AYUB 15 - Allah Wene Fano Wene Hupla Inane

PIRENEK ENGGE INANE MATUKWA WENE A'NOGO 15:1–21:34 Elifas nen isikhe wene

^1-3 At Ayub en a'nogo iluk isikhemo, at Elifas nen onggo yagati logolik he mel isikhe, ”Ayub, haren he hobakhe hele homati lagen. Haren hane egen mene andoma re wene ebe ti mene faget iluk furek legengge egen. Ap hebelek inaben he haren onggo ikhi lagen arem hakhogo ili'lagwi fuk, wene ebe ero halek legengge nen he, inaneba inonggwaregen inili helagarek lek.

⁴ Nen haren egen mene andoma hologo hilingisumo nen he, ap misigen iluk ogo ekhe Allah ba ailo welagi'lek, samban igi'lek logou hago.

⁵ Hat honggwarek hane ikhi lagen mene andomaba re, haweak hilingiten mene a'nogo enek ari'lago andi, oba nen he, hat hane pugun ikhi lagen andiba re honggwarek haweak omanogo sebelogo fakhikhi lagen.

⁶ Hat honggwarek hane ambisangma wene hoba fakhikhi lagenma re Hat weak hilingiten iluk andi re an nen yagahesigin lek.

⁷ Haren anggikhi logolik he afuni oan taginafi'le'ma fem attak-attak he an ta'nafa anggikhi logolik ikhi lagen a? Athe o attak tom waletunem andem he hat hebe werek kwelek walerik lagaikhe a?

⁸ At Allah hilingisigin iluk wenggelhu kwelek andem he hat hesanggo holhi lagen a? Afuni inoba inendawinggen kagalek mene werek mene andi re we hat hoba nek werek nogo a?

⁹ Yi mene ti mene we hat helurek mene andem he nirogo ninelu nek, yi wene ti wene haren futfikhi legen mene andoma re nit ninoba ogore weinamhogo nek werek.

¹⁰ Nit ninendawi kagauksek mene andi re ap mondok yaman agaikhasik inesi helel wulifa mene nen ninoba faga o, it ap andoma re hat heisena oan ta'lagi'lek werek kwelek it tak welagaukwa inap.

¹¹ Niren he At Allah enuba ninendawi sakhorek logolik fanorogo yagaheti lago, oba nen he At Allah nen hendawimo konogo yagaheri'lago mene andoma wanu mene re nenahalok habit sek welagen?

¹² Oba nen he hat hobaharo agendik helokheet heilet mondok sagalogo taik egendik,

¹³ haren Allah ba hobaharo fikhi logolik ane sagalogo hilingiti lagen omari?

¹⁴ Afuni andi re weak hilingiti'legengge ekhe werek anggegen? Weak hilingitarek enek. Ap ariginik mene andi Allah elokhoma fanot fisa hak nogo a?

¹⁵ It malaikat mene oba nen ogore, At Allah elokhoma higithogo nek werek le'ma re, it inoba eberogo tipsek enek logou lek hak.

¹⁶ Nen, nit afuni weak mondok nonghonghogo, hilingiti lago mene yi, weak andi mondok i hak hilingik logolik hundik-handik hilingiti lagoma re ebenagaik fanoaphogo ninobagau re mondok elo'lek.

¹⁷ Ayub an nen wene ekhe yagahesigin mene yi hesanggo fanorogo holin.

¹⁸ Endam andoma yaganetukwa mene ekhe yagahesigiluk welagi. Wene ebere inendawinggen kagalek awene it inombawi nen yagaisasukwa mene re iren wanhukwasik, it inagainafuri tagomangge meneba higit-hagathogo fesukwa wene yagahesigin.

¹⁹ Andem oba re it inaiba andoma ap pok mene ekhe welagaukwa lek, nen ap ekhe nen weagerinabigin iluk Allah elokhoma nen woginarek wulifi lagaukwa mene ekhe welagaukwa legat.

²⁰ It ap kwanirogo hilingitarek mene nen inagaila'lak sebelinarek logolik enggin-fenggin inoba fugu werek mene andoma re, inendawimo yegelik eti logolik enek logogun.

²¹ Weak mene ane inesanggolema houwakhogo kwili'lagunem he, fano welago heaba were'ma nen he it ap hinatarek mene omanogo ferekhogo inoba kwi waga logogun o.

²² It he selek mene a'nogo inoba werek le'ma re, inebe inoasigiluk enggarok fanghogo were'ma re,

²³ sue nazar warek fili ninggerek mene ningginik sambul wa'lasugun iluk nenangot hikhi logolik he, iren waregengge omanogo yin-hunhogo ninggi logogun.

²⁴ Enggin mene andi re raja mondok along mene hakhogo, inoasi kwigin iluk fik-fouksek logolik werek.

²⁵ A'nogo nek it afuni Allah ane oak sagalogo fuluk hilingiri'lagwi mene inom, it afuni inailo legengge At Omame Mondok Hokho mene a'nogo ane holhik legengge hilingitarek mene inom, andoma re ambisangma a'nogo nek hogoin werego.

^26-27 At a'nogo re awonok oba Allah inom walhogoin iluk kwi laluk he, aren andok peiengge perisai a'nogo legeisogo re iget figi'lek tolulurogo kwi lagarek.

²⁸ At ebere o kota mondok meisak langgukhogo hilingik kwe omanogo, o afuni inebe lekwe foluk kwe omanogo logolik hilingiri'lago agun. O kota andoma re hobuk afuni nen pin kwikhi logolik meisalogo herak fogoin, iluk abok palogo fesikhemo werek awi omanogo.

²⁹ Ap andi angge yi mene ti mene mondogat tukhogo werek mene omanogo re komakwe laga heat ferekhogo legasigin, at angge werek mene andoma re mondogat lek asumo re ekhe inom logogin lek.

³⁰ O mum meneba nen he at waganogo lagain lek, endu nen he asimit wulibigin mene omanogo nolinabigin. At ebere Allah eleage nen warogo lakfisagain.

³¹ Aren we elama meneba endawinggen tibet fuluk logogin halok he, at ebe onggwaregen lalogo fakhagain andi, nen aren onggo ambisangma helagain mene ogore at oba agu mene ekhe logogin lek.

³² E engga sawet agu mene hobuk engga mulithikherek lek andi hak, at ebe wa'lasuba oan werek kwelek ebe wa'lasigin.

³³ At ebere e anggur enggen taganogo pigik, e zaitun owil lologo pigik, ikherek andi hak werek.

³⁴ Afuni kwanirogo hilingitarek mene halok he iren tagomangge mene ekhe logogun lek, nen afuni inenggi a'makwe nen helaluk inawi wutarek mene andi re endu nen altamukhogo nagain.

³⁵ It he weak mene nek inelokhomarogo hilingitu logolik he, weak mene andi inalabutmo su kwalogo werek. Nen inendawinggenma re weak mene andi nek peterek logolik werek,” iluk isikhe.