Biblia Todo Logo
Bìoball air-loidhne

- Sanasan -

AMSAL 23 - Allah Wene Fano Wene Hupla Inane


–6–

1 Hat ap hokho inap hinom hu'la'luk sumburu ninggi logolik halok he, an ap sa ninom sumburu ninggi lagi nogo, iluk ebethugu nogo.

2 Nen ekhere, hat sumburu hinom na hak hilinghafu halok he nele agu mene andi sebelhugu nogo.

3 Hat weaget habuogeluk isagaisogo fili'lagwi mene andoma enduk fano nen nagain iluk esia'le pok u fuk.


–7–

4-5 Hit hinangge yi mene ti mene andi ogolabi werek mene hangge hilinglasimbik, sue pim pogot kwe tarogo lagarek andi hak misik sambulat lek asigin andi nen he, hinebe kain hinangge yi mene ti mene hokhorogo asugun mene faget hinomamerogo hilingiti lagep mene andi re herakfisikhi logoino o.


–8–

6 Ap ekhe endawinggen himbirik mene hinom sumburu na fuk, nen at angge enduk fanongge andoma faget nele iluk hamolo asu fugat.

7 Aren ikhi logolik, ”Name, imbigen he, ekhe inomat mangorogo nan abi,” igin andi re fanorogo igin he fuk, oba nen endawimo amurek logoligen ambeba nek he fanorogo igin a'naga.

8 Hobuk haren pilhagain engge a'nogo ambotkwe hemelogo wulakfei wesimbik, haren hane pugunhogo at oba igin mene andoma re alomarogo egen hanogo.


–9–

9 Ap kembu mene re komorinabu fuk, haren komo wene yagasigin mene andem eberogo ikhe iluk futfakhagain lek enggere.


–10–

10 Hinenggi misigam iluk ogo kweang inamuligen huli warek mene andoma higili lagik, yenggerugwi suarek mene inanggweang andoma heligik u fuk.

11 Ariginigin halok he, Tuhan omame hokho mene a'nogo nen inili woginabimbik, At ebe it inebikit a'luk hat hebe mabenet hobagai nogo.


–11–

12 Heisugwi guru lagen yagaheri'lagwi mene andoma ebeti logolik furogo wanhu nogo. Nen, furogo helu asuageluk he hokho pokhorogo yanggulikhi logoino.


–12–

13 Haren hagainafuri komorinabigiluk halok he, sebelhikhi logolik yagaisa fuk. Nen haren lambisogengge wasigin halok he at ebe wa'lasigin lek,

14 we it inebe telogo fisogoin he andiat.


–13–

15 Namlogo e, hat hebelek mene asigin halok he an he nagaiyek hokho mene asigin o.

16 Nen hat hane katokhogo ugunem an nesanggo holuk he wonoget fakhikhi logogin.


–14–

17 Ap weak hilingitu mene faget hina'mage inoba fisa fuk. Hineisena Allah ba lomborogo logolik hilingiti logoino.

18 A'nogo hilingisugun halok he logogun huli andoma re fanorogo logogun, nen hinebe hineluk faget he longgo ugun lek.


–15–

19 Nagainafuri e, hinesanggo holini o! Hinebe re hebelek mene a'luk logoino. Nen hat honggwarek hebe welagen mene andoma futfikhi logoino.

20-21 It afuni ekhe lugwi-lugwi palharek mene inom, inobalagalek nenggarek mene inom andi re, hobuk inenggi lek mene asugun enggere, it hinom sebesu fuk. Hat nogo nek ikhi logogin halok he hasu tilip-tilip lagu kwelek logogin.


–16–

22 Hit hinebe lombok hineisugwi inebe weregen takhinafukwama welagep andi nen he, it inane ugunem hologo hilingiti logoino o. Nen, hinagaisawi lombok, inebe arat yaman agu halok he, hit hilingisugun mene andi inoba lombuk uageluk he fanorogo agaugwerinafi logoino o.

23 Eberogo wene yagaisagarek mene andi inom, inendawinggen kagalek mene andi inom, komorinafarek mene andi inom, futfuluk hilingitarek mene andi inom, andoma mondogat he onggo hunisuba nen he ebe wanhu aplere onggo mondok hokho.

24 Ap eisena ekhe nen fogerakhagain andi re, amlogo ungguloak kagalek mene a'luk fanorogo wenggelhugu halok inom, hebelek mene agu halok inom at endawimo leget fakhambik agaiyek asigin.

25 Andi nen he, hit hineisugwi inom hinagaisawi inomen he hit hinobaget agaugwethinafi logouwak, nen it hemi hit hinebe takhinafa mene nen he inagaiyek hinoba fikhi logouwak.


–17–

26 Namlogo e! Hendawinggen oba nen an hilingitirek mene fanorogo futfuluk, an nobabut waganogo hilingiti logoino.

27 Kiling anggwe uan meneba inailo hokhoma pagarek andi hak, hemi inobabut yanani nilik nikharek mene andi inoba logoin halok a'nogo aro.

28 Ap inenggiabisak wanharek mene nen yi mene ti mene telogo helouwogoluk hinagaisogo kagalek welagaikharek andi hak, it hemi inobabut ariginik mene nen, ap hokhorogoat palinapluk inebe weagerinafarek andi.


–18–

29 Inoba yi enggin ti enggin hikhi logolik, ”Eige,” igik, ”Nabire,” igik, wene serep agik, ineilenggen mep engge kwelagisigik, inebene kurele supukhogo hilingitu kwelek werek mene andi re sani nogo?

30 Andi re, afuni ekhe anggur amusu lugu-lugwi paluogeluk nenggarek mene andi nunggu mondok welagik, anggur amusu yinik hunik misikwe munenogo keralek mene ninggik, agarek mene andi aro.

31 Enggere anggur agai oba hat weaget habuageluk herakfisa fuk, ebe elokhe re inendawinggen wanu hak hilingi'mo re, iwak elema andoma eil amulirweak hilingitunem nunggunem he inalonggopma healik pikherek.

32 A'nogo nen ohealek hubet he hat hoba kisu aik palinaferek mene nen libilinafunem ou agarek andi hak hilinghabigin o.

33 Heilenggen yethugunem he yinik hunik mene mondok weinam agik, hendawinggen legagunem hane hesangge pesangge igik, igin.

34 Haren anggikhi logolik he an kapal ambisangma i laut agum oba andoma welagi anggikhi logogin. Nen hunggul mirogo i lugu-lugwi palharek mene naluk hilingitarek higit tung tungenggeti logogin.

35 A'nogo hilinghinafunem he, hiren yi'nogo ugun: ”Yei noatik, nelokhonggen lambuk lambakhogo noatik, aga meneat he, ou higi lego. Ninggi'nogo hilingninafa he. Nobakheindok palaga o. Eige, nogo neil mondogo. Kiba neluk asigin he, anggur amusu ekhe nele e,” iluk hinobakheindok palogo logolik hinane yugunat a'nogo ikhi logogun aro.

Lean sinn:



Sanasan