AMSAL 1 - Allah Wene Fano Wene Hupla Inane

Yi wene ti wene elu mondok mene nen komorinafarek wene

¹ At Salomo nen, ”Ebe yi'nogo faget igi,” iluk isikhe wene inoe raja a'nogo nen ikhi lagaikhe mene re yi.

² Wene ebe yi'nogo iluk, inendawinggen kagalek welagaikharek andi inom, inobabut higithogo hilingitarek andi inom, yi wene ti wene faget inane katokhogo ugunem elonggoma hinago mene futfagarek andi inom, fanorogo futfikhi logouwak anggasikhesik yagaisasikhe.

³ Wene a'nogo hilingiti logogun mene faget isikhe andi re, afuni inobabut higithogo hilingitarek andi inom, inendawinggen kagalek welagaikharek andi inom, wene heirogo tegetarek andi inom, inane eberogo wene agarek andi inom, fanorogo inelu asuak anggasikhesik komorinafikhe.

⁴ A'nogo yagaisugunem it afuni ekhe inendawinggen kagalek lek mene andoma fanorogo futfuluk inendawinggen kagalek mene hilinglagik, ap alage mene inom, helime tugum mene inom, komorinafunem yi wene ti wene inelu mondok agik, inaluendegen wenggelharek hakhogo wenggelhik ikhi logouwageluk, isikhe andi.

⁵ Komo wene andomaba re, it inendawinggen kagalek mene ogore ekhe inomat inelu agik, nen it ap sekolah hilingitu mene ogore ekhe inom ineluet fisigik, ikhi logogin.

⁶ A'nogo yanggulugun halok he, iren wene elonggoma hinago werek mene omanogo ebe yi'nogo faget iluk inelu agik, nen it afuni inendawinggen kagalek mene nen agarek mene omanogo inelu agik, wene onggo yaganisoageluk heinok wanhunem elok yagaisigik, ikhi logogun.

Ap alage mene faget komorinafikhe wene

⁷ Nen ninelu mondok asuageluk halok, attak-attak he, hineisena Tuhan along anggikhi logolik, At oba nek hinailo anggikhi logoino o. Afuni kembu mene re, inendawinggen kagalek mene andi inabit welagik, yagaisugunem inabit mondok welagik agarek andi.

⁸ Nagainafuri e, hit hineisugwi hinagaisawi inomen komothinafu mene andoma fanorogo futfikhi logoino o.

⁹ Iren yagahisugu mene andoma re, hinalilingge higit hinunggulkwe pugetik, eile higit hinalonggopma itik ugunogo.

¹⁰ Nagainafuri e. Afuni weak hilingitarek mene nen, ”Yi'nogo hilingisuok,” iluk hinendawimo kagalhu halok he, inane hologo hilingiti logou fuk.

¹¹ It andi nen ambi, yi'nogo yagahisogoinat: ”Nit ap ekhe murok lambik he ebe libi'labakhogo wasi louwogen we'ni. Nen niren we men-menengge lambik he, it ap weak hilingiri'lagwi lek mene inoasi louwogen we'ni.

¹² Yogondak it ineluk logolik fano inagaiyekhogo werek meneat he, hobuk it inebe mondok wa'lasu hak keik wanggo logouwageluk weagerinabuogo.

¹³ Nit ninaiba it inangge telogoin mene andoma nen peterogo fakhouwogen he, it inangge onggo hokho mene andoma nit telouwogo.

¹⁴ Niren yi mene ti mene hinasugun mene andoma ninom higithogo sumburogo helogoin enggere, ninom louwogen we'ni o,” iluk yagahisogoin aro.

¹⁵ A'nogo yagahisogoin enggere nagainafuri e! Afuni a'nogo yagahisogoin mene andi hinom he inane hologo hilingiti'lek, inagaiserati logoino o.

¹⁶ It he weak hilingiti'legengge yamukhogo logou re inabit. Iren anggagarek he weak-weak ferekhogo nek inoa'lo anggagarek.

