2 TIMOTIUS 4 - Allah Wene Fano Wene Hupla Inane

^1-2 At Kristus Yesus ebe hobuk kweangma weinamhogoat wesimbik he, afuni ninebe nineluk welago mene inom, wa'lagaukwa mene inom, mondogat wene ninoba figik, kotik, igin. Fikhi logombik, yi afuni ti afuni mondogat awe a'ma fisambik at ebe kain logogin andi nen, an nen, nineisena Allah inom, Yesus inom, emberek ineilhanem, haren ebe wene afuni yagaisikhi logoinogeluk komorogo yagahesik. Afuni fano wene yagaisugunem holugun werek kwelek inom, inabit werek kwelek inom, holuageluk wene andi ninghogo yagaisikhi logoino. Hendawinggen puk agi'lek yagaisikhi logolik he, weak hilingitunem hane fakhogo yagaisigik, komorinafik, inendawinggen ago warogo yagaisigik, ikhi logoino.

³ Hobuk, it afuni nen ebe wene inesanggo furogo holhi'lek logolik, we wene inesanggo holu inamolo nen, yagaisikhi logouwageluk it ekhe inebe hokhorogoat inayonggo fembik andogerinabugun andi.

⁴ It andi ebe wene andi ugunem inesanggo to'motfuluk, suetninung pilingitarek wene andi pilingitunem enek he, inesanggo langhogo holhi logogun andi.

⁵ It a'nogo hilingitu kwelegat he, hat he, yi mene ti mene faget, hobabut hebelogo logolik, hoba yi enggin ti enggin hikhi logolik, hafe morogoat logoino. Fano wene yagaisilik nikharek andi meneat esinet fuluk he, Allah nen, ”Yi'nogo leberisikhi logoino,” iluk, hayonggo fesikhe mene andi ekhe herakfisigi'legat higithogo hilingiti logoino.

⁶ Afuni nen an nebe Allah faget namep wulagaisogo noasugun oba arat horogasi waga o. A'nogo noasumo, an nebe neisena oba lagain higirat agama welagi o.

⁷ Sa awewerek-sa awewerek lagaikharek hak, an nendawinggen eberogo nenat Allah oba himbirik mondok logolik, at faget nomamerogoat fano hilingirik waga lagarik he, huliba arat asi wagi o.

⁸ Afuni inawe walhugunem, inawe uan agaikharek mene onggo fano mene wogisagarek hak, an nebe arat lagunem, ninoe Enupogoren wene ninoba figik, kotik, higithogoat igin andi sambul, aren he, ”Hat higirat hilingiti lagenma,” iluk, onggo fano mene ekhe wo'nesigin werego. Mene re, an enek wo'nesigin fuk. It ekhe inendawimo nen he, ”Yesus we'nige,” iluk, inamolo nen nenangorogo welagaikharek mene halok inebe mondogat ninom wo'nisagain aro.

At Paulus nen he, ”Timotius, noba we'no,” iluk yagatikhe wene

^9-11 At Demas a'nogo kweangma mene yoma amolo nen, an heraknobagaikhesik o Tesalonika lagama. Nen, at Kreskes, o Galatia lagik, Titus o Dalmatia lagik, agama re, at Lukas nek nemberek welago andi nen, hat weak-weagat noba we'nogen he, homamerogo walhikhi logoino. A'nogo walhikhi logombik wesigeluk halok he, Markus a'nogo obabut he, an Allah faget hilingitunem fano lebetneagain werek andi nen, ebe hondorik-hondorik noba we'no.

¹² Nen, at Tikhikus a'nogo, o Efesus loageluk lakfigimo o.

¹³ Hat waga logolik he, su sogoi su endakwe labetirek mene a'naga inom, wene lisu palek fena omanaga inom wanhi logolik, ebe esin he, wene wam domba agap nonggolek meneba lisu palek a'naga inom, o Troas at Karpus aiba andoma fuluk wagimo omanaga mondogat waluk we'no.

¹⁴ Nen, at Aleksander tembaga mene posie hak hilingiterek mene a'nogo nen, an hokhorogoat weagetnafemo welagi. Mene re, at ninoe Enupogoren at hilingite andi higithogoat wene oba fagain werego.

¹⁵ At andi ebe wene niren yagaisikhi lago mene ninane sagalogo herakfisaluk hilingiti laga andi nen, hat hobabut hebelogo logoino.

¹⁶ Afuni nen wene noba fesukwasik, nanema omanggum wanhunem, an nen he, ”An noba le'ma aro,” iluk wene noba korugunem, it mondogat an nera'lu ekhe welagi'legat heraknobagaluk wulifa andi faget, Allah nen wene inoba figi'lek logouwageluk samban ikhi lagi.

¹⁷ A'nogo meneat he, an nen ebe wene furogo yagaisugunem, it endakwe mene inebe mondogat inesanggo holuageluk, ninoe Enupogot an nera'lu logolik, nomametnafesik, mene olomene anini weak mene a'nogo ambelema were'ma telnabu hak, noasu mene telnafe andi.

¹⁸ A'nogo telnafesik, hobuk afuni nen yi weak ti weak hilingnabuogeluk ugunem, arenat telnafi logombik he, telogo wo'narek pogoroba at awe a'ma logogun oba andoma kwigin andi faget, at fogeratu mondok logouwok, iluk, ”Amin,” igi andi.

Wene wurep kobokhogo hai warinafikhe wene

¹⁹ He Priskila inom, agun Akwila inom, at Onesiforus againafuri inebe mondogat inom, ”Paulus nen hai wathinafe,” iluk yagaisano.

²⁰ At Erastus a'nogo o Korintus kamo ikhe andi. Nen, at Trofimus a'nogo oba ouat weregen, o Miletus fuluk wagi andi.

²¹ Hat he, o meiso nunggunem sogoi weak agarek a'nogo oan agi'lek werek kwelek, yabaat weak-weak wesigeluk homamerogo walhikhi logoino. At Ebulus inom, Pudes inom, Linus inom, he Klaudia inom, ninerugwi ninagaila'lak Allah againafuri mene mondogat ekhe nen hai wathafa o.

²² Ninoe Enupogot obabut fano a'nogo nen fetharek welagik, nineisena Allah fetninarek welagarek mene a'nogo nen hinebe mondogat fanothinafik, ikhi logouwago.