AMSAL 2 - Allah Wene Fano Wene Hupla Inane

Endawinggen kagalek mene fano mene fakhaluk welagarek wene

¹ Namlogo e, an nen wene yagaheti lagi mene andoma helikhi logolik he, komo yagaheti lagi mene andoma eberek mondok logoino o.

² Inendawi wenggelagarek mene andoma eberek logolik he, furogo helu asuageluk ninghogo herati logoino.

³ Namlogo e, hat he inungguloa'ma uanhogo wenggelhagarek mene andi iese asigin iluk homamerogoat hilingiti logolik he, futfuluk hilingitarek mene andi kinoti logoino.

⁴ Andi mene faget he emas heratarek higit heratik, nen inangge onggo hokho mene were'ma mu'luk lagaikharek higit murok lagik, ikhi logoino.

⁵ A'nogo hilingisigin oba re, haren Tuhan faget inailorogo welagaikharek mene andi helu agik, nen Allah ebe welagarek mene andi helu agik igin o.

⁶ At Tuhan nenat inendawinggen kagalek mene wogisikherek, nen Arenat afuni inelu agarek mene inom, wenggelharek mene inom wogisikherek.

⁷ Afuni inobabut weak hilingiti'lek fanorogo welagaikharek mene inoba re, leberisigik, a'ma ferinarek welagik, ikherek.

⁸ Tuhan nen he afuni higithogo hilingitarek mene ferinarek welagik, nen At oba inendawi hundik welagaikharek mene awe a'ma ferinarek welagik, ikherek.

⁹ Nen namlogo haren ogo an nen ikhi lagi mene yi higithogo hilingisigin halok he, hat hobuk eberogo wene inom, heirogo hilingitarek mene inom, higithogo hilingitarek mene inom, helu asigin o. Nen, ekhere hat heluk hobuk fanorogo logogin mene faget ogo helu asigin aro.

¹⁰ Hat hebe mondok hebelek mene asimbik, helu asigin mene andi nen he hendawimo agaiyek mene hilinghobagakhi logogin.

¹¹ Helurek logogin mene andi inom, nen hawenggelek logogin mene andi inomen he, hat hebe a'ma fetharek logogin,

¹² a'nogo fetharek logolik he, afuni weak mondok hilingitarek mene andoma hinom sebetep hanogoluk ogalhobagagik, inambeba weak mene nek agarek mene andomaba nen eil uanhogo hilinghobagagik, ikhi logogin.

¹³ It he fanorogo welagaikharek mene andi murok lagi'lek mumkwe lagaikharek mene andi inom, weak hokhorogo hilingitarek mene andi inom wenakhaluk he,

¹⁴ iren weak hilingitarek mene andi faget inonggwaregen inagaiyek anggagarek.

¹⁵ It he kwe pikhithogo lagi'lek kwanirogo nek hilingirik lagaikharek.

¹⁶ Hat he an namlogo welagenma re, he ekhe pailak hilingiterek mene nen ane amusu palogo hat hendawinggen wanigiluk hilingisigin mene andi re wanu fugo.

¹⁷ He andi re agun oba tiphogo welagi'legengge, Allah oba wene wate mene a'nogo onggoragasik ilingiri'lago andi.

¹⁸ Haren he andi aiba lagain halok he wa'lagaikharek oba lagain andi o, andoma lagaikharek andi re kweangma afuni wa'la'luk lagaikharek oba omanogo higirat.

¹⁹ Ap he andi ambit lagaikharek mene re, sugulogo kwe ineluk welagaikharek meneba wesugun mene ekhe werek mondok lego.

²⁰ A'nogo hilingik enggere, namlogo e, hat he ap higithogo hilingitarek mene inobabut wanimbik he, Allah endawimo anggikherek mene higithogo hilingiti logolik, logogin fano o.

²¹ Ap Allah endawimo anggikherek mene higithogo hilingitarek mene halok he, ap andi endawinggen mondok fano mene logogin, it andi mene re o kweang Tuhan nen wene warisasikheba omanogo logogun.

²² Oba nen he ap ina'mageba hilingitarek mene inom, weak hilingitarek mene inom he, it inanggweang oba andoma nen, engga wusa yogolhi logolik hugisagarek andi higit, Allah nen hugisa wulibigin o.