AYUB 12 - Allah Wene Fano Wene Hupla Inane

At Ayub en onggo isikhe wene

^1-2 A'nogo isikhemo re, at Ayub en onggo ikhi logolik he, ”Eberogo afuni nen agarek mene re hiren ikhi lagep ari, oba nen he, hit hinebe wa'lasugun halok he, fanorogo wenggelhi lagep mene andi ogo hinomat wa'lasugun o.

³ An ogore, ap nendawinggen werek nagun hilingi'mo re, hiren mondogat egep mene andoma re an ogo mondogat futfigiat. Nen, andem he sa onggoren iluk ikhi lagep? We, ninelu nek. Ariginikmo re, hiren anggikhi logolik, athe maben hak, nen nit he lego welago u lek hak!

⁴ Attak he Allah nen lebetnabuageluk an nen kino yagatunem, At Allah nen nane esanggo holhi lagaikhe. Nen an he, ap eberogo nek hilingiti logolik, kwanirek mene ekhe hilingiti lagi lek, oba nen he, yogondak it nagaila'lagen inom nen ninom enggawe fano mene nen inom endo ya'nabi'lagwi andi.

⁵ Hit he, hinebe mondok fanorogo logolik he, ap alomat lagu mene a'nogo weagerogo fisikhi lagep, nen ap inebe warogo lahak mene a'nogo inoba re hiren ekhe inom lambisogengge warogo fisikhi lagep.

⁶ Oba nen he, ap hinatarek mene andi re, afuni nen ogo inanggomo pali'lagwi lek, it afuni Allah oba inailo legengge ane oak sagalharek mene omanogo nen it mene inanggembuba inendawinggen tibet fuluk logolik inonggwarek inomameba werek oba nen ogore, inebe mandok fanogo werek.

⁷ Hiren sue, paik, yi mene ti mene oba heinok wanumo mene ogore, iren wene ebe ti'nogo iluk yagahisogoin werego.

⁸ Eluk-elugengge kweangma yoma werek mene inom ima werek mene inom oba heinok wanumo mene ogore, iren wene ebe yi'nogo iluk yagahisogoin weregat.

⁹ It inebe mondogat andoma inanggele'ma nen he, Allah nit ninebe elalninafikhe mene iluk anggagarek enek.

¹⁰ Aren enek yi mene ti mene ineluk werek mene andoma faget halogo fisikherek, afuni inebe nineluk welago mene andi re, at omame a'ma nek welagorek.

¹¹ Nunggungge nunggunem inamehinggen oba enduk mit ikherek hakhogo, inane ugu mene an nesanggo holhunem ogo a'nogoat holhi lagi.

¹² Aben ikhi logolik he, inendawinggen kagalek mene inom, fanorogo ebetarek mene inom andi re ap inebe umur uanhogo hilingik mene inoba werek iluk agarek lek nogo?

¹³ Oba nen he inendawinggen wenggelek mene inom, inomame agarek mene inom andi re we Allah oba nek welagarek. Fanorogo wenggelhalugen hilingitarek mene inom, furogo ebethalugen hilingitarek mene inom andi re At oba nek werek.

¹⁴ Aren meisalisugunem he, obali'mo wusu re elo'lek, nen Aren afuni hele warogo fisugu mene andi re lologo wulakfisa re elo'legat.

¹⁵ Aren i helage palogo yagat fugunem he, mondok firitokhogo iring lagarek, Aren i a'nogo loageluk hut fugunem he, i fu wagarek!

¹⁶ At Allah andi re, mondok omame logolik along-palonghogo werek! It ineranhogo wene lalinafarek mene inom it lalogo fisagarek mene inom mondogat he At omame a'ma nek werek.

¹⁷ Aren he, ap inoname werek mene inom, pemerintah ba yabu inungguloak kagalogo hilingitarek mene omanogo inom henogo wanhik, nen it inogogwi melalinafarek mene omanogo afuni nen endo yaginafarek mene hilingfisigik ikherek.

¹⁸ Aren he it a'nogo ineabu sebel fisigik, it inebe hele warinafik ikherek,

¹⁹ it imam inom, it ap inogogwi kaindek-kaindek omanogo inom, sebelfisigik ikheregat.

²⁰ Ap inane mondok senggerogo nek agarek mene omanogo inambe to'mot fisigik, it ap yaman mene nen hebelogo wenggelharek mene omanogo henogo wanhik ikherek.

²¹ Ap inogogwi kaindek-kaindek omanogo Aren inenggaliet fisigik, it inebe inalong logolik inomamerogo melalinafarek mene a'nogo lisogo wanhik ikherek.

²² Aren he, obalik mondok hikhaksekwe omanogo selegetfigik, mumeak mene nen sebelekwe omanogo ombak-pageratik ikherek.

²³ It afuni inunggulenu lombok werek mene omanogo re Aren inebe hokhorogo sagat fisigik, inangge yi mene ti mene kabokhogo nek wogisigik, hilingfisalugen he, Aren it inebe mondok wolelenggen tagalogo leget fisikherek.

²⁴ It ap inogogwi melalinafu mene omanogo re inendawinggen nong-honget fisugunem he, iren o koma laga-lago iluk mel halek-legengge hesangge leil warik nikharek.

²⁵ O mumse'ma omanogo re, iren yafak-tafagenggerik laga logolik he, ap i sini'nuk palharek mene naluk hilingitarek omanogo hakhogo talo-talonggerik lagaikharek.