AMSAL 4 - Allah Wene Fano Wene Hupla Inane

Awenggelek mene andiba nen ambisangma helagarek wene

¹ Yago nagainafuri, hineisugwi nen komothinabi'lagwi mene andoma fanorogo hologo hilingiti logoino! Hiren wene andi futfuluk higithogo hilingiti logogun halok he hit hinebe hebelek mene asugun.

² An nen yagahisikhi lagi mene andi re fano mene hilingi'mo re, hiren seramet fikhi logogubo.

³ An nebe yenggere'ma re, neisena nagaisa ineak we misik masigengge were'ma,

⁴ neisena nen komo wene yaganeti laga. Yaganeti logolik he yi'nogo ikhi laga, ”Komothafi lagi mene oma re eberek mondok logoino. Haren we misik iluk ogo ekhe honggorasu fuk. Hebe fanorogo logoinogen he an nen komothafirek mene andoma higithogo nek hilingirik laga logoino.

⁵ Hebe mondok hebelek mene a'luk hendawinggen kagalek mene logoino! An nen komothafirek mene andoma re herak figi'lek eberek mondok logoino,” iluk yaganeti laga.

⁶ Awenggelek mene andi fanorogo alelhi logoino, a'nogo alelhi logogin oba re awenggelek mene andi nen a'ma fetharek logogin. Hendawi hundik logogin halok aren hat hebe hambukhogo logouwageluk fetharek logogin.

⁷ Wene ebe esin mene attak-attak haren hilingiti logogin mene re yi'nogo: Hafe hibil hebelhogo logolik homamerogo hilingiti logoino. Haren amu mene faget ekhe mu'luk laga logogin oba nen he, ebe tukum hogore yi wene ti wene futfuluk hilingitarek mene andi helagain iluk homamerogo mu'luk laga logogin fano.

⁸ Awenggelek mene andi helokhomarogo hilingisigin halok he, at andi nen hat hebe esin mene hilinghobagakhi logogin, nen henggi pukhogo fisogo logogin halok, hat henu legeisogo hobagakhi logogin.

⁹ At andi nen hat hunggulmo kware-kware owil-owilenggeba mindago mene hangge elokhe fano mene hilinghobagakhi logogin.

¹⁰ Namlogo e, an nane furogo holin o! Nen an nen komo wene yagaheti lagi mene andoma fitfut fuluk hilingiti logogin halok he, hat hebe umur uanhogo logogin o.

¹¹ An nen afuni wene inendawinggen kagalek mene inom, inebe ineluk fano welagaikharek mene inom he, yi'nogo hilingitarek iluk arat yagaheti andi o.

¹² Nen hat heluk a'nogo logogin halok he, hat kwe lageluk lagunem helokhoma hanggwe palhi logogin lek. Nen humusek lagunem salok kwalogengge waroageluk hilinghobagakhi logogin legat.

¹³ An nen yagahetunem helikhi lagen mene andoma hundik-handik ebeti logoino. Komo wene andoma furogo kagalek logogin halok he, wene fano mene andoma nen heluk werek aple faget elok lebethiikhi logogin.

¹⁴ It afuni inobabut weak hilingiri'lagwi mene nen hilingiri'lagwi andi hakhogo hilingisu fuk, nen it inobabut waganogo hilingisu fugat.

¹⁵ Nen haren hendawinggen it inoba tibet fuluk logou fuk, it andi inoba nen oboget isaluk pikhithogoat laga logoino!

¹⁶ It ap inobabut weak mene andi re iren weak ekhe hilingiti'lek halok he, hup nogo u lek hak. Iren ap amu mene ekhe weagerinafi'lek halok he, nogo ineil agarek lek.

¹⁷ Inaniniba hilingitu mene inom weagerinafu mene inom andoma re, it inagai inamburu higit werek.

^18-19 Ap weak hilingiri'lagwi mene andi inanggwe lagukwe mondok mumeak hilingi'mo re, ineisoga'lip silukhogo warogoin wenggelek le'ma pule pagarek. Oba nen he it ap fano hilingitarek mene andi inanggwe lagaikharekwe re mo yegelogo liabi wagunem endep hikhip hokho hikhip kweangma mondogat selegeraterek andi higit werek.

²⁰ Namlogo e, an nen komothafirek mene andoma hesanggo holfuluk, nane igirek mene andoma futfikhi logoino!

²¹ Wene andi hugisa fuk, oba nen he hendawinggenma ago warogo fetaluk logoino.

²² Ap komo wene inendawimo fanorogo fakhaluk werek mene andi re, ineluk logolik inoba serogo fano logogun.

²³ Hendawinggen andi nen kwe fanorogo lagaikharekwe yagaheti logogin enggere, hendawinggen andire fanorogo halikhi logoino.

²⁴ Misik sambul iluk ogo hane weak ekhe ikhi logou fuk, ineranen wene agarek mene inom, inane nen afuni lalinafarek mene inom andoma re herakfisikhi logoino.

²⁵ Hendawimo higithogo logogin mene a'nogo nen he, hat helokhoma enekhogo hilinghobagakhi logogin, hendawimo amurek logoligen helokhoma nen enek hilingiti logou fuk.

²⁶ Oan hilingiti'lek logolik hendawinggen fanorogo wenggel fulugen hilingiti logogin halok he, haren yi aple ti aple hilingitunem ambisangma enggen fano mene nek i'laga logogin.

²⁷ Weak mene mondogat herakfisaluk, kwe pikhithogo nek laga logoino. Ebekwe eberogo mene andiba nen taganhogo wulibi la fuk.