AMSAL 5 - Allah Wene Fano Wene Hupla Inane

Pailak hilingisinogoluk komorinafikhe wene

¹ Namlogo e, an nane yagaheti lagi mene yi fani fanorogo hologo hilingiti logoino! An nendawinggen hebelek welagirek mene inom, futfuluk hilingitirek mene inom, hat yagaheti lagi mene andoma futfikhi logoino.

² A'nogo hilingisigin obare hat hebe hendawinggan kagalek logolik, wene ane agarek mene helu agik, afuni inelokhoma welagaikharek mene helu agik, igin o.

³ Hemi inobabut weak mene andi inane ugunem he, kin amusu enduk mitsek andi hangge hilingi'mo re, ane amusu nen he ap inendawinggen woginaferek,

⁴ oba nen abirengge omanogo mondogat lek agunem he, we indawinggen weak agarek mene inom, ou agarek mene inom enek he logogin.

⁵ A'nogo were'ma, hat hebe lisogo wokharek kweangma afuni wa'laluk lagaikharek oba pelakhabumo re, andoma pilambik ebekwe wa'lasuogeluk lagaikharek oba andoma kwi lagain.

⁶ Nen at andi re kwe elugerinaferek mene a'nogoba tukhumhogo welagarek lek, aren onggorat logolik ebekwe andiba nen taganhogo wulibi lagarek.

⁷ Andi faget he hit nagainafuri yi, an nane andi sagalogo herak fisigi'lek furogo holhi logoni.

⁸ It hemi ariginik mene andi hinom horokhogo logou fuk! It inaiba iluk ogo la fugat.

⁹ Nen hiren he andi hinom hunisugun halok he, hinenu lego logogun mene a'nogo longgo igik, hit hinebe hineluk alageba logogun mene a'nogo it ap inendawi anggigi'lek hilingitarek mene omanogo nen sebelogo hinobagagik ugun o.

¹⁰ Hinangge yi mene ti mene logogin mene re it afuni amu mene nen ninggik, nen hit hinangge hinenggi ambisangma saburikhi logogun mene re, it ap hit hinebe inonggot mene nen eise agik, ugun o.

¹¹ Ariginhi logolik he, hit hinebe ogo ouen mondok huterogo hinoatunem logolik he, hinendawimo mondok ale palerogo hikhi logogun.

¹² A'nogo hikhi logolik hiren ikhi logolik he, ”Eige, nenahalok an he komo wene faget nabithogo hilingiti lagi e, ninggi'nogo nen an yaganetu mene re herakfisikhi lagagi agwi,

¹³ nenahalok an nen it guru lak inane ugunem hologo higithogo hilingiti lagagi lege e, nen an yaganetu kwelek omanogo nesanggo fanorogo holfikhi lagagi lek agwi?

¹⁴ Eberogo nenat, an nebe afuni ineilhanem pile pigiluk hilingiti lagagi agwi,” iluk ugun werego.

¹⁵ Andi nen he, honggwarek hagwe meneba nek tukhumhogo waganek logoino, hendawinggen nunggu mene andi re at oba nek wogosigin fano.

¹⁶ He amu mene herarik lambik hinom fano-fano aple hilingiti logolik hogoin mene andoma re we alomarogo, hat hagwe mene hinom he fuk.

¹⁷ Hilingitunem fano mene hogoin andoma re hat honggwarek inom hagwe inom hogoin mene faget werek, it ekhe mene hinom hoageluk he fuk.

¹⁸ Andi faget he, hat honggwarek hagwe hinom enek we hinagaiyekhogo logogun. At ebe tugum oba helagain mene andi hinom enek haratu nogo.

¹⁹ Hele ebe tugum oba obabut hilingiterek he no kijang en hilingiterek andi inom higit. At ebe pugun-pagansek andiba re, hat hendawinggen mondok wanhunem, hagaiyek ekhe inom hikhi logogin.

²⁰ Namlogo e, hat he nena mene faget amu mene hinom huniti logogin nogo? Nena mene faget he obabut weak mene andi hinom kam wati logogin nogo?

²¹ Afuni nen yi'nogo ti'nogo hilingiri'lagwi mene andoma mondogat he Tuhan eilenggen werek. It afuni koma kwe lagunem Tuhan nen kwelaginarek mondok werek.

²² Ap weak mene nen aweak hilingiterek mene andi re onggwarek faget wephogo fakhili'lago.

²³ Komo wene helikhe lek andi nen at ebe warikhe andi. Nen, at onggwarek ebe moruelekwe ineiloak leget fisagarek oba hela'lili'lago andi.