AMSAL 12 - Allah Wene Fano Wene Hupla Inane

¹ Ap ekhe inelu agarek mene faget agaiyek werek mene andi re, komorogo wenagetu halok he agaiyek anggikherek. oba nen he ap ekhe komotu mene andoma abit anggugu halok he at andi ebe kembu mene werek.

² Ap fano hilingitarek mene inobaget he Tuhan nen agaiyek anggikherek, oba nen he ap weak mene faget awene melalherek mene halok he weak onggoat helagain.

³ Ap misik ekhe aweak hilingiterek mene a'nogoba femhogo welagarek mene ekhe werek lek, oba nen he ap ekhe eberogo anggikherek mene re taloti'lek abolo'lek logogin.

⁴ Ap agwe fano mene andi re agun oba wutunem endawinggen oba hundik logolik agaiyek oba welagarek, oba nen, he ekhe nen agun enggali asu mene hilingitu halok, he andi re ou inoagele'ma kuluk hundugurogo lit hikherek hak agun oba a'nogo hilingfikherek.

⁵ Ap higithogo hilingitarek mene re wene fano meneat wenggelharek, nen ap obabut weak mene nen he wene eranhogo wene nek wenggelhu mondok welagarek.

⁶ Ap weak hilingitarek mene inane ugunem he mondok sebelogo nek fagarek, nen, ap higithogo hilingiri'lagwi mene inane ugunem he inagap telagarek.

⁷ Ap weak hilingitarek mene re pile pimbik inobalik legengge wa'lasugun, oba nen ap eberogo hilingitarek mene re iren tagomangge mene re femhogo ineluk mondok mondogat logogun.

⁸ Ap ekhe at hilingiterek mene faget legeisogo fagarek, nen ap ekhe inali'no weak wenagisagarek mene andi re iren ogo li'norogo fisagaregat.

⁹ Ap we mene logolik ineabu helikhi logogun andi mondok fano, ap hokho mene mendek welago salek logolik inamburu nunggu mene lek kwelek hilingiti logogun andi nek he mondok enggin ambik.

¹⁰ Ap fano mene nen at anggo takhikherek mene furogo halhi logogin, oba nen ap weak mene nen he weagerogo fikhi logogin.

¹¹ Ap yabu inenggi puksek mene re ineabu inomamerogo helagarek andi nen inamburu nenggarek mene hokhorogo welagarek, oba nen he ap wene ebe lek kwelek linggene alomarogo weat welagaikharek mene andoma re morue mene nen hilingitarek.

¹² It ap weak mene andi re it ekhe weak hilingitu mene inoba nen saburogoin iluk hilingitarek, oba nen he ap fano mene halok he e enggen iterek agayo higit werek.

¹³ Ap weak mene andoma inane weak agarek oba inonggwarek yebet fakhagarek, nen ap fano hilingitarek mene re yi enggin-ti enggin oba nen lologo wulifarek.

¹⁴ Afuni inebe lombok it hilingitarek mene ambisangma onggo higithogo nek helagarek, nen inebe lombok inenggi yabu hilingituba nek onggo higithogo wogisagarek.

¹⁵ Ap kembu mene nen he an weak hilingiti lagi iluk anggikherek lek, oba nen he ap hebelek mene nen he komo wene fanorogo holfuluk hilingiterek.

¹⁶ Ap kembu mene nen ap inane oba ugunem a'mage lagaluk, aremnogoat at endawimo yelik welagarek mene a'nogo wulak fisa wagarek, oba nen he it hebelogo hilingitarek mene nen he afuni nen weak peakhogo hilinginafu kwelek oba nen inafe wonget fisaluk werek.

¹⁷ Ap inane eberogo mene nek agarek oba re tiphogo hilingitarek mene a'nogo omameratarek, nen ineraren wene lalogo agarek obare lalinafarek mene a'nogo legeisogo fagarek.

¹⁸ Ap inane we yugunat agarek oba re weim en semele kuluthugunem hak afuni inendawimo wat fisagarek, inane fano mene agarek andi re obat ou inoba were'ma fanorinaferek higit werek.

¹⁹ Ineranen wene agarek mene re we ferekhogo nek weinam agarek, oba nen eberogo wene andi re mondok-mondok logogin.

²⁰ Ap wene weak mene hilingisugun iluk hilingitarek mene andi re wene higithogo hilingitarek mene re inabit welagaikharek, ap fano mene hilingi'le e. iluk walhikherek mene halok he hobuk agaiyegasigin.

²¹ Ap fano hilingitarek mene re enggin ekhe oba asigin mondok lek, ap weak hilingitarek mene andi hundigat oba weak mene nek aga logogin.

²² Tuhan he ap ineranen wene lalinafarek mene andi abit inoba fikherek, oba nen he Aren afuni higithogo hilingitarek mene re endawirinaferek.

²³ Ap hebelek mene nen he at elu mene omanogo leget fakhigi'lek sebel fakhikherek, ap morue mene nen he onggwarek hilingik aple omanogo faget tindelik lagarek.

²⁴ Yabu inomamerogo hilingitarek oba ap inenggi werek mene agaikharek, yabu korogo hilingitarek mene halok ap inamingmingengge mene agaikharek.

²⁵ Inendawinggen fitu werek halok inagaiyek mene a'nogo longgoikherek, oba nen he inane liokhogo agarek oba re inendawimo legeisogo fisagarek.

²⁶ Ap fano hilingiterek mene re it ekhe o horok-horokwe welagaikharek mene omanogo nen fanot fisagarek, ap weak hilingitarek mene re inobabut hilingitarek oba nonghong agarek.

²⁷ Inaberali weak mene re inendawimo anggugu mene a'nogo hela lek hak, ap yabu inomamerogo hilingitarek oba re ambisangma inangge hokhorogo helagarek.

²⁸ Ap ekhe kwe fanokwe murok lili'lago halok he, at andi eluk fano logogin, ap ekhe kwe weakwe murok lili'lago halok he, wa'lagaikharek oba lili'lago.