AMOS 2 - Allah Wene Fano Wene Hupla Inane

Afuni Moab mene faget isikhe wene

¹ Nineisena Tuhan nen a'nogo isikhesik, ekhe afuni Moab mene faget mel isikhe: ”It afuni Moab mene hundik-handik weak enek hilingitu werek andi nen he, An nen kamo igi'lek eberogoat wene inoba fagain o. Iren afuni Edom mene inoe raja ebe wa'lagaikhe mene a'nogo inendawimo seramet fuluk, ebe warek salhukwaba kweang habulogo legetukwasik oak yegelogo wanhukwasik he, endu nolhukwama wul agaikhe andi.

² A'nogo hilingitukwa andi nen he, An nen endu afuni Moab mene inaiba lakfei wagunem, o Keriot leget pa'leget ninghogo waganek mene andi re endu mondok nagain o. A'nogo nunggu kwelek, weim yafi logolik, inane hokhorogo a'mit sup igik, pinggong ane hokho mene anethigik, inane hokhorogo sagalhik, ugunem inane anggelekwe afuni Moab mene inebe inoasugun.

³ O Moab oba andoma inoe enggi faginarek mene inom, nen at a'ma pemerintah ba yabu hilingitarek mene inom he An nen inebe pinggi inoasigin,” iluk ikhe isikhe.

Afuni Yehuda mene faget isikhe wene

⁴ Tuhan nen ikhi logolik he, ”It afuni Yehuda mene re hundik-handik weagenek hilingitu weregen he, An nen eberogoat unggum inoba fagain o. It he An nen nane yi'nogo hilingi'no ti'nogo hilingi'no iluk yagaisikhi lagi mene taganetfigik, An nen yagaisikhi lagi mene a'nogo futfigi'lek hilingitik, hilingiri'lagwi. It he it inombawi nen kembu ilah amu mene apne wanhi lagaukwa mene nineisena ebe yi aro iluk, fogerari'lagwi andiba inebe lalinaferek andi.

⁵ A'nogo hilingiri'lagwi andiba re, An nen o Yehuda ba andoma endu lakfei wagik, nen Yerusalem oba leget pa'leget ninghogo waganek mene mondogat endu fatik, igin o,” iluk ikhe.

Allah nen Israel mene unggum inoba fagain isikhe wene

⁶ Tuhan nen ikhi logolik, ”Afuni Israel mene hundik-handik weagenek hilingitu nen he, An nen eberogoat unggum wogisagain. Ap higithogo hilingitarek mene nen agaila'lak inangge we elama faget iluk wanhu mene nekhengge obali'mo fili'lagwi lek mene omanogo re iren inamingmingengge asuagaluk onggo huninafa. Andi hakhogo re iren afuni inenggi lek mene nen palegengge faget onggo obali'mo fou mondok elo'lek mene omanogo ogore, iren palegengge andi re, ineisok sandal wuthogo onggo fou hakhogo meneba nen he a'nogo nek hilingfisili'lagwi andi.

⁷ Iren afuni inomame lek yi'nogo ti'nogo ekhe hilingsu lek mene ineisogen tandamerisigik, afuni inangge inelagaik mene filikhogo wulakfisigik, agarek andi. A'nogo hilingiti logolik, ap ekhe amlogo emberegen he helime silerik ekhe inamingmingengge nom werek mene re it emberegen fakfisaluk pailak hilinginabi lagwi andiba re, an nenu weagerogo fagarego.

⁸ O An nawi wuri'mo mezbah ebe lombok era'lukwe omanogo re, iren su afuni inenggi lek mene inoba onggo hobuk wokhosugun iluk wanharek mene omanogoba talfuluk nogoli'lagwi andi. Nen, it ineisena Allah awi wuri'mo nen he afuni it inoba palegengge werek mene inangge anggur agai omanogo helaluk nili'lagwi.

⁹ A'nogo meneat he hit An nagainafuri yi, afuni Amori mene inebe e sin hakhogo inoakhuse uandek inap, nen e batie hangge inomame hokho inap omanogo re hit hinobaget An nen inebe mondogat legetfisasigi andi.

¹⁰ An nen hit hinebe o Mesir en wokhinarek wulibi wagagisik, o leikwe afuni mondogat lekwe nen wokhinarek wagu kwelek 40 tahun hilinglagaikhe. A'nogo wokhinarek wagagisik, afuni Amori mene inaiba yoma hit eise asubagaigiluk wokhisasigi.

¹¹ An nen he hit hinagainafuri mene ekhe an nane yagahisikhi logogun mene inom, hinagoromi alage ekhe inebe An faget tegelek mondok logogun mene u hak, Nazir mene logouwagaluk inom, wenagaisogo fisigirik wokhisasigi andi. Hit afuni Israel mene yi, an nen eberogoat a'nogo wokhisasigi lek nogo? Eberogoat wokhisasigi aro,” iluk An Tuhan nen nane arat igi.

¹² A'nogo meneat he, ap An faget tegelek logogun u hak Nazir mene logouwagaluk wokhisasigi mene andi, i anggur amusu, Na fugo, iluk isigi mene noagaluk wogisigik, ap An nane yagahisikhi logouwagaluk wokhisasigi mene andi, Hiren he Allah ane yaganisikhi logogun mondok lego, iluk wene palhik, ikhi lagep andi.

¹³ A'nogo hilingiti lagep andi nen, yogondak he An nen hit al tamdamhogo kweangma pelak hinobagaumo re kereta oto hangge gandum enggen kwelagaisogo laga logolik enggin nen alperelherek hakhogo hilinglasugun.

¹⁴ A'nogo hilinghinafunem, hit ekhe hineisok werek mene re weak-weak siakhogo wulibugun mondok lego. Nen, hit afuni ekhe hinomame hokho mene ogore hinomame legagik, nen ap inobabut hibilik-hebelek mene ogore inonggwaregen inebe teligik, ugun mondok legaro.

¹⁵ Nen, ap sikhe enggi pagat weak mene ogo re hambuget hare elo'lek asigin, nen it ap ineisok a'ne weak mene ogore la elo'lek asiginat, nen it ap wam kuda amboloba lagaluk lagaikharek mene ogore inebe telogoin legaro.

¹⁶ O andi sambul he, ap tentara inailo'lek mene inasikhe inarige kilelogo herakfisaluk heise wulibugun o, iluk An hineisena Tuhan nen nane arat igi,” iluk isikhe.