AMOS 3 - Allah Wene Fano Wene Hupla Inane

¹ Hit hinunggulenu Israel mene inom Yehuda mene inom, hinebe hineisok erokwe lombok o Mesir en wokhinarek wulibi wagaikhe mene hinobaget wene Tuhan nen hinoba fagain mene yagahisoageluk ikhe mene yagahisagain yi, hinesanggo fanorogo holini o:

² ”O kweangma yoma yi afuni ti afuni hokhorogo werek kwelek meneat he, hirenek he An nagainafuri Nonggwaregen wenagaisogo fakhasigi mene hilingi'mo re, hinobabut weak mondok hokhorogo hilingiti lagep andi onggo re hit hinoba eberogo nenat An nen wene hinoba engginhogo fagain o,” iluk ikhe isikhe.

Ap Allah ane yagaisagarek mene nen hilingitarek mene faget isikhe wene

³ A'nogo isikhesik, ekhe mel isikhe: ”Afuni inebe pire mene nen, Nit o andoma louwok, iluk emberek wene wati'legengge lamo re higit nogo a?

⁴ Mene singa enggama logolik, at ninggerek mene higi'lengengge nen, ane kouwasumo re higit nogo a? At singa eagwi kiling elema logolik, ninggerek mene ekhe herakhigi'legengge nen ane kouwasumo re higit nogo a?

⁵ Afuni nen sue hele figi'le'maat ebe ke'nok umo higit nogo a? Paik hele wephogo fagarek oba andi, ebe kwigi'lek kwelegat fetakhogo lagaumo higit nogo a?

⁶ Afuni o kota welagaikharek mene, Weim werek, iluk inendawinggen wenggelogo pinggong anethugunem ina'manggen lagi'lek logou hak nogo a? Nen, Tuhan nen enggin-fenggin lakfei wagi'lemaat afuni o kota welagaikharek mene andoma weak mene andi inoba asi wesu hak nogo a?

⁷ At nineisena Tuhan Lego Mondok welagarek mene a'nogo nen he, An yi'nogo hilingisigin, iluk ap At amingmingengge ane yagaisagarek mene andoma inoba fakhogo yagaisigi'lek ekhe hilingitirek mondok lego.

⁸ Mene singa ane kouwatu halok, sa hagen ailo'lek hambuk haluk logou hak nogo? Nen At Tuhan Lego Mondok welagarek mene ane ikhe halok, sa nen it afuni ekhe yagaisigi'lek kamo u hak nogo?” iluk isikhe.

Afuni Samaria mene unggum inoba fagain isikhe wene

⁹ A'nogo isikhesik he, ekhe mel isikhe: ”Hiren he, afuni o Mesir mene inogogwi inom, Asdod mene inogogwi inom, werek mene andoma inoba lambik wene yi yagaisa lani. Yagaisikhi logolik he yi'nogo yagaisano: Hit hinebe re afuni Samaria mene inawi tom-tom welagaikharekwe andoma andogosi laluk he, it weak mondok hilingitik, hesangge-pesangge hilingitik, inenggi omameba sebelinarek welagik, mondok hokhorogo hilingiri'lagwi mene andoma, hineilenggen penesino o,” iluk ikhe.

¹⁰ Tuhan nen a'nogo ikhesik, ekhe mel ikheat: ”Afuni Samaria mene nen he, inawi fano mondok wuri'mo andoma yi mene ti mene weak hilinginafi logolik, telogo heligik, hugulengge wanhik, aga mene omanogoba mondok peterogo fakhaluk werego. A'nogo logolik, inobabut higithogo hilingitu aplere mondok inonggot werek.

¹¹ It a'nogo hilingiri'lagwi andi nen he, it inaiba andoma inaselei mene nen o kwe yagarinafi logolik, it inalong pale'ma iluk leget pa'leget waganek omanogo weagetfisigik, iren weim himbirengge fili'lagwi kwe wolelenggenhogo figik, inawi silikwe omanogo teligik, ugun o.

¹² Ap gembala misik ekhe anggo domba mene singa nen senggelhunem, oak pire sanoksek hea, esanggo tilipsek hea, nek heratarek hak, afuni Samaria mene inagaiyekhogo inebe nogoli'lagwikwe mondok fano meneba yinggilogo werek mene andoma re, we inebe endebat enek telinabumo re ineluk logogun o,” iluk ikhe.

¹³ Nineisena Tuhan Omame Mondok Hokho mene logolik, Lego Mondok welagarek mene a'nogo nen, a'nogo ikhesik ekhe mel yaganeteat: ”An nen wene hoba fagain mene yi, haren fanorogo futfembik he, afuni ap Yakub en tagongge mene andi inoba fakhogo yagaisano o.

¹⁴ An nen afuni Israel mene inobabut weak mondok hilingiri'lagwi andi nen wene inoba fikhi logolik, o Betel en wam, yi mene ti mene tugwi kembu faget warogo noletarek mene andi ebe mondok legetfisikhi logolik, unggut fena-fena andimuk hilingik mene andoma ambisang somborisilik lamo re sinukhogo kweangma lobak ilik lagain o.

¹⁵ A'nogo hilingiti logolik, it inaiba o salim agunem welagaikharek oba andoma inom, o hibi agunem welagaikharek oba andoma inom, mondok weaget fisigik, nen o timuk oba liagaisogo wurik mene andoma tukhumhogo lakfisigik, igin o, Nen o hokho mene wurik mene andoma re mondogat wolelenggenhogo weaget figik, igin,” iluk ikhe isikhe.