3 YOHANES 1 - Allah Wene Fano Wene Hupla Inane

Gayus hai watikhe wene

¹ Gayus nagailage. An nen Allah againafuri kwelaginarek logouwageluk mennobagasikhe mene hinoe a'nogo nen nendawinggen oba nen hebe eberogoat nendawi welagi, iluk, wene yi lisu palogo hoba lakfei wagi o.

² Nagailage. Hat hendawinggen Allahba himbirik logolik fano welagen andi hagat, hoba ou lek fano logolik yi mene ti mene faget fano hilingiti logoinogeluk, samban hat faget ikhi lagi o.

³ Haren ebe wene hesanggo hologo fano hilingitendek andi nen, it Allah againafuri ninerugwi ninagaila'lak ekhe noba wagaikhasik, mel yaganeta: ”Aren ebe wene fisogo logolik fano higithogo hilingiterek,” iluk habok yaganetama nesanggo holhirik he, nendawimo nagaiyek hokhorogo hikhi lagi o.

⁴ A'nogo ugunem he, an nen yi mene ti mene faget, nendawimo nagaiyek endebat anggikhi lagi meneat he, hit hinebe an nagainafuri nen ebe wene fisogo logolik, fano higithogo hilingitunem nesanggo holhiresik he, nendawimo nagaiyek hokhorogo anggigirego.

Gayus fogeratikhe wene

^5-7 Nagailak hebe nendawi e. Hat haberali agi'lek Allah againafuri ninerugwi ninagaila'lak inebe helu mene inom honggot mene inom mondogat leberisikhi lagen mene nen he, ”Aren nit endawitninafesik yi'nogo wo'nisikhe,” iluk Allah againafuri yoma mene yagaisa wagaikhama nesanggo holhi o. A'nogo hilingiten andi hak, it andi nen Kristus faget afuni ekhe wene inonggot mene yagaisa lagunem, iren yi mene ti mene ekhe wogisigi'lek menere, haren Allah endawimo fanorogo leberisaluk lakfisikhi logoumo re, fano o.

⁸ It andi ebe wene Allah ane a'nogo faget hilingiri'lagwi andi, nit ninomenat hilingisu hak hilingiti logouwagen, leberisikhi logouwogaro.

Diotrefes Demetrius emberek faget yagatikhe wene

⁹ An nen hit Allah againafuri faget lisu horokhogo palogo hinoba lakfei wagagi meneat he, at Diotrefes endawimo nen he, ”An Allah againafuri inoe kain hilinglasigin,” iluk anggili'logo mene andi nek he, an nane hologo hilingiri'logo lek andi.

¹⁰ A'nogo hilingiri'logo andi, ekhe re, eranenat nit ninabok weak ili'logo. A'nogo ikhi logolik, endawimo nen he, ”An hilingiti lagi andi re, endebat. Nendawimo elo'lek. Hobuk ekhe inomat hilingisigin aro,” iluk anggikhi logolik he, it Allah againafuri ekhe wagunem, at ebe nen woginafi'lek logolik, it ekhe nen woginabuogeluk ugunem wenagisaluk, inebe Allah againafuri andogotare'ma nen mugisogo wulakfisikheregat andi nen, an nebe wesimbigen, at hilingiri'logo mene andi futfouwageluk enggali wasigino.

¹¹ Nagailage, hebe nendawi. Haren he, it afuni inobabut weak hilingitarek mene andi, inobabut wanhuno. We, it inobabut fano hilingitarek mene halok, inobabut wanhi logoino o. Sa nen obabut fano nek hilingiterek mene andi ebe Allah againafuri meneat he, sa nen obabut weak enek hilingiterek mene halok, aren Allah ebe eilenggen hikherek lek, onggoraro.

¹² A'nogo meneat he, at Demetrius faget enek he, afuni mondogaren inom, at Allah eberogoat mene nek ikherek a'nogo nen inom, an nen inom, ”At fano hilingiri'logo,” iluk abok fano ogorek. At abok ogorek andi, eberogoat fano ogorek andi hit hineluo.

Wene wurep kobokhogo hai warinafikhe wene

¹³ An nen wene hokhorogoat hoba lakfei wesu mene werek meneat he, suesingga lisu amusuba palogo hoba lakfei wesigin he, nabiro.

¹⁴ We, an nebe weak-weak wesimbik he, weneane ninelhaba yet-yet ugun o, iluk anggikhi lagi.

¹⁵ At Allah obabut fano a'nogo nen hendawinggen hambuget hafi logouwago. Nagailak. Nen, it ninerugwi ninagaila'lak yoma mene ninom hundik mene nen hai wathafa aro. Nen, nit ninerugwi ninagaila'lak ninom hundik mene o andoma werek mene, ”Aren hai wathinafe,” iluk inebe lombok inenu fakhigik yagaisano o. Nagailak.