AMOS 5 - Allah Wene Fano Wene Hupla Inane

Afuni Israel mene inobabut hebelasuageluk yagaisasikhe wene

¹ Hit afuni Israel mene yi. An nen hit hinobaget le wuni misik ekhe wasigin mene yi hinesanggo fanorogo holini o:

² Israel he at ebe tugum oba nenat pile pikhemo re, hobuk ekhe inom menlasigin lek! At onggwarek anggweangma andoma herak fisamo re, it ekhe nen iluk ogo senegeisogo menfogoin lego.

³ Tuhan Mondok Lego welagarek mene a'nogo nen mel ikhe: ”Afuni Israel mene were'ma o kota ekhe nen, ap tentara inebe 1.000 mene weim yabuogoluk sinelogo lagunem en, inoasumo inebe 100 nen enek ineluk inambotkwe wesugun o. Nen, o kota ekhe mene, ap tentara inebe 100 mene weim yabuogoluk sinelogo kugun mene re, inoasumo inebe 10 mene nek inambotkwe ineluk wesugun o,” iluk ikhe.

⁴ Tuhan nen afuni Israel mene faget mel ikhe: ”Hinambotkwe An noba we'ni o. Wagep halok, hit hinebe hineluk logogun.

⁵ Hit an faget hilingisuogoluk, o Bersyeba lagubo. Nen, afuni o Betel mene inebe lek asugun andi nen he, An hera'nabik, andoma la fugo. Nen, afuni o Gilgal mene inebe hele warogo woginarek logoin andi nen he, o Gilgal lagubaro,” iluk ikhe.

⁶ Ma re, hit hinebe hinambotkwe nineisena Tuhan oba we'ni o. Wagep halok, hineluk logogun. A'nogo meneat he, wesugun lek halok, At ebe endu amulok melanghogo ninggerek hak waga logolik, afuni Israel mene inebe felelenghogo hinoasigin o. A'nogo inoatunem, afuni o Betel welagaikharek mene ekhe nen ogo endu andi nagulu re mondok elo'lek asigin.

⁷ Hiren wene higithogo hilingitu awene a'nogo agam fagam isigik, eberogo mene kweangma hugisaluk hineisogen sebelisigik, ikhi lagep mene oma re alomat lasugun o.

⁸ Nineisena Tuhan nenat, hesagalenggen pogoroba elalogo fesikhe, hesagalenggen andi enu Belantik inom, Kartika inom, elalhikhe. Arenat o mum mene lia hilingisogo figik, o linggene mene hubanggo hilingisogo figik, i laut hokho yenggelek mene kweisalogo kweang ambuema hukhigik isikhe andi. Nen andoma mondogat hilingitikhe mene andi ebe re At Nineisena Tuhan amu nenat hilingitikhe.

⁹ Arenat, ap inomame hokho mene inebe inoasinogoluk ninghogo wurikwe omanogo inomat wolelenggenhogo leget fikherek.

¹⁰ Hit he, wene pilingitarek oba ap ekhe wene weakhogo pilingisugunem wenagisagarek mene hinabit inoba fisigik, wene eberogoat agarek mene hinendawimo seramet fisigik, egepsek andi.

¹¹ Hiren afuni inangge lek inelagaik mene sebelogo fisaluk, inamburu gandum he hinenggi abisak helikhi lagep. A'nogo hilingiti lagep andi nen, hit hinebe hinawi fano mondok wurikhi lagep oba andoma logogun mondok lego. Nen, hinagayo anggur awi hineabukwe yago mene andoma enggen amusu ninggi logogun mondok legaro.

¹² Hit hinobabut he, ninghogo weak inoba figik, afuni ekhe inobabut fano mene yi enggin ti enggin inoba figik, it afuni ekhe werekwe asuageluk onggo wokhisugunem heligik, afuni ekhe inangge inelagaik mene it ekhe nen o wene pilinget fuluk wene inoba figik, kotik, agarek oba andoma nen weak hilinginabuagaluk herakfisigik, weak mondok hokhorogo hilingiti lagep andi re hinobabut An mondogat nelu o.

¹³ Hit hinobabut weak mondok hilingiti lagep andi nen, it ap inendawimo kagalek mene andi nen anggikhi logolik he, ’Weak a'nogo hilingitunem andi re, nit he ninane legat logouwok,’ iluk anggagarek andi.

