AYUB 17 - Allah Wene Fano Wene Hupla Inane

¹ Nebe legasigin oba mondogat horok agunem, set lebek u hak hilingnabi'lago, we an nobaget he afuni warek salinabuba omanogo nek werek.

² Afuni nen he an a'nogo inali'norogo hilingnobagaluk he, iren an amurogo puliap nafunem isikhi lagi.

³ Allah neisena, an nebe re higithogo nek hilingitu nagun hilingi'mo re, an nen ikhi lagi mene andoma re eberogo ili'lago anggan o! An nane ikhi lagi mene andoma legeisogo nobagau mene ap ekhe sa werek?

⁴ We Haren it inendawinggen mondok abirengge mene hilingfisegenma re, iren yogondak an sebelogo nobagai nogo.

⁵ Suetninung ekhe ikhi logolik he, ap ekhe an ambisangma helagain anggaluk agailak inom yei liafu halok he, at hilingisigin onggore ambisangma againafuri inoba agunem hogoinat.

⁶ Yogondak he wene tindel a'nogo meneba an litnorogo hilingnobagakhi logolik he iren an nelokhoma wesi suphogoin iluk weri'lagwi andi.

⁷ Fong weakhogo warikhi lagimo re neilenggen mondok mum ari'lago, nen nebe mondogat pukhogore mage agarik welagi.

⁸ A'nogo were'ma nealuk he nit fano hilingiti lago iluk anggili'lagwi mene omanogo nen he youk mondok laluk, inebe mondogaren an he Tuhan nonggot mene hakhogo wene noba fili'lagwi.

⁹ Ap higithogo hilingitarek mene inom, nen ap weak hilingitarek lek mene inom, nit At Allah endawimo agaiyek anggikherek higithogo welago iluk, it inebe werek mene faget ekhe inom omamet fakhikhi logouwak.

¹⁰ Oba nen he hit hinebe abirengge oma an were'ma wesugun mene ogore, misik ekhe endawinggen wenggelek mene logolik, ikherek mene hakhogo were'ma ekhe hisagain lek.

¹¹ Linggene an welagi mene aremnogo re mondogat legasi lagama re, an nen hilingisigin iluk mene aremnogo legat agik, wene abok werek mene omanogo re mondogat sugi agik ikhe andi.

¹² Oba nen he an narugwi lagaila'lagen yaganeti logolik he, ”O mum andi re, selek asi wesigin mene horogasi waga. Iluk ili'lagwi mene andi werek kwelek oba nen he, an nebe o mumse'ma hangge welagi mene andi re an nonggwarek nelu o.

¹³ We afuni wa'laluk lagaikharek oba andoma nek eberek mondok welagimo re, we o mum se'ma andoma laluk nogokhi logogin.

¹⁴ An nebe salnobagagun oba andi enu re, Neisena salhik, nen imbalo an nebe senggelnabugun mene andi enu re, Nagaisa inom nerei inom salinafik igin.

¹⁵ Andi nen he an neluk mondok logogin oba re koma werek? Nagaiyek ikhi logogin oba andi ap sa nen ekhe hikhe mene werek?

¹⁶ An nendawimo nen he nit ninebe wa'lasimbik ap wa'la'luk pi lagaikharek oba andoma ninomat pi lambik mene ogore wenggelogo lagu mene andi ekhe logogin lek anggikhi lagi, iluk,” isikhe.