AMSAL 10 - Allah Wene Fano Wene Hupla Inane

Salomo nen komo wene isikhe wene

¹ Salomo nen komo wene isikhe mene re yi: Omalik obabut hebelogo hilingiterek mene andi re eisena nen agaiyek oba fikherek, nen omalik ekhe obabut kemburogo hilingiterek mene andi re agaisa endawimo ouet fikherek.

² Afuni inangge lalhigik helaluk enggi werek agarek mene andiba ambisangma fano mene hela lek hak, oba nen he it higithogo hilingitarek mene andiba inagap telagarek.

³ Tuhan nen afuni fano hilingitarek mene nelerogo logouwageluk oboget isikherek lek, oba nen he ap weak hilingitarek mene inoba nek he iren ti mene helogoin iluk anggagarek mene omanogo hilingisinogo iluk Aren inanggwe palherek.

⁴ Ap inaberali mene andi re inenggi lekhogo nek logogun, nen ap inomamerogo hilingitarek mene re inenggi werekhogo logogun.

⁵ Ap hebelogo hilingitarek mene re enggen palhu sambul a'nogo andogorogo fakhagarek, oba nen ap nogo nek agarek mene re enggen taganhu sambul a'nogo re inonggwarek inenggalirogo fakhagarek.

⁶ Ap fano mene andi angge fano mene hilingitu mene hokhorogo helikherek, oba nen ap inobabut weak hilingitarek mene andi re inaneba nen inendawimo werek mene a'nogo sebelhikhi logolik werek.

⁷ Ap fano mene re inenu fanot fisugunem inoba eberek werek oba nen, ap weak hilingitarek mene re inoba weak weagat inonggot agarek.

⁸ Ap hebelek mene nen he komo wene agaiyekhogo helikherek, nen ap ane hebelogo ikherek lek mene andi re, ambisangma nonghong ikherek.

⁹ Ap higithogo hilingiterek mene re ebe ailo legengge werek, oba nen ap labelogo hilingiterek mene re hobuk weinam agarek.

¹⁰ Ap ekhe nen eil hombut inoate halok he, hobuk ambisangma wene oba asigin, nen ap ekhe ane weak-beak igin halok ambisangma ebe pigin.

¹¹ Ap fano mene inambeba nen inane makhugunem he ineluk inagaiyekhogo welagaikharek mene faget wulafarek, oba nen ap weak mene inambelema nen wene agarek mene andoma re inendawimo wene weak mene hinago logolik agarek.

¹² Inabit inaferek mene andiba re ap inom yei wene palharek andi, nen inendawi hundik anggikhi logolik halok he, weak mene omanogo mondogat sagalogo legetfisagarek.

¹³ Ap ekhe wenggelhu mene faget siserogo wenggelhagarek mene andi inane ugunem he wene higithogo nek agarek, oba nen ap furogo wenggelharek lek mene andire lambisogengge inoasumo fano.

¹⁴ Ap hebelek mene nen he wene elu agarek mene omanogo fanorogo fakhaluk werek, nen, ap kembu mene andi re ane ikherek oba onggwaregen weaget fakhikherek.

¹⁵ Ap angge hokhorogo werek mene andi re angge yi mene ti mene omanogo a'ma along palogo fakhaluk werek, oba nen inangge lek andi nen he it inenggi lek mene andi weagerinafarek.

¹⁶ Ap fano hilingitarek mene andi ambisangma re ineluk fano welagaikharek mene eise agaikharek, oba nen ap weak hilingitarek mene andi ambisangma re weak hokhorogo hilingitarek.

¹⁷ Ap ekhe nen komo wene fanorogo helikhi logogin halok he eluk fano agaiyekhogo logogin, oba nen, ap ekhe weak hilingitu mene omanogo fagetu aple abit mene andi re enggin mene oba horogasi wagasik werek.

¹⁸ Ap ekhe nen abit anggikherek mene andi endawimo hinago werek halok he, ap lalinaferek menere ebe andi aro, ap ekhe ane nen lalogo sagarik laga halok he ap andi kembu mene werek.

¹⁹ Inane hokhorogo matu halok he weak ekhe inomat hilinglasu hak, oba nen ap ekhe nen amelinggen eil warikhe halok he ap andi endawinggen hebelek mene werek.

²⁰ Ap fano mene nen ane ikherek mene andi re perak ebe mene inom higit, ap weak mene nen inendawimo wenggelharek mene andoma we alomarogo nek wenggelharek.

²¹ Ap fano mene nen inane agarek mene andoma re afuni hokhorogo fanot fisugu mene faget agarek, ap kembu mene nen lugulugwi kanggorogo nek matarek mene andoma re inonggwarek inebeat waragarek.

²² Tuhan nen fanot fisugunem afuni inenggi werek mene hilinglagaikharek, yabu inomamerogo hilingisugun andiba inangge ekhe inom hilinglasumo re, elo'lek.

²³ Ap kembu mene re weak hilingitu mene faget inagaiyek welagaikharek, oba nen ap hebelek mene re inendawinggen wenggelagarek mene faget inagaiyek oba heratarek.

²⁴ Ap higithogo hilingiterek mene re inendawimo inamolo anggagarek mene higithogoat helogoin, oba nen he, ap ina'mage weak mene andi re mondok inailo nen inamelmel eterek mene omanogo helogoin.

²⁵ Sogoi sielu funha wagunem he ap ina'mage weak mene omanogo legetfisikherek, oba nen ap higithogo hilingitarek menere hambukhogo mondok-mondok logogun.

²⁶ Ap alisogo weak mene andi re miminginabu fuk, it ariginik mene andi re inoba wusu fukhogo nek hilingiri'lagwi, it andi nen hilingitunem he, enduk arigengge nunggunem inaikliratik, nen endu so'le nen ineil arik kweteratik, ikherek higit hilingitarek.

²⁷ Haren Tuhan esinet fuluk legeisogo fikhi logogin halok he hebe umur uanhogo logogin, oba nen ap weak hilingitarek mene re at ebe umur we horogat werek kwelek wa'lasigin.

²⁸ Ap fano mene re endawinggen eberek logogin a'nogoba ambisangma tip ugunem agaiyek asigin, Ap ina'mage weak mene re inendawimo eberek logogun mene a'nogo we alomarogo hilinglasumo legasigin.

²⁹ At Tuhan he ap higithogo hilingitarek mene re awe a'ma ferinarek werek, oba nen ap weak hilingitarek mene re leget fisikherek.

³⁰ Ap inobabut higithogo nek hilingiterek mene re hobuk ineluk fano liokhogo logogun, oba nen he, ap ina'mage weak mene re it inanggweang wogisikheba andoma logogun mondok lek.

³¹ Ap fano hilingitarek mene inane ugunem he inendawimo kagalogo agarek, oba nen it ap ina'mage weak mene andi re inambe to'mot fisagain.

³² Ap fano mene inane ugunem he inendawimo healogo nek agarek, oba nen ap ina'mage weak mene inane ugunem he inendawimo ouet fisagarek.