¹⁴ Hineluk fano logobagaigen he, weak hilingitarek mene andi murok lagi'lek, higithogo hilingitarek mene andi nek murok laga logoino o. Hinobabut a'nogo hilingiti logogun halok, hineisena Tuhan yi wene ti wene hilingisu hagenek mene andi re, hit hinane ikhi lagep mene andi higithogoat hinanggele'ma mondok logogin o.

¹⁵ Inobabut weak hilingitarek mene andi hinabit logolik, fano hilingitarek mene andiat hinendawirogo logoino. A'nogo hilingiti logolik, wene higithogo hilingitarek mene andiat omamerati logoino. A'nogo hilingisugun andiba re, Tuhan nen, afuni Israel mene fena ineluk logogun mene omanogo endawi hundik hilinginafi logogin logou hak.

¹⁶ Tuhan Omame Mondok Hokho mene a'nogo nen mel ikhe: ”Ebekhe o kota lagaikharekwe laga logolik afuni nen inendawi ou en inendawinggen warilik laga logolik le yagaisogo inabel tagalhi logogun. Nen we it ap petani yabu wanharek meneba nen ogore, ap warek faget obaget ninom le asuogen iluk ap le faget onggo palinafu mene omonogo inom le aga logogun.

¹⁷ An nebe hinanggele'ma waga logolik wene hinoba filik wesigin andi nen he, afuni anggur yabumo mondogat logogun mene nen le hokhorogo asugun o, iluk An hineisena Tuhan nen arat igi,” iluk ikhe isikhe.

¹⁸ Nineisena Tuhan awi wei igin andi, hit hinawi wei igin nogo? Linggene andi lia fiarogo wei igin lego, we mondok mum hikhaksek awi wei igin o, meneat he O andi wei inik agwi, iluk hinendawimo hinagaiyegetu welagep andi nenahalok? Eige, nendawilage e, weagethinabigin o.

¹⁹ O andi sambul wei ikhi logolik hilingisigin he, afuni ekhe mene singa inailo nen agaiserogo heise logoin meneba nen, no beruang inom ambi asu hak hilingitik, nen inambotkwe inaiba we'luk inenggi o hobat oba fakhugunem, kisu aigen palinabu hak hilingitik, igin o.

²⁰ Nineisena Tuhan awi wei igin andi re, lia fiarogo wei igin he fuk, mum hikhakhogo ohena muli mene sebelogo wei igin o.

²¹ Nineisena Tuhan nen mel ikhe: ”Hiren, Allah faget hilingiti lago iluk, andoget fuluk pesta hilingiti lagep mene andi nabit hisaluk he, hebak nafe ari'lago o.

²² Hiren wam, sue inom, gandum inom, An faget nobagaluk nolnesuogoluk waluk wesugun halok, An nen wanigin mondok lego. Nen, hiren An nane sagalogo weak hilingitigip mene andi faget, ninom lambuluogoluk hinanggo sei hokho mene warogo nolnesi wesugun mene re, An nen wanigin mondok legaro.

²³ Hiren wuni anggilukweak wati lagep mene andi An nelokhoma nen herakfeni o. Nen, gitar wati lagep mene andi, hobuk watunem ane nesanggo holigin nabiro.

²⁴ Hit hinobabut he, i elesi wulibisogo lagarek andi hak, wene higithogo pilingitarek mene andiat esinet figik, i elesi agai lagu mondok welagarek andi hak, higithogo nek hilingiti logouwogeluk esinet figik, ikhi logogun andi nek he mondok fano.

²⁵ Hit afuni Israel mene yi sani. An nen hit wokhinarek o leikwe nen wagu kwelek 40 tahun hilinglagaikhe andi. A'nogo wokhinarek wagu kwelek, hiren wam, sue, yi mene ti mene An nobaget nobagagik, endu nolnetik, ini o, iluk yagahisikhi lagagi lek anggigi.

²⁶ A'nogo meneat he, yogondak hiren, tugwi kembu Sakut andi at ebe ninoe enupogot iluk fogeratik, ekhe enu Kewan hesagal mene tugwi kembu iluk fogeratik, ikhi lagep andiba, hiren pugunerikhi lagep mene andoma re hinonggwaregenat helaluk logoin andi.

²⁷ Andi re, An nen hit o kweang ekhe o Damsyik en yatma andoma lakhinobagaumo logoin o. An Tuhan Nomame Mondok Hokho mene hineisena Allah a'nogo nen nane arat igi o,” iluk ikhe isikhe.