AYUB 13 - Allah Wene Fano Wene Hupla Inane

¹ Mondogat andoma re an nonggwarek neil hasigisik, nesanggo mel holhigi mene o, nen ebe yi'nogo iluk andi re mondok futfesigi.

² Hit hinelu welagep mene andoma an ogo neluregat, nen hiren anggikhi logolik nit enek ninelure'ma athe onggot werek he angga fuk.

³ Oba nen he, an nen At Mondok Omame Hokho mene a'nogoba nane ikhi lagi. An he At eilhanem andem an nawene hilingik mene andi nalong palagain iluk hilingiti lagi.

⁴ Hit he hinebe kemburek welagep mene a'nogo re hineranen weneba ikhi logolik hinati lagepma re, ap heinogengge ineranen wene agarek mene a'nogo inom he agamsek welagep lek.

⁵ Nen, hiren hinane a'nogo ikhi logou le'ma re, hit hinebe re ap hebelek mene angga hak.

⁶ Arigini'mo re hiren ikhi lagep mene andi faget an nen igin mene yi hinesanggo holini, nen an nonggwarek faget nili helagain mene yi futfeni.

⁷ Allah obaget ikhi lago iluk hiren lalogo u haga? At obaget iluk hiren hineranen wene u hak nogo?

⁸ Hiren At Allah ebikhit a'luk, At along palhi logolik hiren melalu hak nogo?

⁹ At Allah nen hit hinebeba kwelakhisamo nen he, hit hinebe fanore'ma hisa haga? Afuni lalinafarek hakhogo hiren Allah lalumo higira?

¹⁰ Hiren we linglong Allah ebikhit asumo nen he, At Allah nen hit hinoba unggum mondok weakhogo fou hak.

¹¹ At Allah mondok along werek mene andi nen he hinebeba hinailot hinobagali'lago lega? Aren fulu polan aple hilingiri'lago mene andoma re hinendawimo hinamel-mel eri'lago lega?

¹² Hiren komo wene ikhi lagep mene andoma re wul age mondok weak mene omanogo hangge hilingik, nen hiren hinonggwarek hinili helikhi lagep mene andoma re kweang tangge mene hilingik engge misigam halokhogo lagarek hakhogo hilingik.

¹³ Andi halok he an nane igin mene andi ambisangma ninggi'nogo asigin andi hilingik kwelek he, an nane igin enggere hinane legengge logoni.

¹⁴ An he nebe mondogat wa'lasigin anggigirik hilingiti lagi andi.

¹⁵ An nen nendawinggen mondok warikhi logolik he, a'nogo hilingisigin anggigirik hilingiti lagi. Nen, At Allah nen an pinggi noasigin anggili'lago halok ogore noasuageluk herakfagain, oba nen he an nobabut hilingiti lagi mene faget he, At elokhoma andoma nen ogo nalong palagain.

¹⁶ Ap kwanirogo hilingitarek mene re inambong serogo Allah elokhoma menlasila elo'lek oba nen he, an nambong se andi nen an nagap telagain logou hak.

¹⁷ Yogondak he an nane ikhi lagi mene yi fani-fanorogo holino, nen an nen enekhogo iluk yagahisagain mene andi re futfeino.

¹⁸ An nawene andi igiluk logolik mondok fik-foukhogo welagimo re, hat weakhogo hilingiten iluk yaganesu lek hak iluk nendawimo anggikhi lagi!

¹⁹ Tuhan neisena, hat weak hilingiten iluk wene noba fei wagunem andi re, an nane legengge alokhogo logolik ki sambul wa'lasigin iluk nenangot hikhi logogin.

²⁰ Oba nen he an Hat helokhoma nambong serogo menlasi wesigin nen he, Wene ero pire mene kino yagaheti lagi mene ya holnabin:

²¹ An noba enggin-fenggin fugu mondok welagen mene andi re, Haren elalinhogo hilingiti lagen mene andomaba an noba fei wesu fuk!

²² Hane yaganesumo re an nen ogo onggo yagahesigin, athe, an nane umo re Haren ogo onggo yagane'no!

²³ An nen naweak hilingiti mene inom, kwanirogo hilingiti mene inom he, miren hakhogo hilingik? An nen Hat hane taganhogo ekhe hilingiti halok he, Haren weak hilingiten mene ekhe yi-yi iluk yaganesigin halok fano!

²⁴ Hat he nenahalok an nagaiserogo hale'ma higi logo laga lagen? Haren an ninom weim palek mene hakhogo hilingnafi lagen andi re ero kiba nogo?

²⁵ An he sogoi funha wagunem engga lologo pikherek andi hak oba nen he, Haren noak leiget fikhi lagen omari! An he engga sawet a'luk pugagarek hak werek kwelek oba nen he nenahalok Haren an si'narek-mu'narek nikhi lagen omari!

²⁶ An nebe souge logolik weak hilingiti lagagi mene omanogo faget Haren onggo noba fegen. An nebe neluk welagi mene yi nambisangma asi loageluk he nendawimo mondok heiselek mene foukhogo fegen.

²⁷ Neisok he, posiemanggen meneba Haren homagaisogo nobagegen, an nobabut hilingiti lagi mene ogore Haren mondogat heil kwelaknarek welagen. Neisok endangge sebelhuba ogore, Hat heil oba nen waganogo lili'lago lek.

²⁸ Andiba re an a'nogo e mondok fili agarek mene hakhogo mondogat fubut agi, su kain mumlel en palhunem hakhogo an a'nogo hilinglagarik welagi.