AMOS 4 - Allah Wene Fano Wene Hupla Inane

¹ A'nogo isikhesik ekhe mel isikhe: ”Hit hemi Samaria hemi hinebe wam sapi o Basan mene asei hokhorogo welagarek andi hak hinasei hokho asuageluk hilingiti lagep mene yoma re hinesanggo holini o! Hiren he afuni inomame lek mene enggin-fenggin inoba figik, inangge lek inelagaik mene sebelogo fisigik, hinaguni yagaisikhi logolik, Nagai nagain mene faget anggur amusu lugu-lugwi palharek mene keralogo nobagakhi logoin o, iluk hinane ninghogo mondok yagaisugu welagep andi.

² An hineisena Tuhan Lego Mondok welagirek mene andi re Tuhan horek mene, nen An nonggwarek nenu hombuk palogo wene yi'nogo wathisasigi: Hobuk hit hinebe heleba kelogo wokhinarek lagik, fena ekhe logogun mene mondogat he ikan hamborogo watarek mene mata kail hanggeba salukhogo wokhinarek lagik, ugun o.

³ A'nogo wokhinarek louwogeluk he, hinebe lombok kwe leget pa'leget waganek folelekwe horogat hinelokhe tukum andoma nen woukhogo o Hermon higit wulakhinobagagun o, iluk An Tuhan nen nane arat igi,” iluk ikhe.

Afuni Israel mene unggum inoba fugu kwelek holhi'legat hilingitu nen isikhe wene

⁴ Tuhan Lego Mondok welagarek mene a'nogo nen ikhi logolik: ”Hit afuni Israel mene yi sani! Hiren o Betel tugwi kembu faget hilingiti lagep oba andoma An nane sagalogo weak hilingira lani o. O Gilgal andoma lambik weak hokhorogo hilingira lani. Laluk he, wam tugwi kembu faget warogo hundik-handik ohealek huberat siakhogo noletik, yi mene ti mene awi yatu mene ebe tatik, palhik, ugu mene hinenggi wenagaisogo 10 nen asi lagunem, 9 hit aga logolik misik 10 mene andi re tugwi kembu faget fisaluk, hinenggi pire wela'luk ekheba re wogosi lagik, ikhi logoino o.

⁵ Nineisena allah nen wo'nisikhi lagen, iluk hai wati logolik, roti An nobaget fou hak, tugwi kembu andoma faget roti enggen fiterek mene inom seberogo werago wogotu mene inom, fisikhi logolik, Niren ekhe oba mangorogo fisikhi lago, iluk fogerakhigik, sewirakhigik, ikhikhi logoino re. Hit a'nogo hilingitu aple hinamolo nenat hilingirikhi lagep andi, iluk An hineisena Tuhan nen igi o.

⁶ A'nogo hilingiti lagep andi nen, An nenat hit sumburu ouwakhogo logobagaigeluk sumburu ouwak mondok hokho mene hinawi kota ba mondogat lakfei wagi meneat he, hiren hinambotkwe sugulogo An Noba wesu hinabit mondok welagebo.

⁷ Hit hineabukwe yi mene ti mene awi yatu mene enggen oan palhi'le'ma sawet asuageluk An nen meiso pelabi wagi'lek kwe pal fikhi lagi. An nenat meiso o kota ekheba pelabi waga logolik, kota ekhema re herakfisikhi lagi. Nen hit hineabu kwe andoma re, ekhekwe meiso pelafu kwelek, ekhema re meiso pelabi wagi'lek kamo ugunem kweang mondok iringik weak agik, ikherek andi.

⁸ O kota fenakwe re i nele nen afuni inomame mondok lek ari'lagwi. A'nogo hingiti logolik, kota amu meneba i herarik lili'lagwi meneba nen he, i andoma it inebe inom higit ari'lagwi lek. A'nogo hilinglari'lago mene andoma hikhi logolik meneat he hit hinebe sugulogo An noba waga lagep legat andi.

⁹ An nen he, sogoi aganhan mene hinoba funhogo lakfei wagik, ou ero weak mene afuni inoba lakfei wesu hak, yabukwe yi mene ti mene yago mene inom, anggur yabumo inom, weaget fouwageluk lakfei wagik, igi aro. Nen, hit hinagayo ara inom, zaitun inom yago mene re, pulue nen felelenghogo ninggeat, meneat he, hit hinebe An noba hinambotkwe wesu hinabirat welageb andi, iluk An hineisena Tuhan nenat igi o.

¹⁰ An nen ou ero mondok weak mene afuni Mesir mene inoba lakfesigi andi hak, hit hinoba lakfei wagik, hinagainafuri alage mene hinaselei mene inom weim yafi logolik inoasuageluk hilinginafik, it ekhe nen hinanggo kuda inenggi abisak heloageluk hilingitik, hit weim yabuogeluk hinaiba su mene wutep oba andoma An nen ap warek fili amben hinambisang elekwe kwelakhinobagagik, ikhi lagi meneat he, hit hinambotkwe An noba wesu hinabirat welagebo.

¹¹ Afuni hit mene fenakwe re An nen afuni o Sodom inom, Gomora inom wulil tagalogo legetfisasigi andi hak inebe leget fisigimo, fena ekhe hineluk welagep mene andi, hinebe endu aro endumo nen yegelogo wanharek andi hak welagebo. A'nogo meneat he, hit hinambotkwe sugulogo An noba wesu hinabirat welagep.

¹² A'nogo hilingiti lagep andi nen, hit afuni Israel mene yi. An nen wene hinoba fagain o. Ma re, An nen wene hinoba fei wesigin mene andi helobagaigen he, hit hinebe fik-foukhogo logoni o,” iluk ikhe isikhe.

¹³ At nineisena Tuhan nenat o tom-tom andoma walhogo figik, sogoi elalhik, isikhesik he, at endawimo anggikherek mene re nit afuni yaganisikherek. Andi nen o linggene inom, hubanggo inom Arenat walhasikhesik, ebe o kweangma yoma yi awi ti awi tom unggul kwe nikherek. Enu re, Tuhan, Allah Omame mondok hokho mene andiat.