¹⁷ Sueba nen ogore eilenggen werek kwelek hele foumo nen he agaiserogo kwigi'lek kamo u hak, andi nen he alomarogo fouhago.

¹⁸ Meneat he, it afuni inobabut weak enek hilingitarek mene andi re sue heleba ke'nok ikherek andi hak, inobabut a'nogo hilingitarek andibaat inebe inonggwaregen alomat lakhogoin o.

¹⁹ Eberogo nenat, ap inangge inenggi abisak hinakhugu logolik ina'mageba herarik nikharek mene andoma re, it inonggwarek inebeat onggo palogoin o.

Afuni nen it ekhe komorinabu hak, inendawinggen kagalek welagaikharek mene andi nen komorinafarek iluk isikhe wene

²⁰ Yago, endawinggen kagalegen ebekhekwe wolinafu mene inom, o silikwe ane kwetu mene inom andoma holini!

²¹ At ane re ebekhe kwagarekwe andoma nen inom, obalik anggilukhogo hilingiri'lagwi kwe andoma nen inom humeri'lago andi,

²² ”Afuni hinobabut mondok kembu mene yi sani! O mera nen hinobabut weak a'nogo mondok hilingitu logogun nogo? O mera nen afuni inendawinggen kagalek mene inoba hinane asegen wogisikhi lagep mene andi palfogoin nogo? Mera huli nen wene yanggulugun ninabit iluk ikhi lagep mene andi, herakfisogoin nogo?

²³ An nen hinenggali warogo komothinafu halok he, hinafe hebela'luk nanehologo hilingiti logoni o. A'nogo hilingisugun halok he, an nendawimo wene hinago mene andi fakhogo weinama fuluk wene nelu mene yagahisagain werego.

²⁴ Yagahisagain iluk, an nen naneba wolhinafik, nenggi lamok igik, igirek meneat he, Ninabit, iluk herakfisikhi lagep andi.

²⁵ An nen hinenggali warogo komothinafirek mene andi mondogat hinendawimo seramet fuluk, herakfisikhi lagep andi.

²⁶ Andi nen he hit hobuk mondok weak mene hinoba aga halok, an nen endo yakhinabigin o. Hit hinailo mondok agep halok an nen nanewak wokhisagain aro.

²⁷ Yogo, ou ero inailo mene waluk wagarek andi hak, hit hinendawinggen hinailo hoporek mene hilinghinobagagik, weak mene ekhe hinoba agik ikhe halok he, endo yakhinabigin o.

²⁸ Hinoba a'nogo hilinglasigin sambul andem he, hiren an nayonggo fogoin meneat he, an nen hit hinane onggo igi'lek herakhinobagagin o. Nen hiren an hera'nabik o ekhema-ekhema logoin meneat he, an ninom ambi asugun mondok lego.

²⁹ Hit he, wene hinelu logou mondok hinabit logolik, Tuhan hinailorogo ane hologo logou hinabit mondok welagep andi.

³⁰ Hit he, an nen kimi-komorogo hilinghinafi lagi mene andoma re wanhi lagep lek, nen an nen wenak hisikhi lagi mene andoma re futfikhi lagep legat.

³¹ Hit hinobabut a'nogo hilingiti lagep andiba inom, weak mene hilingisuogoluk hinendawimo ebeti lagep andiba inom, hinobabut oba weak mene hinoba asigin andi.

³² It ap inendawimo inabit mene andi nen an heraknobagaluk wulibugun mene andi hobuk inebe wa'lagik, afuni kembu mene an nane seramet fagarek mene andi hobuk inebe alomat lagik ugun o.

³³ A'nogo meneat he, it afuni ekhe an nane ugunem inesanggo hologo hilingitarek mene andi, hobuk inebe fano tegelek logogun o. A'nogo logolik, ineluk fano welagik, inailo'lekhogo welagik, ikhi logogun o,” iluk komorinaferek.