AYUB 16 - Allah Wene Fano Wene Hupla Inane

Ayub en onggo isikhe wene

^1-2 Aren a'nogo isikheba nen he at Ayub en onggo ikhi logolik he, ”Ekhe sambul aben a'nogo anggikhi lago mene iluk ugunem an nesanggo holhi lagi. Nen haren an nendawimo ago warogo iluk yaganeti lagen mene omare nebe noasigiluk hakhogo ikhi lagen.

³ Ki sambul hineranen wene nek yaganeti lagep mene andi pal fogoin nogo? Nenamene nen hinendawinggen nunggu nen onggo yaganetu mondok welagep?

⁴ We hit hinebe ari an logoilema, nen an he hit logoumo nen he, an nen ogo hiren ikhi lagep andem hakhogo ikhi logoile aro. An nunggul kwanit hikhi logolik, wene ane uan horok fanorogo nek yagaheti logoile aro.

⁵ Nawene komo mene yi'nogo ino, ti'nogo ino, iluk yagahisuguba re hit hinendawimo hambuget hinobagagik, hinendawimo konogo hilinghinobagagik, hilingiti logoile aro.

⁶ An nane nek ikhi lagi mene ogore an noba ou a'nogo lek ari'lago lek, nen an nane legengge logogin halok ogore, an noba mene ekhe legasigin legaro.

⁷ We At Allah nen enek an neisok erokwe mene mondogat legaphogo fisikhe andiba re, an noba weak-peakhogo hilingnobagaikhemo nebe lebelekhogo welagi andi.

⁸ Aren enek an noba wene fikhesik sennobagaikhemo re, yogondak nebe mondok iring-baring agarik welagi yi. A'nogo were'ma it afuni hokhorogo nen anggikhi logolik he, at aweak hilingiti laga mene a'nogo re andiba enek ari'lago ari iluk anggili'lagwi andi.

⁹ Allah aniniba an nagap mondok pil-palhogo nobagaikhe. Nen, At a'mageba an eil kwelakniugu werek.

¹⁰ Afuni nen he inambe langet fuluk an li'norogo hilingnobagali'lagwi, an nebe afuni nen haningisogo kwelaknobagaluk he nelokhenggen taphogo noari'lagwi.

¹¹ An a'nogo At Allah nen he it ap inobabut mondok weak mene inenggiba nobagaikhe, nen it ap inendawirinafi'lek inoaterek mene inenggimo kofologo heraknobagaikhe.

¹² O attak an nebe mondok fani-fanorogo logolik nailo legengge welagagi, oba nen he ferekhogo At Allah nen noasi waga. An nalonggop hol magaisogo wo'nafesik huk niikhemo re, aben inenggi waleti logolik misi'mo ekhe tukhirogo watarek andi hak, Aren an a'nogo hilingnafungge hilingisogo nobagaikhe.

¹³ Endawi mondok niigi'legengge, At andogen selele purogo natunem he omanogo, nalabutmo werek engge pulelogo ilang-bulang ikhe.

¹⁴ Aren he ap weim inanini mene inoba hilingfisagarek hakhogo an noati logolik he, hundik-handik nagap pal nobagagu werek.

¹⁵ An nalong legaphogo nobagaikhemo re, nendawimo heiselhu nen pelagi figirik fong warugu logolik he, su pukhogo wul oba hurek welagi.

¹⁶ A'nogo logolik le yakhugunemen enek he neil ero mondok firogo heiselogo taik ikhesik he, nelokhe mep mondok sagalhe.

¹⁷ Oba nen he an nen nobabut kwanirogo ekhe hilingiti lek, andiba re Tuhan oba samban igi mene andi re nendawi fanoba igiri'mo re obabut enek ari'lago.

¹⁸ Hat kweang yi, an noba wiik-weakhogo hilinglari'lago mene andoma re hinasu fuk, nen an nen wene katukhogo piling nesugun iluk kinoti lagi mene andi re sebelogo fuluk logou fuk.

¹⁹ An nili wo'naferek mene At ebe pogoroba werek andi re an nelurek. An weak hilingiti lek mene faget andi re Aren enek fakhogo igin.

²⁰ An nagaila'lagen noba weagerogo puliap nobagakhi logolik endo ya'nafunem he, le yakhikhi logolik At Allah nen lebetneoageluk oba yagati lagi.

²¹ Ap ekhe we it inagaila'lak eberogo mene nen inendawi fanoba inebikhit agaikharesik telinafarek hak he, we At Allah amu nen enek At onggwarek elokhoma nenat nebikhit a'luk nili wo'nabuak agwi!

²² Tahun an nebe neluk logogin oba re hokhorogo werek legenggere, we eil misik taba an nebe mondogat lambik he hobuk nambotkwe wesigin lek.