AYUB 19 - Allah Wene Fano Wene Hupla Inane

Ayub en at agaila'lak wene onggo yagaisasikhe wene

^1-2 At Bildad en wene a'nogo yagatikhe meneat he, Ayub en he, ”Hit hinenggi miren oba nen an nendawimo weagetnafik, hinaneba weaga'nafik, ugu mondok logogun nogo?

³ Hiren hundik-handik an wena'neti lagep mene nenggi wenagaisogo 10 ba asi laga andi, hit hinenggali legat an weaget nabuogoluk ugu mondok welagep andiri!

⁴ An eberogoat weak hilingitimo wene noba asigin halok, andi re an noba lombogaro.

⁵ Hit hinendawimo nen he, Nirenek he fano at he weak, iluk anggigik, egepsik ikhi lageba? At weak hilingiteba aweak onggo helili'logo, iluk anggigik, ikhi lagep.

⁶ A'nogo anggikhi lagep halok he, wene yi futfeni. At Allah nenat yi enggin ti enggin noba fikhesik, heina su elema kwalharek andi hak, At elonggoma nobagaikhemo welagi o.

⁷ An weak noba ari'lago andi nenahalok, iluk nane hokhorogo kwe igirek meneat he, afuni ekhe nen nane futnobagau re elo'lek. Wene higithogo pilingisogo leget fagarek mene andi faget nane kweti lagi meneat he, afuni ekhe nen nane inesanggo holi'lagwi lego.

⁸ Allah nen an nanggwe palnobagaikhemo re, an nen soganogo lare elo'lek nen an anggwe andi re mondok mum hilingisogo fikhe,

⁹ Allah nen, an nangge yi mene ti mene mondogat telogo heligik, nenu fano lagarek mene weak hilingisogo nobagagik, ikhemo.

¹⁰ Aren he, kwe fena nen noatik, fena nen noatik, mondok noatemo re elo'lek welagi. Afuni nen yi mene ti mene awi yago mene omanggen inom mondok feisalogo lakfisaluk, herakfisugunem wela'luk, sawet agarek andi hak an nendawimo nen fano asigin iluk anggikhi lagi mene mondok leget fisikhemo welagi.

¹¹ An nebe Allah aselei mene higit hilingisogo nobagaikhesik, a'mage endu amulok hangge noba fugu kwelek welagi.

¹² At agoromi tentara esa logalogo re an nawi su mene wuri'mo a'nogo pin kwagama re, an nebe heise poloksek wulibu mondok elo'lek agama noasi kuogoluk hilingiri'lagwi.

¹³ An nogogwi nagoromi nen nagaseratik, afuni an ninom hundik welago mene nen kofologo heraknobagaik agama o.

¹⁴ afuni nendawinggen hundik mene inom, namilak nagaisalak inom, arat kofologo hera'nobagaluk tekhogo wulifik, nagaila'lak mene nen an noba inonggoret nobagagik,

¹⁵ it helime an namingmingengge mene omanogo nen ogore, an inoe a'nogo inonggot a'luk he ap amu mene hakhogo hilingnobagali'lagwi.

¹⁶ Nen, an namingmingengge mene ekhe wolhugunem he, nane oba wusu elo'legat. nane liokhogo yagaisugunem ogore, iren an lebetneouwogeluk wesu elo'legaro.

¹⁷ Nen, an nagwe nen namben sanghaluk he, hebak unggulat pali'lago. Nen, an nori ninagaisa misigen tago mene nen ogo rean noba horokhogo wesu mondok inabirat.

¹⁸ An kwe lagunem yenggerugwi nen inendawimo seramet nobagaluk inane asegen waganogo hilingnabi'lagwiat. An nebe menlagunem he, endoat ya'nabi'lagwi.

¹⁹ An nagaila'lak ninom kwe kilik nikhi lago mene nen ineilenggen yetnealuk he, inapsiri nen nagaiserari'lagwi. An nen it inebe nendawinggen hundik welagirek meneat he, heraknobagaluk kwanirogo lili'lagwi andi.

²⁰ An nagap inom neino inom noak oba to'mo ikhesik, selei mene nen inoasuogoluk ugunem fololekkwe wulifarek andi hak, nebe wa'la'le mene endep neiloak keik welagi o.

²¹ Nagaila'lak. Allah nen noatemo welagi andi nen he, hinendawit nabini o.

²² Allah nen mu'narek nikho andi hak, hiren ogore, a'nogoat hilingnafi lagep andi nenahalok? An yi enggin ti enggin noba fugu welagep andi re hinendawimo seramen a?

²³ Wene an nen yagahisikhi lagi mene andi, eberek logobagaigiluk ap ekhe nen buku ba lisu palogo feilep agwi.

²⁴ Athe. Mondok-mondok logouwagaluk, posiemanggen meneba helep oak wurogo lisu palfeilepma femhogo logoilep agwi.

²⁵ Oba nen he an telnabigin mene o pogoroba eluk werek mene andi re an nelu o. Hobuk wurep oba an lebe'neagaluk menlasigin werego.

²⁶ An nagap arat weaget nobagagin meneat he, hobuk wurep oba nareagun selokhogo Allah elokhoma lamo eilenggen hagain werego.

²⁷ It ekhe nen hambik yaganesugun lek. Meneat he, we, an nonggwarek neilenggen tomok hagain o. Nen an ninom he At andi re enggawe mondok fano mene o.

²⁸ Hiren he, Niren ninggi'nogo wene halogo oba fogoin he, iluk egep andi nen an nendawinggen mondok weak aga o. Hiren wene pilingisugun iluk wene ero herati lagep andi.

²⁹ A'nogo meneat he, At Allah a'makwe het-pet uluk, afuni weak hilingitarek mene wene inoba fikherek andi nen he, karok oba inoaterek andi hinailorogo logoni o. Allah nen afuni wene inoba figik, kotik, ikherek andi futfikhi logoni o,” iluk yagaisasikhe.