AYUB 14 - Allah Wene Fano Wene Hupla Inane

¹ At Ayub en he, Allah mel yagatikhe: ”Afuni inebe inagaisawi inalabutmo nen ta'la'luk he, inebe ineluk horogat logolik, enggin-fenggin hokhorogoat hugu welagaikharek.

² A'nogo logolik, engga sabelheresigen weak-weagat sawet a'luk, lologo pikherek andi hak welagik, nen, inafumak weinam a'lugen lek agarek hak hilingitarek andi.

³ Allah neisena, Hat heilenggen an noba lourek mondok logolik meneat he, Haren an nebe wo'narek wene inoba figik, kotik, igin oba andoma wesuagaluk yaganesumo higira?

⁴ Afuni weak hilingitarek mene nen fano katokhogo ekhe hilingitarek nogo? Mondok elo'lego.

⁵ Afuni inebe lombok umur inenggi yi huli logogun, iluk andi re Haren wenagaisogo fesiginmo werek, tugi huli taba foleligin iluk andi re tukhumhogo fesiginat, ap misigen iluk ogo huli warek mene andi taganhogo ineluk ekhe inom logogun mondok lego.

⁶ Halok he, at set waroageluk elelhi'lek herakfisano o, a'nogo herakfisamo, at ebe eluk oba, angge yi mene ti mene ninggi logolik eabu a'nogo mondogat elugun warogo hilingisuak.

⁷ E halok he, ebe mukfugunem andimiba nen asimit fuleluk enggi talherek.

⁸ Omanggen kweang elema nen pugagik, andimi puga'luk he, fili agik, ikherek

⁹ oba nen he, omanggen i min meneba lagaresik, hobuk asimit fulelogo engga weinam agarek.

¹⁰ A'nogo meneat he, afuni inebe wa'lagunem he, mondok-mondok lek agaikharesik he, koma lagaikha heat longgogarek andi.

¹¹ I mogo yenggelek mene firok-firok legagarek andi hak, firitogigik, nen, i elesi agai lagarek mene firok-firok mondok legagarek andi hak legagik, ikherek andi higit he,

¹² afuni inebe wa'lagaikharek he andi higit aro. Andi nen he, wa'lasimbigen hobuk ineluk asugun lego. Pogot lek agi'lek werek kwelek, menlasugun legaro. Nogo ugu were'ma hobuk inelugerinabugun legaro.

¹³ An nebe afuni wa'la'luk lagaikhare'ma andoma hinakfanino o. Hat ha'mage lek agi'lek werek kwelek, hawe a'ma hinakfanino o. A'nogo meneat he, hobuk an noba ebesigin oba huli warogo fembik wene wa'ne'no o.

¹⁴ A'nogo meneat he, nit afuni re, wa'laluk hobuk ninambotkwe ineluk agaikharek nogo? Hobuk ineluk asugun logoumo re, an yoma noba weak welagi yi hobuk fanotnabigin iluk hundik-handik kagalek mondok logoile.

¹⁵ A'nogo logolik, haren wolniugunem, an nen nane fakhele aro. Harenat nebe elalnafigindi'mo re, hobuk hendawit nabigin aro.

¹⁶ A'nogo hendawit nabimbik, an nen yi'nogo ti'nogo hilingirik lagu kwelek se'narek mondok logogin meneat he, an weak hilingiti mene andi heil wo'nafu mondok logogin lek anggikhi lagi o.

¹⁷ Haren an weak hilingiti mene sagalogo legetfisambik, su unggum warogo fagarek andi hak, endamat weak hilingitigi mene andi sebelogo feino o, neisena.

¹⁸ Hobuk tom ekhema-ekhema mondogat sinuk-sanakhogo lobaget fisigik, nen tom hokho helep isa meneba himbirik mene ogo werek oba andoma nen higilogo lakfigik igin werego.

¹⁹ Nen i fu hokho mene aninirogo laga logolik, helep i esanggokwe werek mene hinim warik lagik, nen meiso sogenggen mene ninggi logolik, kweang i nen waluk lagik, ikherek andi hak, afuni nen he, Hobuk yi'nogo hilinglasigin, iluk inendawimo hairogo eberek welagaikharek mene andi haren legetfisagain werego.

²⁰ Haren inebe mondok-mondok mabenet fisaluk, inelokhe munenogo inebe lani iluk lakfisegendek.

²¹ Lakfisugunem werek kwelek, it inagainafuri omanogo re wene ero mel inonggot kwelek, it inebe kaindek logouwagaluk menfisigik egendek, Nen it inoba inabok palogo weaget fisugunem he, it ekhe nen iluk ogo yagaisagarek mondok lek.

²² A'nogo logolik he, inonggwarek inoba yi enggin ti enggin higik, inoba weakhogo logolik inendawimo warugu welagik, agarek andi,” iluk yagatikhe.