AMSAL 9 - Allah Wene Fano Wene Hupla Inane

Ap endawinggen kagalek mene inom kembu mene inomen hilingitarek mene faget isikhe wene

¹ Ap endawinggen kagalek mene andi nen awi wuti logolik e langoak he ebe 7 nen liagaisogo wutikhe.

² A'nogo liagaisogo wutfesikhesik seni isatu mene faget he wam warogo figik, anggur amusu perelogo ap sumburisugu mene faget iwak oba keralogo figik isikhe.

³ Arigin fuluk he, helime amingmingengge mene omanogo inoba re o kota obalik legoma andoma lambik hum ngai esi lani o, iluk lakfisasikhe.

⁴ A'nogo hum ngai eti logolik, ”Sa nen obabut hebelek lek halok he, hebelek mene were'ma yoma ambit eme a!” iluk yagaisano. Nen, it fanorogo wenggelharek lek mene inoba re, endawinggen kagalek mene andi nen ikhi logolik,

⁵ ”Wesimbik he sumburu ninggik, anggur amusu hinagaisogo figimo werek mene oma ninggik, ime o.

⁶ Haren kemburogo hilingiti lagen mene andoma herakfisan o, hat heluk fanorogo logoinogen he, ap higithogo hilingitarek mene nen hilingiri'lagwi mene andoma higit hilingiti logoino o.

⁷ Ap ekhe yagatunen abit werek halok, ap andi aweak werek mene andoma inuk e'no, inugetunem he aren endo yakhabigin a'naga. Nen, haren ap a'mage weak meneba wenageten halok he, aren hat piliphafi logogin a'naga.

⁸ Ap ekhe yagatunem abit anggugu halok he, hat ha'mage at oba fou fuk, a'nogo hilingisigin halok he, aren hat hebe abiret hobagagakhi logogin. Oba nen he, ap hebelek mene oba nek he haren at oba weak hilingik mene andi yagasigin halok he, aren endawit habigin werek a'naga.

⁹ Haren ap hebelek mene oba komo wene yagasigin halok he, at andi ekhe inomat hebelek mene hilinglasigin. Nen, ap Allah ba tipsek mene komosigin halok he elu agarek mene andi re, ekhe inomat hokhorogo elu asigin.

¹⁰ Ap inobabut hebelek mene asuogeluk halok attak-attak he Tuhan oba inailorogo logogun fano. Nen, aren ambi At Ebe Mondok Horek mene a'nogo elu agu halok he, futfuluk hilingitarek mene eise aga andi.

¹¹ Endawinggen kagalek mene andi nen he hat hebe umur uanhogo welagaikharek mene wokhesigin.

¹² Endawinggen kagalek mene andi haren fetaluk logogin halok he ambisangma hat fano aga logogin oba nen, endawinggen kagalek mene andi habiren filikhogo lakfisegen halok he wene honggwarek hoba aga logogin.

¹³ Kembu welagaikharek mene andi re, hemi yi wene ti wene hilingitarek mene onggorengge logolik enggali higi'legengge ane awulagam weak ilik nikherek andi hangge werek.

¹⁴ At ebe welagarek oba re, at awi solombonma inom he, o kota leget pak mene wagane'ma kwe ambe palek oba legoma andoma inom hurek logolik welagarek.

¹⁵ Andoma nen he ap ebekhalem lagaikharek mene wolinafik, nen ap inendawinggenma higithogo wenggelharek mene inendawinggen wanhik, hilingiti logolik he yi'nogo ikherek:

¹⁶ ”Yago, hit hilingitu aple hinonggot mene andoma yoma we'ni!” agarek. Nen, it ap inendawinggen wenggelek lek mene nen hilingitarek mene inoba aren ikhi logolik he,

¹⁷ ”It i yogot wanha mene andi re enduk he mitsek, nen, hinak-hinagengge nenggarek mene andi re enduk mondok fano,” iluk yagaisikherek.

¹⁸ It he andi nen wolinafunem lagaikharek mene andoma re he andi ambelemangge asugun a'nogo inonggothogo lagunem andoma nen inebe nalasi lagaikharek, nen it fena he andi aiba kwi lagaikha mene re yogondak he inebe afuni wa'la'luk lagaikhare'ma omanogo asi lagaikhasik werek.