AYUB 11 - Allah Wene Fano Wene Hupla Inane

At Zofar en isikhe wene

^1-2 A'nogo isikhemo at Zofar en ikhi logolik he, ”Ap wene ebe halek legengge obakhe palek ikherek mene yiba onggo u mene ekhe werega? Athe ap ane hokhorogo ili'lago andi fano ikhe iluk herakfisogoin a?

³ Ayub ao, haren anggikhi logolik he, aren onggo u elo'lek anggegendik ikhi lagen a? Haren li'norogo hilinginafunem andoma re it inambe sop-sophogo logogun iluk hilingiti lagen a?

⁴ Haren anggikhi logolik he, an nane igi mene andoma re weak mene ekhe igi lek anggegen a, nen haren he an Allah elokhoma ap mondok fano nagun welagi anggikhi lagen a?

⁵ Oba nen he, we At Allah amu nen enek onggo yagahesuago!

⁶ Nen, hebelogo wenggelhu mene andi re ero hokhorogo hilingi'mo re afuni nen mondok fut fili'lagwi lek iluk andi re we At Allah nen enek yagahesuak. Andiba re hat hafe hebelasimbik he, an unggum wo'nesu mene re mondok hokho-pokhorek oba nen he, we endebat yi noba fikhemo iluk anggikhi logoino.

⁷ Haren he At Allah endawimo hinago mene inom, Aren wenggelherek mene inom andoma re hendawimo wanumo re eloga? Athe, At Allah omame mondok hokho werek mene a'nogo haren fut foumo re eloga?

⁸ At Allah omame andi re o pogot koloma werek mene andi horok a'ma hak werek kwelek he mondok lego were'ma re, haren huli-hulimo andoma halamo re elo'lek. At Allah omame andi re afuni wa'la'luk lagaikharek oba andoma re horok ambolkwe hak oba nen he mondok elonggoma ma'lima hilingi'mo re, haren yi'nogo hilingik iluk futfou lek hak.

⁹ At Allah omame re kweang talek mene ari onggoksek kwelek he mondok wuri'logo yatma andomaba hilingik. I yenggelogo tiagansek mene ari re onggoksek oba nen he mondok lang-fanghogo hilingik.

¹⁰ At Allah nen hat senhobagaluk wokharek Aren awene tegeterek oba habogari lamo nen he, ap sa hagen ambong serogo Aren hilingitunem andi kwe palu hak nogo?

¹¹ At Allah re it afuni inambeba ineranen wene agarek mene andi re mondogat elurek, At eil oba nen he, ap weak hilingitarek mene andoma re longgo u lek hak.

¹² Wam keledai maro mene agaisa nen eak eil kuluk mene tasumo nek he, ap kembu mene ogo hebelek mene asu hak.

¹³ Ayub ahwi, hat hendawimo pugun eraluk he, nambigen agwi iluk ebesin! A'nogo hiligisimbik Allah ba samban ino!

¹⁴ Hat hendawimo weak werek mene andi leget figik, hat haiba oma nen kwanirogo hilingiti lagen mene andi herak fisigik in o.

¹⁵ A'nogo hilingisigin halok enek he, hailo legengge hambong serogo welagik, nen hane higiluk hendawi fiti'lek youk igi'lek hambukhogo welagik,

¹⁶ nen hoba ou-pou hikhi lagen mene andoma faget wenggel higi'lek, i fu wagarek mene hobuk endebagunem afuni nen inonggot agarek andi hak andoma mondogat honggorasigin.

¹⁷ Hat hebe heluk logogin huli andoma re mo asinandi a'nogo endep hak werek kwelek, mondok alonghogo hilingik logogin, nen yogondak hat hebe heluk welagen oba o hubanggo hak hikhi lagen mene andem he mo hubet asinandi kwelabi wagunem andem higit hilingik logogin.

¹⁸ Hat hebe hambukhogo logolik hendawimo eberek enek logogin. Nen, At Allah nen he hat fetharek were'ma re hailo legengge hoba fanorogo nek logogin.

¹⁹ It afuni haselei meneba re hailorinafi logogin lek, it afuni hokhorogo nen haren leberinabuageluk kino yagaheti logogun.

²⁰ Oba nen he ap weak hilingitu mene re, it faget leberinabu mene ekhe werek le'ma re, inendawi suk-sakhogo logolik kwelakhiikhi logogun. It he we weak-weak wa'la'lo ago iluk we misik andi faget enek nenangot hikhi logolik logogun,” iluk isikhe.