AYUB 1 - Allah Wene Fano Wene Hupla Inane

Iblis nen, Ayub obabut palhikhe wene

¹ O Us andoma ap ekhe enu Ayub welagaikhe. Ap andi ebe Allah ailorogo logolik, oba lombokhogo mondok welagaikhe. A'nogo logolik, wene oba mondok legengge, weak endebat iluk ogo ekhe hilingiti'lek, obabut higit mondok welagaikhe.

² At againafuri ap inebe 7 nen helime inebe 3 nen welagaukwa.

³ Nen, at amingmingengge inebe mondok hokhorogo welagaukwa. Anggo ogore, domba 7.000, nen unta re, 3.000, nen sapi re, 1.000, nen keledai re 500 nen welagaikhe. A'nogo welagaikhe andi nen, afuni o mo ero fikhit andoma welagaukwa mene inangge endebat hangge meneat he, at Ayub andi nek he, mondok kain eilmo wulalhak welagaikhe.

⁴ A'nogo logolik, Ayub againafuri ap inebe 7 nen andi re inetokhogo inaiba lombok pesta at ekhe were'ma hilingitik, at ekhe were'ma hilingitik, hilingitare'ma re, pesta a'nogo hilingiti logolik, inerugwi inebe henaganet aremnogo inayonggo fuluk, inamburu inom, inagai inom, ninggi lagaukwa.

⁵ A'nogo hilingitunem, ap Ayub endawimo nen he, ”An nagainafuri a'nogo hilingiti logolik, ineranen hilingiti'lek meneat he, ekhe weak hilingitasik Allah enu weagetfaga he a,” iluk endawimo anggikhi lagaikhe andi nen he, againafuri pesta a'nogo hilingiti lagaukwa mene omanogo ebe lombok faget, mondogat hilingitu halok he, Ayub ebe huberat siakhogo, it weak hilingitu mene andi nineisena Tuhan nen sebelogo leget fisoageluk, inebe lombok faget wam Allah warogo noleti lagaikhe.

⁶ A'nogo hilingitu kwelek, it Allah nen elalinafikhemo pogoroba welagaikharek mene nineisena Tuhan oba andogotukwama, at Iblis afuni inendawimo kagalik nikherek mene a'nogo it andi inoba kwisikhesik andoma welagaikheat.

⁷ A'nogo were'ma, Tuhan nen heinok wokhikhi logolik he, mel yagatikhe: ”Hat hebe o koma nen wagen?” iluk heinok wokhasikhemo, aren he, ”An hamingmingenggere, o kweangma yi awi ti awi neil kogolik yi kwe, ti kwe, nikhi lagarik wagi o,” iluk yagatikhe.

⁸ A'nogo yagatikhemo, At Tuhan nen heinok wokhikhi logolik he; An namingmingengge Ayub he futfegen a, lega? ”Afuni o kweangma yi awi ti awi welagaikharek mene inobabut he, an namingmingengge Ayub ebe An Nebe endawirogo logolik noba lombokhogo werek andi hak he ekhe werek lek. At andi re An nobaget fogetnafu logolik weak endephogo iluk ogo ekhe hilingiterek mondok lek.

⁹ A'nogo heinok wokhasikhemo, at Iblis nen he, ”Haren Ayub fanot figi'lek logoumo re, at Ayub en Hat hoba ailorogo logolik, Hoba lombokhogo logou hak nogo?

¹⁰ At ebe inom, againafuri inom angge yi mene ti mene inom Haren ferinarek mondok logolik, at eabu yi yabu ti yabu hilingitunem fanotfigik, anggo hokhorogo wogetik, ugunem at anggo o andoma ekhema-ekhema mondok hokhorogo hilinglarik lili'lago andi.

¹¹ Oba nen he, at angge yi mene ti mene andoma mondogat Hat helamo nen he, aren, Hat helokhoma nenat Allah hebe nabit iluk ane hombuk palogo herakhobagau hak werego,” iluk yagatikhe.

