AMOS 8 - Allah Wene Fano Wene Hupla Inane

Abikanggoba mul ugu elema e enggen peterogo kwalek were'ma hasikhe wene

¹ Tuhan Lego Mondok welagarek mene a'nogo nen nabikanggoba ekhe inuk niikhi logolik, mul ugu misik meneba re enggen taganegengge omanogo mondok yugulik mene nek kwalegengge were'ma higi.

² A'nogo higimo nen, Tuhan nen an yaganeti logolik, ”Amos. Nenamene heilenggen hegen?” iluk heinok wo'niikhemo, an nen he, ”Mul ugu misik meneba re enggen yugulik mene nek taganegengge kwalek were'ma higi o,” iluk yagatimo, Tuhan en yaganeti logolik he, ”E enggen wurik agunem palu higit agarek andi hak, afuni Israel mene an nen hilinginabigin mene horok agasik werego. Ma re, an nen hilinginabigiluk anggigi mene andi, sugulhi'lek, eberogo nenat wene arat inoba fagain o.

³ O andi sambul he, wuni o hun raja awi silimo andoma nen ugu mene re agamhogo le wuni nek ikhi logogun. Ekhema-ekhema andoma ap warek enek kabok ugunem, inane le'legat hambokhogo hugisa wilifi logogun,” ikhe isikhe.

Allah nen afuni Israel mene wene inoba fagain wene

⁴ Hit afuni o yiba logolik it ekhe inenggi lek mene enggin-fenggin inoba fugunem inebe lek ari'lagwi andi nen he, hinesanggo fanorogo holini o.

⁵ Hit hinonggwarek hinendawimo nen anggikhi logolik he, ”Yago, niren Hari Raya faget ebetu mondok logolik welago mene yi re, mondok aninu weak oma re agwi. Nit he no gandum enggen omanogo onggo hunira hak he linggene ebeti lago mene yi weak-weak kobok ili'lago lek omari. Niren ninangge onggo hunirugu mene erorasugun enggere ki sambul linggene Sabat mene andi kobok igin nogo? Niren henarogo hilingitik ilirengge enggin waletu meneba nineranhogo lalinafik, ninane nen awia labelogo onggo heligik, hilingiti logoilo mene agwi.

⁶ Gandum enggen weak mene onggo hokho legeisogo helouwogeluk wanhik, it afuni inangge lek inelagaik mene we ineisok agut wuthogo onggo endebat wanu hak meneba nen he it inoba bon werek mene andi heraginabimbik, inebe ninamingmingengge logouwagaluk onggo palinafik, uogo,” iluk anggikhi lagep andi.

⁷ It afuni Israel mene ineisena Tuhan Allah nen hombuk palogo mel ikhe: ”An nen it weak hilingiri'lagwi mene inoba nonggoret fisigi'lek nendawimo eberek mondok logogin o.

⁸ A'nogo igi andi nen kweang abolok igik, afuni mondogat le hokhorogo agik, ugun o. O kweangma yi awi ti awi mondogat abolok ikhi logolik, i Nil laga logolik esinggen founalik lenggalik, lagarek andi hak hilingisigin o.

⁹ An nen he, o linggene werek kwelek mo ubukhogo kuageluk hilingitik, mum asuageluk hilingitik, igin oba werego, iluk An hineisena Tuhan Lego Mondok welagirek mene a'nogo nen nane arat igi.

¹⁰ An nen hit hinebe misi'mo andoget fuluk, pesta hilingiti lagep mene andi afuni ware'ma fong watarek andi hak wasubagaik iluk hilinghinafik, wuni wati lagep mene andi le asubagaigen iluk hilinghinafik, hinendawimo weak a'luk welagep mene andi enegat asuagaluk hilinghinafik, hinesi hogologo palubagaigeluk hilinghinafik, hinasu karung mene labesubagaigeluk hilinghinafik, igin o. A'nogo hilinghinabumo, hit hinebe ap ekhe agwe emberek omalik manggusa takhogoin mene wa'lagunem le agaikharek andi hak le hokhorogo asugun o. Andi sambul fano mene ekhe higi'lek weak mondok hikhi logogun,” iluk ikhe.

¹¹ Nineisena Tuhan Lego Mondok welagarek mene a'nogo nen ikhi logolik mel ikhe, ”Inenggi ekhe horogasi wesigin sambul andem oba re An nen o kweang yiba sumburu ouwak lakfei wesigin. Lakfei wesumo afuni nen ouwak hikhi logogun oba nen, sumburu nele nen ouwak hikhi logogun lek, nen, inendawino age lagakhi logogin oba nen i nele nen inendawi age lagakhi logogin legat. Oba nen he, An nen wene ikhi lagi mene andi nele nen hilingiti logogun o.

¹² A'nogo hilingiti logolik, An nane andi herarik he yi awi ti awi o abel utara fikhiren he abel selatan fikhit lagik, nen abel timur fikhiren he barat fikhit lagik hilingiti logogun, oba nen he iren ekhe herati logogun mondok lego.

¹³ Andem sambul he, ap souge inom, helime silerik inom, inoba ou lek fano logogun oba nen An Nane nele nen ineil furuk fogoin.

¹⁴ Afuni ekhe nen afuni o Samaria mene inandugwi kembu enu hombuk palhik, afuni inunggulenu Dan mene inandugwi kembu enu hombuk palhik, afuni Bersyeba mene inandugwi kembu enu hombuk palhik, ugun meneat he arat pile pugun andi nen he, hobuk menlasugun mondok lego,” iluk ikhe isikhe.