AMSAL 3 - Allah Wene Fano Wene Hupla Inane

Ap alagendek mene komorinafarek wene

¹ Wene an nen yagaheti lagi mene andoma re honggorasu fugo, namlogo. An nen wene melalek yagaheti lagi mene andoma eberek mondok logogin halok he,

² hat hebe umur uanhogo welagik, heluk fano hagaiyekhogo welagik, ikhi logogin o.

³ Hat hendawi hundik heisena Allah oba logolik tiphogo hilingiti lagen mene andi herakfuluk la fugo! Athe siong inalonggopma itarek higit itik, lisu palharek higit hendawinggenma peterogo fakhaluk, eberek mondok logoino.

⁴ A'nogo hilingisigin oba re At Allah nen inom afuni nen inom inagaiyek hat hoba figik, agaugwethafik ikhi logogun o.

⁵ Hat hendawinggenma eberogo nen heisena Tuhan oba tibet fikhi logoino, hat honggwarek homameba wenggelhi lagen mene oba nek tipsek logou fuk.

⁶ Haren yi aple ti aple hilingiti logolik Tuhan oba nek ebethikhi logoino, Arenat hat hoba ineluk fanorogo welagaikharek mene re yi'nogo iluk inukhesigin werego.

⁷ Hat hebeba hilingik welagen mene andoma werek kwelek oba nen, an enek he nelu mondok welagi iluk anggikhi logou fuk. Tuhan ane hologo hilingiti logolik, weak mene re herakfikhi logoino.

⁸ Haren hilingisigin mene andiba re obat higit hebe fanot hobagagu mene inom, hendawimo lombuget hobagagu mene inom logogin.

⁹ Tuhan agaugwerati logolik he, hangge yi mene ti mene fano mene wogetik, nen hanggweang oba nen enggen ugu attak palhu mene wogetik ikhi logoino.

¹⁰ A'nogo hilingitunem he, At Tuhan nen hangge gandum enggen palogo fikhi logogin oba andoma hopot figik, hagai oak anggur agai hinago fugu mene andoma ambe sobet figik ugunem he obalik hoporogo koma fou heat aga logogin o.

¹¹ Tuhan nen yagahesigin mene andoma re filikhogo herak fisa fuk, namlogo. Andi re an eberek logouwageluk yaganeri'logo iluk wanhi logoino, nen wene melalek yagaheri'lago mene andi faget haberali a'luk herakfisa fuk.

¹² Eisena nen amlogo endawi hundik logolik komoterek hak, At Tuhan nen ogo afuni At inom endawinggen hundik mene inoba yagaisugu welagarek.

¹³ It ap inendawinggen hebel agaikharek mene eise asugun mene andi re inendawinggen wenggelek mene asugun andi nen he, inendawimo nen inagaiyegeti logouwak.

¹⁴ Nen, iren inendawimo anggikhi logogun mene andi re perak ambisangma helogoin mene andi re we maben hangge, nen emas onggo inom he higitsek lek.

¹⁵ Inendawinggen hebelagaikharek mene andi re helep permata onggore sebelek hak oba nen, andi nek he mondok onggo hokho, nen haren yi'nogo helagain iluk hendawimo ebet-ebet mondok hilingiti lagen mene andoma inom he, higitsek lek.

¹⁶ Hebelagaikharek mene andi nen he, hebe umur uanhogo logouwageluk inom, henggi werek asuageluk inom, henu werek logouwageluk inom, hilinghobagakhi logogin.

¹⁷ Hebelek mene andi nen he, hat hebeba hagaiyekhogo logouwageluk hilinghobagagik hobabut fanorogo logouwageluk halhobagagik, igin.

¹⁸ Ap ekhe nen hebelek mene andi enggi pukhogo fisogo logogin halok he, ebe eluk logolik agaiyekhogo mondok welagik, obabut fanorogo nek welagik hilingiti logogin.

¹⁹ Awenggelek weak andiba At Tuhan nen kweang tik warogo fesikhe, Ebeterek mene andiba re pogot obalik warogo hutfesikhe andi.

²⁰ At elu mondok welagarek mene andiba re kweang kagalogo kweang a'ma nen i elesi fulogoumhogo liabi wagik, ohena pogoroba nen meiso kweangma pelabi wagik isikhe.

²¹ Arigini'mo re namlogo haren inendawinggen hebelagarek mene andi obokhigi'lek pukhogo fisogo logoino! Nen haren henggi obokhogo lakfisagun,

²² hat heluk werek mene a'nogo halhobagagunem fanorogo logolik, hagaiyekhogo nek logogin.

²³ Nen hat kwe lageluk he hailo lekhogo laga logogin, heisogunggum tunghogo hoati logogin lek.

²⁴ Haren hailo legengge laluk nogokhi logogin, nen hup inukhogo nogo hobabe lekhogo nogokhi logoginat.

²⁵ Sielu ferekhogo wagarek higit enggin-fenggin ap weak hilingitarek mene inoba asi wagu halok he hailosu fuk.

²⁶ At Tuhan nen hat hebe fetharek mondok logogin. Aren hat hebe sapna ele'ma alperel habuageluk oboget heagain lek.

²⁷ Hat hendawi fano nen elok leberisa werek kwelek, hilingiti lagen mene faget afuni ekhe nen lebetniselebe e iluk anggugu kwelek, nabit iluk herakfisa fuk.

²⁸ Haren yogondak leberisa elok werek kwelek oba nen, it hat hinom logogun mene a'nogo inoba, hobit lebethisagain enggere nenangot hikhi logoni o, iluk yagaisa fuk.

²⁹ It ap hinom horokhogo welagep mene hat hoba eberogo anggaluk hilingisugun mene omanogo inoba it lalinabigin iluk hilingisu fuk.

³⁰ Ap ekhe hat weaget hobagaikherek lek mene, wene ero lek kwelek oba nen hinom yei wene palu fuk.

³¹ It ap inobabut haferogo hilingitarek mene omanogo inoba ha'mage fikhi logou fuk, nen iren hilingitarek mene andoma inobabut walhigik hilingisu fugat.

³² Andi re, At Tuhan he ap weak hilingitarek mene inoba abit welagarek, meneat he ap fano higithogo hilingitarek mene inom he horokhogo welagarek andi nen.

³³ Ap weak hilingitarek mene inaiba re Tuhan nen homan ikfisikherek, oba nen, ap At oba lombokhogo welagaikharek mene inaiba re fanot fisikherek.

³⁴ At Tuhan he ap leget fakhagarek mene inoba re abit isikherek oba nen he ap sebelfakhagarek mene inoba re fanot fisikherek.

³⁵ Ap hebelek mene re, enu ekhe inom fanot fakhikherek, oba nen he ap kembu mene re ekhe inomat weaget fakhikherek andi.