AMSAL 11 - Allah Wene Fano Wene Hupla Inane

¹ At Tuhan he ap ilirengge taganhogo walhagarek mene andi re abit anggikherek, oba nen ap ilirengge higithogo walhagarek mene nek he Aren agaiyek anggikherek.

² Afuni wonoget fakhagarek mene andi re inenu weagerogo fisagarek, afuni inendawinggen sebelek mene andi re hebelogo nek hilingitarek.

³ Afuni fano nek hilingitarek mene andi re inobabut fano hilingitarek andiba woginarek nikherek, oba nen afuni lalinafarek mene andi re lalek wene nek lalinaferek andi nen weagerogo fakhagarek.

⁴ Wa'lasugun mene arat horogasi wagunem inangge yi mene ti mene logogin mene mondogat legasigin, hendawinggen fano higithogo hilingiti logogin andiba nek he hagap telek logogin.

⁵ Afuni fano hilingitarek mene andi re inobabut fano hilingisugun andi nen it kwe logoin kwe fano lioksek logogin, meneat he, afuni weak hilingitarek mene andi re onggwarek weaget fagain kwe a'nogo faget hilingirik lagarek andi.

⁶ Afuni higithogo hilingitarek mene re at higithogo hilingisigin andi nen agap teligin, oba nen afuni lalinafarek mene re inendawinggen ninggeresik hilingitarek a'nogoba weagerogo fisagain.

⁷ Afuni weak hilingitarek mene andi ebe wa'laga logolik he endawimo eberek werek mene omanogo inomat wa'lasigin, inonggwarek inomameba nek tipsek logogun halok he ambisangma ekhe logogin lek.

⁸ Ap fano hilingitarek mene andi re inoba nonghonghogo hilingi'mo telogo fisikherek, afuni weak hilingitarek mene andi re yi enggin ti enggin inoba agu mondok welagaikharek.

⁹ Afuni weak hilingitarek mene andi inane ugunem he inagaila'lak alomarogo fisagarek, oba nen afuni fano hilingitarek mene andi re inendawinggen kagalek andi nen telogo fisikherek.

¹⁰ Afuni higithogo hilingitarek mene angge fano mene ekhe helikhe halok, it afuni o kota logogun mene nen abok wialogo fogoin, nen it weak hilingitarek mene wa'lasugun halok he, afuni inagaiyegen inanggilugesugun.

¹¹ Afuni higithogo hilingitarek mene nen fano mene helagarek andiba re o kota wialogo fagarek, oba nen he afuni weak hilingitarek mene inaneba re weak hilingisogo fagarek.

¹² Afuni ekhe nen it ekhe inoba li'norinafe halok he andi re kembu awenggelek lek mene nen hilingite, oba nen afuni inendawimo nen wenggel fuluk hilingitarek mene nen halok he, inane igi'lek alokhogo welagaikharek.

¹³ Ap ekhe wene inane iluk waluk faget fagerik lagaikharek mene nen he wene hinago mene iluk ekhe fisogo welagaikharek lek, oba nen ap ekhe eberogo hilingiterek mene nen halok he wene endawimo hinago logolik werek.

¹⁴ Afuni inogogwi kaindek melalinafu mene lek halok he afuni inunggulenu lombok weagasu hak, oba nen he it wene komorinafu mene inebe hokhorogo logogun halok he inagap telek welagaikharek.

¹⁵ Ap amu mene ekhe inombalegengge faget, an onggo fagain iluk wene waten halok he, andiba weaget habigin mene hoba wesuageluk hilingisigin andi, fano liokhogo logowogeluk halok he wene hinom a'nogo wati'lek logogun fano.

¹⁶ He ekhe endawinggen fano mene re afuni nen legeisogo fagarek, oba nen he afuni sebelogo fisagarek mene andi re angge yi mene ti mene enggi werek mene hilinglasigin.

¹⁷ Afuni inendawinggen sebelfakhaluk hilingitarek mene andi re inonggwarek fanoabet fakhagarek, afuni ina'mage weak mene andi re weak mene hokhorogo andogorogo fakhagarek.

¹⁸ Afuni ina'mage weak mene ambisangma tiphogo helagarek mene andi re alomarogo hangge, oba nen he, sa nen eberogo mene hilingite halok he ambisangma onggo femhogo logogin mene helili'lagwi.

¹⁹ Ap sa nen fano hilingitarek mene andi ninghogo fisogo logolik fano mene nek hilingirik lagu halok he, eluk fanorogo logogin, Ap ekhe a'mageba weak mene nek hilingitu halok he ap andi wa'lagaikharek meneba lili'lago.

²⁰ Tuhan nen afuni ina'mage weak mene andi abit inoba fikherek, oba nen afuni ineluk logolik weak hilingiti'lek welagaikharek mene andi re endawi hundik werek.

²¹ Afuni ina'mage hokho mene andi re ibi-eberogo nenat unggum helogoin, oba nen afuni fano hilingitarek mene andi re inagap telogoin.

²² He ekhe endawinggen wenggelek lek mene nen ebene pugun eterek mene andoma re inesanggomangge emas mene wam ambisangma kwelakfugunem hak hilingik.

²³ Afuni fano hilingitarek mene nen inendawimo anggagarek mene andi re ambisangma fano mene nek hilinglagarek, oba nen afuni ina'mage weak mene nen he wene palharek mene andi nek eberek werek.

²⁴ Afuni ekhe inobabut wogisugu mene faget inagaiyek welagaikharek mene andi re, ekhe inomat inenggi werek aga logolik werek, oba nen it ekhe puk hikhi logolik werek mene andi re ebenagaik inenggi lek-lek kwikherek.

²⁵ Ap ekhe angge hokhorogo wogisikhi logogin halok, at angge yi mene ti mene ekhe inomat kabok ikhi logogin, ap ekhe nen it ekhe leberisugu mene agaiyek werek halok, arogo lebethogoin halok fano.

²⁶ Ap ekhe nen angge enggen ugu palogo kabogesigin halok afuni nen homan fogoin, oba nen ap ekhe nen enggen ugu omanogo onggo wanigin halok he ap a'nogo foget fikhi logogun.

²⁷ Ap ekhe nen omamerogo fano hilingitu halok afuni inagaiyek oba fikhi logogun, ap ekhe a'mageba hilingirik laga halok enggin fenggin oba asigin.

²⁸ Ap ekhe angge yi mene ti mene logogin meneba endawinggen himbirik logogin halok, engga puk mene lologo pikherek hak pigin ap eberogo anggagarek mene re e asimit ket wuliferek mene hak logogin.

²⁹ Ap ekhe nen it ekhe inom horokhogo mene a'mageba weaget fisikhe halok he at mene angge omanogo mondogat legasigin, ap kembu mene re hebelek mene amingmingengge a'luk logogin.

³⁰ Ap fano hilingitarek mene re ineluk fanorogo halogo fakhaluk logogun, ap hebelek mene ombo'ne re ekhe inomat hokho aga logogun.

³¹ It afuni eberogo anggararek mene o kweangma yoma nen onggo helugu halok he, it ina'mageba hilingitarek mene andi inom, weak hilingitarek mene andi inom eberogo nenat inaweak onggo hokhorogo helogoin aro.