2 TIMOTIUS 3 - Allah Wene Fano Wene Hupla Inane

Afuni inobabut o wurep oba logolik hilingiti logogun mene faget yagatikhe wene

¹ Wene yi hendawimo eberek logoino o. O wurep oba enggin-fenggin asi wesigin mene werego.

² Afuni inendawinggen tulem he, inonggwarek inebe faget inom, uang faget inom, esinet figik, inonggwaregen fogerakhigik, sewirakhigik, inane puk weak wenagisigik, ineisugwi inagaisawi inane holhi'lek herakfisigik, hai warinafi'lek inobabut lagi-lagorek hilingitik, Allah faget hilingiti'lek inabit welagik,

³ afuni inebe inendawirogo welagi'lek inabirat welagik, it ekhe inom weak hilingi'luk sebelogo herakfisaluk logou re, inabirat welagik, inabok weak palhik, inobabut lagokhogo hilingitik, inobabut harorogo hilingitik, fano mene hilingisu inabit logolik,

⁴ inebe misigat mene it ekhe nen inoasuageluk yonggo lagik, inobabut al hatokhogo hilingitik, inonggwarek agaugwerakhigik, Allah ebe inendawirati'lek, afuni inendawimo inagaiyekhogo hilingitarek andi meneat inamolo welagik,

⁵ afuni ineilhanem he, Allah againafuri hangge logolik, inendawimo nen Allah omame andi mene herakfisigik, ikhi logogun o. Yogondak afuni inobabut andi hangge ekhe hilingiri'lagwi mene halok, hinom hundik logogubo.

^6-7 Hemi fena yi mene ti mene inendawimo nen inamolo anggaluk, weak hilingi'luk inendawinggen enggin logolik wene yanggulho mondok welagaikharek meneat he, ebe wene furogo wanhi'legat were'ma, it ap inobabut a'nogo hilingiri'lagwi mene andi nen, hemi andi inawilokwe ineranen yandalonhogo kuluk, inaneba lalinafi logolik he, inebe hele warogo hak fakfisili'lagwi andi.

⁸ Attagat, it ap Yanes inom, Yambres inom, Musa ane sagalogo herakfisaluk hilingitukwa hak, it andi ebe wene sagalogo herakfisaluk weak hilingiti logolik, inendawimo nen wene higit mene ebeti'lek, weak mene eberi'lagwi andi. A'nogo eberi'lagwi andiba, inendawinggen Allah oba himbirik mene kobokhogo herakfisaga iluk, enegat asigin andi.

⁹ It Yanes inom, Yambres inom, weak hilingitukwama, it ekhe nen, ”Inendawinggen lek,” iluk enegat futfesukwa hak, it andi a'nogoat inendawinggen lek hilingiri'lagwi iluk, afuni mondogaren inobabut enegat palumo re, it inane andi ebe asigin lego.

Timotius endawinggen wurikhogo logouwageluk, wurep oba komotikhe wene

¹⁰ It andi inobabut a'nogo enegat asigin meneat he, hat he, an nen wene yagaisigirek mene inom, nobabut hilingitirek mene inom, ”Yi'nogo hilingisigin,” iluk nendawimo anggigirek mene inom, nendawinggen Allah oba himbirik welagirek mene inom, wene nendawimo uanhogo ebetirek mene inom, afuni mondogat nendawirogo welagirek mene inom, nafe morogo welagirek mene inom, fagearen futnobagakhi lagen aro.

¹¹ Afuni nen yi enggin ti enggin hilingnafunem, noba enggin weak higirek a'nogo helu aro. Afuni o Antiokhia nen, Ikonium en, Listra nen, weagetnafu kwelegat were'ma, ninoe Enupogoren enggi ekhe kamo igi'lek telnafi lagaikhe andi.

¹² Nit Kristus Yesus ninom hundik logolik, Allah faget fanorogo hilingiti logouwogeluk ninendawimo anggikhi lago mene halok, ninebe lombok mondogat yi enggin ti enggin hilingninafi logogun aro.

¹³ Weagetninafu kwelegat, it ekhe weak hilingiti logolik lalinabi'lagwi mene andi, it ekhe nen lalinafunem, iren onggo-onggo lalinafigat ikhi logolik, weak arik-arigat hokhorogo weak asugun andi.

¹⁴ Iren a'nogoat hilingitarek meneat he, hat enek he, nit ninebe helu mene nen ebe wene yagahetugumo, haren he, ”Eberogoat,” iluk wanhigin mene andiat ninghogo fisogo logoino.

¹⁵ Hat hebe yenggerek oba nenat Allah ane lisu palek helu welagen mene andi hendawimo eberek mondok logoino o. A'nogo logolik, hendawinggen Kristus Yesus oba himbirik were'ma, Allah nen telhabigin mene futfeinogeluk, at ane lisu palek andibaat hendawimo elogat kagaligin werego.

¹⁶ Allah ane lisu palek andi mondogat he, arenat inendawimo kagalhikhemo, lisu palogo fesukwa mene andiba, afuni ekhe wene ebe wene yagaisigik, weak hilingitunem komorinafik, inobabut hebelhik, Allah endawimo amolo anggikherek mene higithogo hilingiti logouwageluk komorinafik, ikhi logoino aro.

¹⁷ Afuni inebe lombok inebe Allah faget fisaluk logolik, yi mene ti mene at faget fano hilingitarek mene andi higithogoat inendawinggen wurikhogo hilingiti logouwageluk, Allah ane lisu palogo wo'nisasikhe andi.