AMSAL 7 - Allah Wene Fano Wene Hupla Inane

¹ Nagainafuri e. An nen komothinafi lagi mene andi re eberek mondok logoino, nen hinobabut, Yi'nogo hilingiti logoino, iluk yagahisigirek mene andi re hinonggorasu fuk.

² Hit hineluk fano logobagaigen he, an nen komothinafi lagi mene andi, nane hologo hilingiti logoino. An nen komothinafi lagi mene andoma re hinonggwarek hineilenggen alelogo fetaluk welagep andi hakhogo fetaluk logoino.

³ An nen wene yagahisikhi lagi mene andoma furogo eberek mondok logolik he, hinendawinggenma lisu palogo fakhaluk logoino.

⁴ Hendawinggen kagalek mene andi re hagailak higit anggugu nogo, nen helu agarek mene andi re harugwi hinom hundik mene anggugu nogo.

⁵ Hemi inobabut yanani nilik nikharek mene inane amusuba hat hendawi waganogo hobagagu halok, endawinggen kagalek mene a'nogo re hobagaluk yatma lagain o.

Hemi yanani hilingitarek mene faget yagaisasikhe wene

⁶ Nenggi ekhe sambul he, an neil jendela ambe folelekwe nen ye'lagi hak he,

⁷ ap alage inendawinggen oan mene hokhorogo welagaikha. Were'ma, inanggele'ma re at ekhe endawinggen mondok lek mene welaga.

^8-9 O mondogat hu'mo agasik hubasigiluk ugu kwelek aremnogo re, ap souge a'nogo re ebekwe he yanani nilik nikherek mene aiba lageluk lagarek oba kwe handogalma aremnogo lagik wagik ugunem yerogo welagi.

^10-12 He andi obabut he ailo lek, enggali legat logolik, ap heraginabik kwe lagaikharek oba esanggoma andoma lalugen hobuk o silikwe andoma lagik, kwe handogalma andoma laluk mendek welagik ikherek mene, asu hemi yanani nilik nikharek mene inasu labetarek hanggeat laberogo re, ane amusu nen endawinggen lebelogo laligiluk anggikhesik ap alage mene a'nogo oba wagunem yerogo welagi.

¹³ A'nogo wagasik, ap alage a'nogo obakhe felikhogo fakfikhesik he, hai ambe saluk wati laga. At andi re enggali legat mel yagati laga,

¹⁴ ”An nen yi'nogo hilingisigin iluk nane igi mene higithogo re, o yogondak he wam warogo figirigo.

¹⁵ A'nogo figirik wagi andi nen he, an naiba lambik nanogen iluk yogondak herakhabik wagi mene nemberek ambi ago yi o!

¹⁶ An naiba nogo igirek oba re, su kain wurilik o Mesir en yo fano sakhorek meneba eil amu-amu kwagongge salogo fuluk wagi o.

¹⁷ A'nogo figirik he, amben fano mene e mur amusu inom, amusu ekhe alek mene inom, kami inom, warogo fuluk wagi o.

¹⁸ Andi nen he, o yogondak hup yiba re, nemberek felikhogo nogo ugu werek kwelek ninoba nen o wei uakhogo re louwogo.

¹⁹ An nagun he, yarawi lagama re, oloba ebe lego.

²⁰ At uang hokhorogo helaluk lagangge re, dua minggu yaba re wesigin lego,” iluk yagate.

²¹ At he andi eranen meneat he, ane amusu hilingik oba ap alage mene a'nogo endawinggen waganogo re, arat lalhe andi.

²² A'nogo lalhe meneat he ap souge andi endawimo furogo wenggelhi'legengge, wam sapi warogo senggelharek oba waluk laga logolik, kumbi lit hugunem lagarek hak, nen, ap kembu mene inobaget unggum wogisagain iluk fouget fuluk hele warogo woginarek lagunem lagaikharek hak laga andi.

²³ We ferekhogo aremnogoat sue tarogo hele wephogo fagarek oba ke'nok ilagarek hak, ap alage andi endawinggen hambuget hikhe lek andiba re ebe tok endawinggenma kagaukhogo watemo, at eluk a'nogo alomarogo fakhikhe andi.

²⁴ A'nogo hilinglaga andi nen he, nagainafuri e. Wene an nen komothinafi lagi mene andi hinesanggo holfuluk he, fanorogo futfikhi logoino o.

²⁵ Hemi ariginik mene andi nen he herakhinabik wesinogo, nen hinendawinggen wokhinabinogo, nen hiren ogo heraginabik la fugat.

²⁶ Hemi ariginik mene andi nen he ap hokhorogo weagerogo fisigik, nen inebe hokhorogo wenasu mondok elo'lekhogo inoatik, agarek andi.

²⁷ Hemi ariginik mene andi inaiba logoin halok he, wa'lasugun nen iluk kwe horok meneba herakhilik logoin andi.