AMOS 9 - Allah Wene Fano Wene Hupla Inane

Afuni wene inoba fagain mene faget Tuhan nen abikanggoba yagatikhe wene

¹ Nineisena Tuhan ebe, At faget wam, yi mene ti mene warogo noletarek oba era'lu horokhogo mendek were'ma yethigi. A'nogo logolik, mel yaganete, ”An nawi wuri'mo kweba afuni andogotarek oba andem en abolok uagen he, wuroak hokho telik andi henggi uare'mangge fothan o. A'nogo fothugunem sinukhogo pi waga logolik, afuni inungguloak pagethigik inoasigin. Nen, it ekhe inebe wa'lagi'lek mene halok, An nen weim yafi logolik inoasigin enego. A'nogo inoatu kwelek, it ekhe heise poloksek ineluk wulibugun mondok lego.

² It andi ekhe heise poloksek kweangma afuni wa'la'luk lagaikharek oba andoma eberogoat logoin oba nen ogore, An nen inambotkwe liakfisa wesigin o. Nen, heise poloksek pogoroba elok logoin oba nen ogore, An nen it andoma nen pelakfisa wesigin aro.

³ It heise poloksek tom Karmel ungguloba lagambik hina'lasugun mene ogore, An nen it inebe heraginabimbik inebe fakfisagain o. Nen, it inebe i laut yenggelek a'ma ma'lima hina'lasi pugun mene ogore, An nen kisu Naga i laut oba welagarek mene aigen palinabuageluk yagasigin o.

⁴ Nen, it inebe inaselei mene nen hele warogo woginarek logoin halok, An nen it inebe pinggi inoasuageluk yagaisagain aro. Nen An nen it inebe legetfisageluk welagi andi nen he it inebe mondogat weaget fisagain o. Nen ap misigen iluk ogo it ekhe leberisogoin mondok lek,” iluk ikhe isikhe.

⁵ Kweang leigetunem afuni inendawimo weak hikhi logogun, andi re At Tuhan Lego Mondok logolik Omame Hokho welagarek mene a'nogo nen sebethugunem hilingiti logogin. I Nil fu wagunem hetogerik lagagik, hibi agunem firitokhogo pigik, ikherek andi hak he, it inalong asimbigen hobuk maben asugun o.

⁶ Tuhan awi re yatma pogot huli warek oba po'lima wuterek, nen, kweang ambololoba re pogot huli warogo fikherek, nen i laut oba nen heilanghogo kweangma wulabi wagik ikherek, andoma mondogat hilingiri'lago mene andi enu re Tuhan.

⁷ Tuhan ane ikhi logolik he, ”Hit afuni Israel mene yi. An nen ap Sudan mene neilenggen woginafi lagi andi re, hit faget ebeti lagi hakhogo it inoba ogo eberisugu welagirek andi. An he hit hinebe o Mesir en wokhinarek wulibi wagagi hakhogo re, ap Filistin mene o Kreta nen woginarek wagik, nen afuni Siria mene o Kir en woginarek wagik, isigi andi.

⁸ An Tuhan Lego Mondok welagirek mene a'nogo nen hit afuni kerajaan Israel oba weak hilingiti lagep mene andi neilenggen wokhinafi lagi. Andi nen he, An nen o kweangma yoma nen lek hilingisogo hinobagagin o. A'nogo meneat he, afuni Israel mene Yakub en tagomangge mene hinebe mondogat lek hilingisogo hinobagagin lego, iluk An Tuhan nen nane arat igi.

⁹ An nen wene hobuk melalogo yagahisigik, afuni nen beras eanggeba fuluk folharek andi hak, An nen it Israel mene a'nogo tegelinabigin o. It inanggelekwe hilingik logou lek mene andoma waganogo herak fisoageluk he An nen inunggulenu amu mene werekwe andomaba agam fagam isagain.

¹⁰ Nen, afuni ekhe weak hilingitarek mene an nagainafuri inanggelekwe welagaikharek mene andi nen ikhi logolik he, Nit mondok weak mene ninoba asuagaluk Allah nen hera'ninobagagin lego, iluk agarek meneat he, it inebe hobuk weim yafi logolik inoasugun aro,” iluk ikhe isikhe.

Afuni Israel mene inebe hobuk inambotkwe fanorinabigin wene

¹¹ Nineisena Tuhan nen a'nogo isikhesik ekhe mel ikhe: ”Nenggi ekhe horok asi wesigin meneba re, An nen Daud lego welagaikheba obali'mo kerajaan a'nogo legeisogo fagain. Yogondak kerajaan andi re o meisalogo pikherek hakhogo hilinglagama werek. Oba nen he, o hobat andoma An nen obalikwe pugunesimbik nekhengge wusumo re, o andi obabut he attak welagaikhe hagat hilingik logogin.

¹² Ap Israel mene nen he o Edom kweang oba fena ineluk werek mene inom, nen inunggulenu mondogat attak An nagainafuri hilingik welagaukwa mene inom, iren sebelek logogun. An Tuhan nen nane arat igi, nen andoma mondogat he An nenat hilingisigin enego,” iluk ikhe isikhe.

¹³ Nineisena Tuhan nen a'nogo ikhesik ekhe mel ikhe: ”Hobuk inenggi ekhe wesigin meneba re, gandum he weak-weak wulifunem, enggen ugu palhu sambul he, palfigi'lek hundik-handik taganhi logogun. Anggur ero hokho mene nek wulifunem he afuni nen anggur agai hokhorogo hundik-handik keralhi logogun. Anggur agai re tom oba nen tephigik pelabi wagik, punu-punukwe andoma nen selelanghogo pelabi wagik, ikhi logogin.

¹⁴ Hobuk An nen afuni Israel mene inambotkwe fano logouwagaluk hilinginabigin. Inawi kota meisalagaikhe mene andi, iren hobuk ambotkwe wutfembik, inebe andoma logogun. Logolik, anggur awi yagaisogo enggen palogo ninggik, yabu ebe waganogo, yi mene ti mene yakfuluk, ebe palogo tagaisogo ninggik, ikhi logogun.

¹⁵ An nen nagainafuri inanggweang wogisasigiba omanogo femhogo logouwageluk fisagain. A'nogo hilingisogo fisamo re, it he o andoma nen waganogo woginarek logoin mondok lego, iluk An Tuhan Allah nen nane mondogat igi,” ikhe isikhe.