AMSAL 16 - Allah Wene Fano Wene Hupla Inane

¹ Afuni nen wene hilingisugun mene faget melalogo fagarek, oba nen he ebe hilingisuageluk he Allah nen enek tekhogo wogisikherek.

² Ap inebe lombok inobabut hilingitarek mene andi re inonggwaregen kumut hikhi logolik an fano hilingiti lagi iluk anggagarek, oba nen he Tuhan nenat inendawimo anggili'lagwi mene a'nogo futfisikherek.

³ Wene hilingisugun iluk melalhi lagep mene andoma mondogat waganogo Tuhan enggiba fogoin halok he, hiren ambisangma higithogo nek hilingiti logogun.

⁴ Yi aple ti aple Tuhan nen hilingiterek andi re arogo endawimo anggikherek mene weregen hilingiterek, nen, ap weak mene inendawimo anggagarek mene andoma re leget fisikherek mene nek wenggelharek.

⁵ Ap wonoget fakhagarek mene andoma inebe mondogat he Tuhan nen abit anggikherek, it inoba wene were'ma re inili woginabigin lek.

⁶ Ap Allah ba nek eberek werek mene halok he inaweak legaphogo fisagain, nen ap inendawinggen Tuhan oba tibetfuluk werek mene re weak mene anggele'ma nen inagap telogo fisagain.

⁷ Hiren Tuhan endawimo agaiyek mene hilingiti logogun halok he, hinom weim palek mene andoma re hinagaila'lak aga logogun.

⁸ Higithogo hulingisugun oba ambisangma endebengge helogoin andi fano, oba nen tiphogo hilingiti'legengge nen ambisangma hokhorogo helogoin andi nek he mondok weak.

⁹ Afuni nen he hilingisugun mene faget ebet-ebet hilingitarek, oba nen, it hilingirik logoin kwere At Tuhan nen enek sikhiphogo ikherek.

¹⁰ Raja omame re Allah nen wogoterek, ma re aren wene tegeti logolik he weakhogo tegeterek lek.

¹¹ Tuhan nen anggikhi logolik he yi mene ti mene onggo higithogo palhik hunitik hilingiti logoilep iluk anggikherek, nen ilirengge kilo ba ogo, timbangan oba ogo, higithogo nek walhikhi logoilep anggikheregat.

¹² Raja nen he weakhogo hilingitarek mene andi re abit anggikherek, aren ferinarek were'ma higithogo hilingitarek andiba omamerogo mendek welagarek.

¹³ Wene eberogo wene fakhogo agarek mene andi re at raja nen agaiyek anggikherek, aren ap weneane higithogo ikherek mene andiba re endawi hundik welagarek.

¹⁴ Raja a'mage lagaikherek mene andi re wa'lasuageluk unggum inoba fagarek higit, nen ap hebelek mene nen he wene andi elok sebelogo leget fou hak.

¹⁵ O hibi were'ma hena sebelogo meiso pelabi wagarek higit, at raja endawi fano nen ineluk fano welagaikharek mene hilingisogo fisikherek.

¹⁶ Emas helagarek mene andi re we endep hak oba nen, inendawinggen kagalek mene helagarek andi nek he mondok fano. Perak helagarek mene andi re we endep hak oba nen, inelu agarek mene helagarek andi nek he mondok esin.

¹⁷ Ap higithogo hilingiterek mene re weak mene agaiseraterek, ap ineluk werek mene faget fut fikherek mene andi re at ebe eluk a'nogo halogo fakhikherek.

¹⁸ Wonoget fakhagarek oba re ambisangma al perelinaferek, nen foget fakhagarek oba re ambisangma re talorogo pagarek.

¹⁹ Ap wonoget fakhagarek mene omanogo muginarek laga logolik inangge inenggi abisak wanharek mene omanogo inom nilik nikharek andi weak. Oba nen enggi lek logolik endawinggen sebel fakhaluk welagarek andi nek he mondok fano.

²⁰ Wene hat hoba yagahetu mene andoma fanorogo futfikhi logogin halok he fano mene andoma hat hoba aga logogin. Tuhan oba hendawinggen tibet fuluk logogin halok he hat hebe mondok fanorogo hagaiyekhogo logogin.

²¹ Ap hebelek mene re ungguloak kagalek andiba afuni inelu agarek, ane ugunem he inendawimo waluk at ane ikherek mene faget eberogo iluk fut fagarek.

²² Hebelogo hilingitarek mene andi re ap inelu mene nen ineluk fano welagaikharek mene erore andi aro, ap morue mene nen enggin-fenggin hagarek andi re inonggwarek kembu nen.

²³ Ap inungguloak kagalek mene nen inane ugunem he higithogo nek agarek, nen it inane agarek mene a'nogo re inendawimo nen eberogoat mene iluk anggagarek

²⁴ Inane liokhogo agarek mene andi re kin amusu enduk mit-mirengge andi higit werek, enduk mit-mirengge andiba inebe fano hilinginaferek.

²⁵ Nen kwe ekhe yethugunem he higithogo lagaikharek mene hangge werek, oba nen kwe andi elugunmo re wa'lagaikharek oba lagaikharek.

²⁶ Nunggungge nenggarek mene andi nen inomamerogo hilingisuageluk hilinginaferek, afuni ekhe nen inalabut andi fagerat ninghogo hilingitarek.

²⁷ Ap weak hilingitarek mene nen he inagaila'lak ekhe weaget fisouwogeluk ninghogo hilingitarek. Inane ugunem he endu aik hangge mondok weak.

²⁸ Ap inobabut ina'mi'mik weak andiba yei wene palharek, Inagaila'lak inom fano meneba nen inanggomorogo inabok palharek andiba minggil fisagarek.

²⁹ Ap obaharo mondok weak mene andi nen he, agaila'lak inoba eranen wene lalinaferek, a'nogo lalinafaresik woginarek inamelmel oba omanogo fisa lagaikharek.

³⁰ It ap ineil hombut watik, inoba heanerogo endo mumungutik agarek mene andi inoba re hinafe hebelogo logoino. It andi re wene weak mene inendawimo kagalogo fisogo logolik hilingisugun enggere.

³¹ Ap higithogo hilingitarek mene andi re we endawi hundigen wogotarek oba eluk uanhogo welagarek, inesi helel wiliferek andi onggore makota habul habalengge mene helogoin.

³² Inomame welagaikharek andi re endep harek hak oba nen, weak-weak wenagisagarek lek andi nek he mondok fano. Inomameba o kota halogo fagarek andi we harek hak oba nen inonggwarek inebe halagarek mene andi nek he mondok fano.

³³ Furogo inelu asuageluk he afuni nen helebenggen oba walhugunem inelu agarek, oba nen he onggo furogo yagaisagarek mene re we Tuhan amu nenat yagaisikherek.