AMSAL 21 - Allah Wene Fano Wene Hupla Inane

¹ I lagarek mene Tuhan endawimo anggikherek higithogo laga logouwageluk halogo fikherek hak, at raja endawimo wenggelherek mene hilingisuageluk ogo Tuhan nenat halogo fikherek.

² Ap inonggwaregen hilingitarek mene faget he fano hilingiti lago iluk anggagarek, oba nen At Tuhan he afuni inendawimo anggagarek mene a'nogo fut fisikherek.

³ Yi mene ti mene Tuhan obaget fagarek andi re maben hak oba nen he, tiphogo hilingitik eberogo mene hilingitik agarek andi nek he, Tuhan endawimo agaiyek anggikherek mene hilingitarek.

⁴ Ap a'mage weak mene nen wene weak mene hilingiterek andi re, leget fakhikherek mene inom foget fakhikherek mene inom endawimo peterogo werek andi nen hilingiterek.

⁵ Ap inamururu mene nen hilingisigin mene iluk wene melalogo fikherek andiba re yi mene ti mene sik-pik ikherek mene waluk kwi wagarek. Nen ero hale'legengge weak-weak hilingitarek andiba re nele mene lisogo kwelabi wagaikharek.

⁶ Inangge yi mene ti mene henathigik helagarek mene andoma re weak-weak lek aga logolik he, afuni wa'lagaikharek oba andoma woginarek lili'lago.

⁷ Ap ina'mage hokho mene andi re wene melalek higithogo hilingiterek lek, nen it inonggwarek ina'mage lagaikherek andiba enggin-fenggin hokhorogo inoba fakhagarek.

⁸ Ap weak hilingiterek mene andi anggwe lagarek he yaning haning lagarek, nen ap fano mene andi re eluk fanorogo logolik kwe higithogo lagarek.

⁹ Oloba agwe wene nek palherek mene inom misi'mo werek mene andi re elo'lek hak, oba nen, inamu henambo o senggelek ambolkwe meneba unggutmo po'lima welagaikharek andi nek he mondok fano.

¹⁰ Ap weak mene nek hilingiterek mene andi re weak hilingisigin mene nek agaiyek welagarek, ap misik iluk ogo aren endawi hundik welagarek mene ekhe werek lek.

¹¹ Ap wonoget fakhikherek mene wene oba fugunem andi re it ap yi'nogo ti'nogo hilingisu elo'lek mene re at oba nen futfagarek, nen ap endawinggen kagalek mene oba komotunem he at andi ekhe inom hebelek mene agarek.

¹² Allah Mondok Tiphogo Nek hilingiterek mene a'nogo nen ap Allah onggot mene aiba hilinglagarek mene andoma re mondogat fut fisikherek. Aren he hobuk leget fisagain mene faget eberek werek.

¹³ Ap ekhe inangge lek mene nen kinoti logolik eige iluk agarek mene omanogo ane hologo lebethigi'lek logoligen, at onggwarek faget enek lebetnabuageluk kino igin halok he, lebethikhi logou lek hak.

¹⁴ Ap ina'mage were'ma inom, inobaharo were'ma inom sebelogo pelabuogeluk halok he, onggo we linglong wogisugu nogo.

¹⁵ Higithogo hilingitarek mene andi nek hilingirik lagu halok he, andiba ap fano hilingitarek mene inagaiyek hagarek, oba nen ap inobaharo mene re nit ninabok pali'lagwi iluk hambuk haluk welagaikharek lek.

¹⁶ Ap inelu mene nen inebe fano welagaikharek mene a'nogo higithogo mu'luk lagu lek halok he, eberogo nen at ebe kweangma afuni wa'la'luk lagaikharek oba lili'lago.

¹⁷ Ap inagaiyekhogo welagaikharek mene andoma re hobuk ineilmo legasigin, nen it ap anggur inom amusu werek engge faget inom enek inagaiyegen hilingirik nikharek mene andoma re hobuk inenggi werek asugun lek.

¹⁸ Afuni Tuhan nen wene inoba fagain andi re ap fano hilingitarek mene inoba re fuk, athe it ap weak hilingitarek mene andi enggin hokhorogo hogoin.

¹⁹ O leimo welagaikharek andi re fano hak oba nen, ap agwe ane nek sagal-sagal ikhi logolik wene palhu mondok werek mene inom misi'mo welagaikharek andi nek he mondok weak.

²⁰ Ap obabut hebelek mene re inangge hokhorogo agunem inenggi werek welagaikharek, oba nen ap kembu mene re angge mondok legabeti logolik werek.

²¹ Ap ekhe nen tiphogo hilingitarek mene inom, inendawi hundik hilingitarek mene inom herari'lago halok he, inendawimo inagaiyekhogo welagaikharek mene inom, legeisogo fisagarek mene inom, inebe umur uanhogo welagaikharek mene inom helili'lago.

²² Ap hibil-hebelhogo hilingitarek mene nen he o kota ap tentara mondok inaninirogo kagalek werek oba nen ogore pin ku hagat, aren he leget pa'leget inendawinggen yamukhogo waganek mene omanogo langgu-langgarogo pelabu hagat.

²³ Ap ekhe nen enggin mene noba asi nogoluk halok he, aneba fanorogo ogalikhi logouwak.

²⁴ Ap winik wonok ikhi logolik endawimo leget fakhikherek mene nen he ane onggo-onggo igik, afuni weagerinabu hak mene nek igik, ikherek.

²⁵ Ap korek mene yabu hilingisu abit mene andi re, at endawimo amolo mene omanogo nen ebe warogo fakhikherek.

²⁶ Linggene hundik-handik he at endawimo amolo anggikherek mene omanogo faget wenggelhu mondok welagarek. Hebekhogo re, ap higithogo hilingiterek mene nen he angge yi mene ti mene palfigi'lek wogisikherek.

²⁷ Tuhan he afuni weak hilingitarek mene nen At obaget fagarek mene andi re apsiri inoba fikherek, ap andi endawimo nen weagasuak anggikhi logolik hilingisigin halok andi re ebenagaik.

²⁸ Ap lalinaferek mene nen fageterek mene andi re eberogoat iluk angga lek hak, meneat he, afuni it ekhe yi'nogo ti'nogo inelu mene nen agarek mene halok enek he elok futfuluk wanu hak.

²⁹ Ap higithogo hilingiterek mene re onggwarek ebeba hilingik mene elu werek, ap ina'mage weak mene re inelokheba ambumsek.

³⁰ Inelu agarek mene inom, inungguloak kagalek mene inom, inobabut hebelek mene inom, andoma re Tuhan inom eilhogo logogun halok he andoma ekhe logogin mondok lek.

³¹ Aben weim yabuogeluk sige sikhe fougetfuluk inangge kuda hokhorogo fougerasugun meneba nen ogore, inomame agarek mene andi re we At Tuhan nen enek omamet fisikherek.