AMSAL 6 - Allah Wene Fano Wene Hupla Inane

Nini oba lirogo komorinafikhe wene

¹ Namlogo e, haren ambi ap ekhe hinom wene wati logolik, hat hoba palegengge werek mene andi an nen obali'mo fagain egen halok,

² hat honggwarek hane egen andiba hele webet fakhegen andi o, nen wene wareten andi nen alomarogo fakhegen.

³ Namlogo e, andi eberogo egen halok he yogondak hat hebe ap andi a'ma welagen. Oba nen hat hebe lolagain iluk hilingisigin mene re yi'nogo yi: Weak-weak ap andi ambit lambik, aren lologo wulak hobagauwageluk heindep awi yagaisogo yaga'no o.

⁴ Wene andi wutsek legengge nen he set waligik, nogo igik u fuk.

⁵ Sue inom, no kijang inom afuni nen wasugun iluk hukhogo kwelakfugunemen polokhogo wuliferek hak, hat he hele wepse'ma andi nen polokhogo wulibino.

⁶ Hit afuni hinaberali mene yi sani, nini nen hilingiri'lagwi mene andoma futfuluk, it inobabut hilingiri'lagwi mene andi higithogo hilingiti logoni o.

⁷ Nini andi re inoe melalinaferek mene re lek, nen inoe awea'ma ferinarek welagarek mene inom, inebe kagalinarek welagarek mene inom he legat.

⁸ A'nogo meneat he, hobuk o meiso wagunem ninggi logogun mene faget, o hibi werek kwelek aremnogo yi mene ti mene tik tukhogo fakhagarek andi.

⁹ Afuni inobabut inaberali weak mene andi re, ki huli nen nogogu mondok logogun nogo? Nen it andi re ki sambul ineluk asugun nogo?

¹⁰ Inenggi sirogo inagaumo fuluk, set walogo logolik he, mel agarek: Nogo neil aga, nogo homokhogo ikhi logogin, iluk agarek.

¹¹ A'nogo meneat he, it a'nogo nogogunem, ap inobabut weak mene inasikhe waluk we'luk yi mene ti mene helagarek hak, ferekhogoat inangge yi mene ti mene lek agik, ineilmo lek agik, igin andi.

¹² Ap weak mene inom kwanirogo hilingiterek mene inomen he, yikwe tikwe ineranen wene nek lalinabik lagaikharek.

¹³ Iren ineil hombut watik, inambe nguluk habuk oba nek lalinabik lagarek.

¹⁴ At endawimo wenggelherek mene ero mondogat fili agaresik, aren wene weak mene felalogo fikhi logolik werek andiba yikwe tikwe omanogo yei wene nek palharek.

¹⁵ Andoma mondogat he ferekhogo at onggwarek oba asumo re, at ebe mondok alperelogo foumo, eiloak legasigin.

^16-19 Wene ero 7 nen Tuhan abit anggikherek mene aren herakfagain mondok lek mene re yi: Obabut wonoget fakhikherek mene inom, eranen wene lalinaferek mene inom, enggiba ap weak hilingiti'le'maat inoatarek mene inom, ungguloa'ma nen wene weak mene lenggalogo wulaferek mene inom, weak hilingisigiluk eisok atni weak lagarek mene inom, hundik-hundik eranen wene ikhi logolik, eberogoat neilenggen isigirik iluk agarek mene inom, inagaila'lak inom fano mene weak asuageluk hilingitarek mene inom andoma re At Tuhan nen he mondogat abit.

Pailak hilingitarek mene faget eberisikherek wene.

²⁰ Namlogo e, heisena nen yagahete mene andem enek hilingiti logoino. Nen hagaisa nen komothabi'lago mene andem he honggorasu fuk.

²¹ Wene andoma hundik-hundik ebeti logolik, hendawimo fanorogo fisogo logoino,

²² Wene iren yagaheri'lagwi mene andoma re, hat lagain kwe wokharek lagu mene inom, o hubanggo hebe kagalharek werek mene inom, hat nogokhi la'luk heluk agunem yi'nogo hilingisin iluk yagahetu mene inom werek.

²³ Hagaisa heisena nen yi'nogo ti'nogo iluk yagaheri'lagwi mene andi re, esage ibilhafu mene faget, iren wenakheri'lagwi mene andi re haren fanorogo holfuluk heluk higithogo werek mene faget yagaheri'lagwi.

²⁴ A'nogo hilingiti logogin oba re hat hebe hemi inobabut weak mene andoma horokhogo nen inom, ap amu mene inagagwi inane amusuba hendawi wanuogeluk hilingitunem inom ogwal hobagakhi logogin.

²⁵ Inelokhe fano pugunsek andoma nen weaget habunogo, it ineil alili pugunsek andoma nen hendawi nanogo.

²⁶ Yanani hilingitarek mene re sumburu piring we misik oba hakhogo onggo palogo woge'luk hilingitarek, oba nen he ap inagagwi inom babi lagu halok he, onggore ap andi ebe warek inom wuret lagarek.

²⁷ Ap ekhe nen endu enggen su labetu meneba huli'libete halok he su andi endu nen paligin lek anggegep?

²⁸ Aben endu wabunak nunggunem ineisogen sebelhu halok he ineisok endu nen ninggi'lek logou hak anggegep?

²⁹ Andi re aben it ekhe inagagwi inom hilingitarek andi higit werek. Sa nen a'nogo ekhe hilingisigin halok he ap andi wene oba kosigin mondok lek.

³⁰ Ap ekhe nen nunggu mene nele nen hinasigin oba nen, onggwarek enu weagerogo fakhagain.

³¹ Nen, hinatunem aben fak fembik halok he aren onggo tujuh kali lipat fagain fano, a'nogo hilingisigin andi faget he at angge yi mene ti mene mondogat legasigin.

³² Oba nen he, ap ekhe nen it ekhe inagagwi mene inom pailak hilingite halok at andi ebe kembu nen hilingisiginmo, onggwaregen weagerogo fakhagain andi!

³³ At oba enggin-fenggin fuluk endo yati logogun. Enure weak peakhogo fugu mondok logogun.

³⁴ A'nogo hilingisugun oba re he andi agun a'nogo a'mage kwelakfugunem, a'mage hokhorogo lagagin. Aren onggo fakhagain anggikhi logolik halok he elagaigen iluk isot fikherek lek.

³⁵ At andi re uang oba endawinggen sebelugun iluk hilingisugun oba nen he, endawinggen sebelu re elo'lek agarek. Onggo hokho pokhorogo wogosugun meneba nen ogore, a'mage lagaikherek mene a'nogo sebelogo pelabu re elo'legat agarek.