AMOS 6 - Allah Wene Fano Wene Hupla Inane

Afuni Israel mene wolelenggen tagalogo leget fisagain isikhe wene

¹ A'nogo ikhesik hobuk ekhe mel ikhe: ”Hit o Sion hinagaiyekhogo welagep mene andoma inom, nen hit o Samaria fanorogo welago iluk anggikhi lagep mene andoma inom, hit afuni hinunggulenu Israel mene hinogogwi kaindek hinebe lego welagep mene yi nen he, wene fanorogo pilingisogo yaganisoageluk it hinagoromi re hit hinoba wagaikharek andi nen he, eige hit he alomat hinabigin o.

² Hit hinebe o Kalne andoma hineilenggen halano o. Laluk pikhit he o kota hokho mene Hamat oba andoma lambik he, o kota Gad afuni Filsitin mene inaiba andoma lano. Hiren anggikhi logolik o kerajaan Yehuda oba inom, Israel oba inomen he o kota-kota andoma nek he fano anggikhi logolik hilingiti lageba? Nen wilayah iren mene re hokho nen nit mene re endep hangge anggikhi lageba?

³ Hit hinendawimo nen he, Mondok weak mene ninoba fagain oba re oan yatmaat werek, iluk anggikhi lagep meneat he, hit hinobabut weak mondok hilingiti lagep andiba, afuni wolisagarek andi hak horok asi wesuageluk woleti lagebo.

⁴ Hit hinebe nogogu mene mondok fani-fano meneba nek nogogik, nen pesta hilingisuogeluk he wam domba inom sapi inom ai mene ebe fano meneba nek hilingitik, ikhi lagep mene yi sani, Eige, nendawilage, hit he weaget hinabigin o.

⁵ Hiren he at Daud en hilingiti lagaikhe hak, wuni anggup hunogo mene felalogo gitar watik, no kecapi ba abologet fuluk watik, ugu aple nek hinagaiyek welagep.

⁶ Hit he, hinagai anggur enggen amusu mangkok oba ambem hetokhogo hinagaisogo ninggik, hinebene amusu amben fano mene warigik, hilingiti logoligat he, hit Israel mene hinebe weaget hinabigin mene andi faget hinendawimo weak agi'lek welagep andi ri!

⁷ A'nogo hilingiti legep andi nen, afuni inenggi hele warogo lakfisagarek oba omanogo re hit tak hinenggi hele warogo wokhinarek logoin o. A'nogo wokhinarek lagunem, hiren pesta hilingitik, hinagai hinamburu hokhorogo ninggik, ikhi lagep mene andi re, arat lek asigin o,” iluk ikhe.

⁸ At nineisena Tuhan Omame Mondok Hokho mene logolik, Lego Mondok welagarek mene a'nogo nen ane omamerogo ineluet fikhi logolik he mel ikhe, ”It afuni Israel mene inonggwaregen foget fakhagarek andi re An he nabit mondok welagi o. Nen, inogogwi kaindek inaiba mondok fanorogo wurogo welagaikharek mene andoma re An nen nendawimo nagaiyek anggikhi lagi mondok lego. It inawi kota hokho mene andoma inom, yi mene ti mene o kota welagarek mene andoma inom mondogat he it inaselei mene inenggiba fagain o,” iluk ikhe.

⁹ A'nogo inenggiba fugunem afuni ekhe inebe 10 mene o misik awi hinago logogun meneba nen ogo re, inebe wa'lasugun enek.

¹⁰ A'nogo wa'lasumo, ap misik ekhe it ineisok erokwe ap warek a'nogo saligiluk agailak warek a'nogo wani wesimbik wilibigin. Waluk wilifi logolik, aren ap o andi ambolkwe fikhit logogin mene a'nogoba ikhi logolik he, ”Hat hinom he afuni ineluk werek mene ekhe werega?” iluk heinok wanigin. A'nogo ugunem onggo ugu mene holhugunem he, ”Lego!” iluk igin. Ap misik it ineisok erokwe mene nen ap warek salherek agun a'nogo nen ikhi logolik, ”Hane ekhe inom ugun! Niren Tuhan enu ugun mondok lego,” iluk igin.

¹¹ At nineisena Tuhan nen yi'nogo hilinglame igin halok he, o sili hokhondek mene inom magendek mene inom mondogat wolelenggenhogo legasigin aro.

¹² Wam kuda tom unggulkwe uarek lagarek nogo? Afuni ekhe i laut yenggelekwe nen, wam sapi nen lisogo waluk yabu wani kwagarek nogo? A'nogo meneat he, hiren hilingisu elo'lek meneba nen tiphogo hilingitu aple omanogo agaumhogo re inendawimo ale palerogo afuni inoatarek mene hilingfikhi lagep, nen, eberogo mene a'nogo agaumhogo re weak mene hilingfikhi lagep.

¹³ Hit hinonggwarek foget fakhikhi logolik, niren Lodebar omame leget fesugu iluk ikhi lagep. Nen, hiren nekhengge hinane ikhi logolik, ”Nit he, o Karnaim pin kwi logoin he ninomame elogat welago,” iluk ikhi lagep.

¹⁴ A'nogo ikhi lagep meneat he, nineisena Tuhan ebe Lego Mondok logolik Omame Hokho welagarek mene a'nogo nen ikhi logolik he, ”Hit afuni Israel mene yi. An nen he, afuni inunggulenu hunogoat mene inagoromi tentara nen o hit hinaiba weim kwi waga logolik hinoasi kwi wesuageluk inayonggo fuluk lakfisa wesigin o. A'nogo lakfisa wesumo, iren he hit hinoba wiik weakhogo hinobagakhi logolik o Hamat louwogeluk i elesi higit lagaikharek oba andoma nen he, pikhit, i ambut higit o Araba tonggoma andoma huli weaget hinabugun o,” iluk ikhe.