¹² A'nogo yagatikhemo, At Tuhan nen Iblis afuni inendawimo kagalik nikherek mene a'nogoba re mel yagatikhe: ”Fano. Harenat. Hat hendawimo anggegen higithogo hilingi'nogen iluk, at Ayub angge yi mene ti mene mondogat henggiba figi o. A'nogo meneat he, at ebe nek he, henggi fakhagain mondok lego,” iluk yagatikhe. A'nogo yagatikhemo, at afuni inendawimo kagalik nikherek mene a'nogo Tuhan elokhoma aremnogo nen wulibi wagaikhesik lagaikhe.

Ap Ayub againafuri inebe inoatik, angge yi mene ti mene legetfigik, isikhe wene

¹³ A'nogo wagaikhesik oba, inenggi ekhe sambul at Ayub againafuri omanogo manggusa mene aiba seni hilingiti logolik, inamburu ninggik, anggur enggen amusu ninggik, ikhi lagaukwa.

^14-15 A'nogo hilingitu werek kwelek, aremnogoat, ap Ayub amingmingengge ekhe wene waluk yonggo Ayub aiba wagaikhesik he, mel yagatikhe: ”Noe, ap Syeba mene ninoasuogoluk wagaikhasik, wam sapi nen yabu wanuageluk nugunem, nen keledai wam sapi era'lu horogat engga palhigik nunggunem, wagaikhasik wam omanogo helikhi logolik he, hamingmingengge mene inebe mondok felelenghogo inoatama re, an hamingmingengge namu nek neluk poloksek wulifirik wene hilinglaga mene andi yagahesi wagi o, noe,” iluk yagatikhe.

¹⁶ A'nogo oan yagatu were'ma, Ayub amingmingengge ekhe pirenek mene wagaikhesik he, mel yagatikhe: ”Noe, eilabut endu hangge pogoroba nen yegekhogo pi wagasik wam domba inom, kambing inom, hamingmingengge konhu welagaikharek mene inebe inom, felelenghogo mondok inoatemo an hamingmingengge namu nek neluk wulifirik wene hilinglaga mene andi yagahesi wagi o, noe,” iluk yagatikhe.

¹⁷ A'nogo oan yagatu were'ma, Ayub amingmingengge ekhe henaganek mene wagaikhesik he, mel yagatikheat: ”Noe. Ap Kasdim mene ekhe inenggiabisak wanharek mene esa henagan mene kagali wagaikhasik, hanggo unta helikhi logolik he, hamingmingengge konhu welagaikharek mene inebe mondok inoatama an namu nek neluk poloksek wulifirik, wene hilinglaga mene andi yagahesi wagi o, noe,” iluk yagatikhe.

¹⁸ A'nogo oan yagatu were'ma, Ayub amingmingengge ekhe wagaikhesik he, mel yagatikheat: ”Noe. Hat hagainafuri omanogo inoe manggusa mene aiba seni hilingiti logolik, inamburu ninggik, anggur enggen amusu ninggik, ugu were'ma,

¹⁹ Sielu anini weak mene o leimo afuni le'ma higiren funha waga logolik, o a'nogo tamakhogo laga logolik he, hat hagainafuri inebe mondok felelenghogo sebelinafemo, an hamingmingengge namu nek neluk wulifirik, wene hilinglaga mene andi hat yagahesi wagi o, noe,” iluk yagatikhe.

²⁰ A'nogo yagatukwama, ”At Ayub endawimo weak agasik hilingite,” iluk inendawi wenggelasuagaluk, asu laberek mene tilibisigik, esi palisigik, isikhesik he, Allah fogerasigeluk kweangma eindep awi yakfilik, mel isikhe:

²¹ ”An nagaisa alabutmo nen yi mene ti mene ekhe waluk ta'lagagi lek andi hak, nebe wa'lasimbik ogore nangge yi mene ti mene ekhe waluk lagain legaro. Neisena Tuhan nen wo'netendik hobuk Tuhan honggwarek hambotkwe helegen andi re, fano. Andi nen he, Tuhan henu nek lego mondok logouwak,” iluk fogeratikhe.

²² Wene enggin hokho mene andi at Ayub oba hilinglagaikhe meneat he, aren weak hilingiti'legat nen Allah oba weaget figi'legat welagaikhe.