen Ayub hobuk endawimo kagali wagaikhe wene

¹ A'nogo hilinglagaikhemo, Tuhan nen elalogo fisasikhemo, pogoroba welagaikharek mene omanogo hobuk Allah oba inambotkwe andogotukwama, at Iblis afuni inendawimo kagalik nikherek mene a'nogo inom it andi inanggele'ma kwisikhesik welagaikheat.

² A'nogo were'ma, at Tuhan nen, Iblis afuni inendawimo kagalik nikherek mene a'nogo mel yagatikhe: ”Hat hebe o koma nen wagen?” iluk heinok wokhasikhemo, aren he, ”An he, o kweangma yi awi ti awi neil kogolik ya lagik, ta lagik, nikhi lagarik wagi o,” iluk yagatikhe.

³ A'nogo yagatikhemo, Tuhan nen heinok wokhikhi logolik he, An namingmingengge Ayub he arat futfegen a, lega? ”Afuni o kweangma yi awi ti awi welagaikharek mene inobabut he an namingmingengge Ayub ebe an nebe endawirogo logolik noba lombokhogo werek andi hak he ekhe werek lek, at andi re haren wene ero lek kwelegat weaget fagain iluk an nendawimo kagalhen meneat he aren An kofologo herak nobagagi'lek noba lombokhogo mondok werek a'naga heilenggen hegen a, lega?” iluk yagatikhe.

⁴ A'nogo yagatikhemo, at Iblis afuni inendawimo kagalik nikherek mene a'nogo nen he, ”A'nogo egen meneat he, afuni inonggwarek inagap telagarek andi re mondok esin o. Andi nen he, afuni inebe ineluk logouwogeluk halok he, inangge yi mene ti mene re elok herakfisagarego.

⁵ Halok he, haren at ebe oba yi enggin ti enggin foumo nek he, aren, Allah weak. Ebe an nabit, iluk eberogoat kofologo hobagagin werego,” iluk yagatikhe.

⁶ A'nogo yagatikhemo, Tuhan nen afuni inendawimo kagalik nikherek mene a'nogo mel yagatikhe: ”Fano. Harenat. Hat hendawimo anggegen higithogo hilingi'nogen iluk, hat henggiba figi. A'nogo meneat he, at ebe mondok pinggi watun o,” iluk yagatikhe.

⁷ A'nogo yagatikhemo, at Iblis afuni inendawimo kagalik nikherek mene a'nogo Tuhan elokhoma omanogo nen wulibi lagaikhesik wagaikhe. Wagaikhesik, ap Ayub oba eiso'ma nen pikhit ungguloak huli oumo weak mene mondok lambukhogo fesikhe.

⁸ A'nogo fesikhemo re, at Ayub ebe yi mene ti mene hugisa lagaikharek oba wea'ma omanogo hurek logolik, piring serelek meneba ebene kibilhi logolik welagaikhe.

⁹ A'nogo kibilhu were'ma, at agwe nen he, mel yagatikhe: ”Hat he, Allah oba lombokhogo mondok logogiluk hilingiti lagen a? Elo'lego. Haren he, Allah weak. Ebe nabit, iluk kofologo herakfisaluk he, hebe wa'lakhan o,” iluk yagatikhe.

¹⁰ A'nogo yagatikhemo, at Ayub en he, ”Allah nen he, fano mene wo'nisugunem helikhi logolik, weak mene wo'nisugu halok herakfisogoin nogo? Hat he, hemi inendawinggen lek mene nen agarek hangge egen o,” iluk yagatikhe. A'nogo yagatikhesik, at Ayub oba a'nogo agaikhe andi nen, ”An Allah nabit,” iluk ambe ba nen weak mene ekhe wulabi waga lagaikhe mondok lek.

Ayub agaila'lak oba wagaukwa wene

¹¹ At Ayub weak a'nogo oba agaikhe andi nen, agaila'lak inebe henagan, Elifas aiba Teman mene andi inom, Bildad aiba Suah mene andi inom, Zofar aiba Naamah mene andi inom, inesanggo holhukwasik he, inailokwe lombogen andogotukwasik, iren he, ”Nit at Ayub endawimo fanorogo ninom le agu logouwogen oba louwok,” iluk isukwasik he, wagaukwa.

¹² A'nogo wagaukwasik, inebe yatma nen Ayub ebe ineilenggen yetha wagaukwasik he, ebe sa heat futfou lek hangge were'ma hasukwasik, le inane hokhorogo aga logolik he, inebe lombok inasu laberek mene libik-labakhogo lakfisasukwasik, wul inunggul oba pialhik, hesangge pogoroba higit liafik, hilingitukwa.

¹³ A'nogo hilingitukwasik, at Ayub ebene oumo mondok hokhorogo hilingigen he, ”Ninane yagasugun elo'lek higi,” iluk, at era'lu kweangma hurek inenggi hup hundik lingge hundik 7 hari inane mondok igi'legat welagaukwa.