AMSAL 26 - Allah Wene Fano Wene Hupla Inane

¹ O hibi werek kwelek meiso wagarek hak, nen o aganhan werek kwelek meiso sogenggen es mene pelaferek hak, andi higit ap kembu mene faget agaugwerinafarek andi re mondogat elo'lek.

² Sue nen tarogo lagaresik pogotkwe lagik wagik ikherek hak, afuni weak hilingiti'le'maat homan fisagarek mene andi re inoba asu lek hak.

³ Wam keledai re, ambisangmangge hele lisogo waluk lagungge kelfagarek, nen wam kuda re fe'nenggeba lambisok warik lagaikharek, andi hak he ap kembu mene andi re yei wasugun halok fano.

⁴ Ap ekhe morue mene nen heinok wokhugunem onggo yagasigin mene andi re, ap onggo yagasigin mene andi re emberek higirat werek.

⁵ Heinok woginabuogeluk ap morue mene nen heinok wogisagarek hak ugu halok he, onggo uogoluk ogore morue mene nen agarek hagat yagaisogoin fano, andiba re ap heinok wanigin mene a'nogo nen anggikhi logolik he an nelu welagi iluk anggagain oba nen he, a'nogo hilingik welagi re lek higi, iluk futfagain a'naga.

⁶ Wene waluk loageluk ap kembu mene inayonggo fuluk lakfisogoin halok he, andi re inonggwaregen warogoin iluk herarik laluk inoak sombologo waragarek andi higit werek.

⁷ Ap eisok kwanirek mene nen eisok otorogo filik lagarek hak, ap kembu mene nen komo wene ikherek mene re andi higit ikherek.

⁸ Ap wenggelhu mene mondogat elo'lek oba nen fogeratarek mene andi re, kartafel oba helebenggen webet fuluk welagaikharek andi higit werek.

⁹ Ap kembu mene nen komo wene agarek mene andoma re, ap lugu-lugwi palharek mene inenggiba alok kugunem fugulharek andi inom higit.

¹⁰ Ap ekhe nen ap kembu mene hea, athe ap hesangge mene hea, yabu hilingisuageluk yagaisikherek mene andi re afuni mondogat alomarogo fisagarek.

¹¹ Mene nen hebak wut fuluk hobuk ambotkwe ninggerek andi hak, ap kembu mene nen he kembu-kembu aple aremnogo nek agap sagalhikhi logolik werek.

¹² Nen ap kembu mene andi nen he we misigam hangge nek wene fano agarek, oba nen he ap ekhe onggwaregen wonoget fakhikherek mene andi nek he ebenagaik elo'lek.

¹³ Ap korek mene andi re ailoba logoigiluk agaiyek logolik he, aren ikhi logolik, ”Enda'ma wulibi lamo re ebekhalem mene olomene nen libilnabi nogo,” iluk ikherek.

¹⁴ Kwe sou engsel oba hilingi'mo huthigik yagathigik hilingitu mondok welagarek andi higit he, ap korek mene andi re nogogarek oba omanogo kuluk nogo nek limbil-lambal ikhi logolik welagarek.

¹⁵ Ap korek mene re, mondogat ko pisangsek mene ekhe werek, onggwaregen nunggu mene waganogo ambelema kwelafu aple ogore mondogat elo'lek.

¹⁶ Ap hebelek mene inebe 7 nen wene onggo higithogo u meneba nen ogore, we endep harek hak oba nen he, ap korek mene a'nogo nen anggikhi logolik an enek he hebelek mene welagi anggikherek.

¹⁷ Ap ekhe nen it ekhe inamu wene palhunem andoma inom sebe'luk hilingitu halok he, aben mene olomene esanggo kwanirogo lirisagarek hak hilingiri'lago.

^18-19 Ap eranhogo wene nek ikhi logoligen, ”An he we asegen igi,” iluk ikherek mene andi re, ap lugu lugwi palharek mene nen sikhe endu mene a'nogo inenggi nen unumutarek higit.

²⁰ E nolhu mene lek agu halok endu nagul agarek andi hak he, ap ekhe ane tindel weak golik wene sagarik lagarek mene a'nogo ebe wa'lagunem he, yei wene ugu welagaikharek mene omanogo palagarek.

²¹ Endu enggen inom e inomen seberogo hilingi'mo endu amulok lagaikherek andi hak he, ap yei wene nek agarek mene andi re inendawimo ina'mage kwelafarek.

²² Inabok palharek mene andi re mondok fano nen he afuni nen pil houwogeluk inagaiyek.

²³ Iwak kweang tangge mene agap endakwe perak meneba labere'ma elonggoma kweang mene hilingik andi hak he, ap inanini weak hilingiterek mene andi re inaneba fano-fano aple nek ikhi logoligen he, inendawimo re weak mene nek peterek.

²⁴ Ap li'norinaferek mene re ambeba nen ane fanorogo ikherek mene hangge ikherek, oba nen he endawimo re eranhogo wene nek peterek logoligen ikherek.

²⁵ Ap ane sakhorek oba ugu halok he eberogo iluk angga fuk, at andi re endawimo wene weak mene peterogo logolik igin a'naga.

²⁶ At awene weak mene omanogo endawimo hinakfakhagain oba nen he, ap hokhorogo nen weak hilingisigin mene andi enegat hambik inelu asugun.

²⁷ Ap ekhe nen ap amu mene faget iluk kweang habuligin oba nen, kweang habuli'mo a'nogo onggwarek eisok kobokhogo pigin. Ap ekhe nen helep ap amu mene faget iluk wephogo fagain oba nen, helep a'nogo nen onggwarek tunghogo wasigin.

²⁸ Ap ineranen wene lalinafarek mene andi re inabit inoba fagarek andi inom higirat. Inane fanorogo agarek andi re alomat lasugun mene faget agarek.