2 TIMOTIUS 2 - Allah Wene Fano Wene Hupla Inane

Timotius ebe Yesus inom hundik logouwageluk komotikhe wene

¹ Timotius namlogo e. Nit Kristus Yesus ninom hundik were'ma, Allah obabut fano nen wo'nisikherek mene andiba hendawinggen wurikhogo logoino.

² An nen wene afuni hokhorogoat ineilhanem yagahetigimo wanhigin mene a'nogo, haren it afuni ekhe inobabut humbunsek mene nen it ekhe yagaisikhi logouwageluk, inoba feino.

³ Ap kaindek mene inogogwi inane hologo weim yafi logolik, yi enggin ti enggin hikhi logolik yafarek hak, haren Yesus Kristus ane hologo, yi enggin ti enggin hikhi logolik, hafe morogo hilingiti logoino.

⁴ It ap kaindek andi, inogogwi kaindek inendawimo inagaiyek asuageluk weim yafi logolik, yi mene ti mene oloba mene oba ebeti'legat yafarek andi.

⁵ Nen ekhe re, sa awewerek-sa awewerek laga logolik, ap inayonggo fikherek mene nen, ”Yi'nogo hilingisugun,” iluk ikherek mene ane hologo lagi'lek halok, ”Awewerek aga mene, ap yiat,” iluk, onggo kware-kware ha'mene andi ikfisogoin elo'lego. We, ane hologo lagu halogat ikfisogoin o.

⁶ Nen, ekhe re, afuni ekhe ineabu heligik, awi yagaisogo set kwalogo hilingiri'lagwi mene andi ebe wurik agunem he, inonggwaregen tak nenggarek andi.

⁷ Wene an nen yagaheti mene andi hendawimo ebeti logogin halok, ninoe Enupogoren mondogat furogo yagahesigin werek andi nen, oba ebeti logoino o.

⁸ An fano wene yagaisilik nigirek andi re, Yesus Kristus, at Daud en tagongge meneat ebe watukwama, Allah nen eluget fesikhe wene andiba hendawimo eberek mondok logoino.

⁹ An fano wene a'nogo yagaisilik nugunem, it afuni ekhe nen, it ekhe weak hilingiri'lagwi mene hilinginabu hak, an yi enggin ti enggin hilingnafik, nenggi hele watik, ili'lagwi meneat he, Allah ane andi hele homasugun elo'lego. We, hele fikhalegat werek.

¹⁰ Andi nen he, it afuni ekhe Allah nen wenaginafikhe mene halok, Kristus Yesus inom hunisumo inebe telinafik, ineluk fano mondok logouwageluk fanorinafik, uageluk he an a'nogoat weagetnafu kwelek nafe morogo welagirek andi.

¹¹ Wene mel iluk agarek yi re, eberogo aro: Nit At ninom wa'lago mene halok, At ninom nineluk mondok logogun aro.

¹² Nit ninafe morogo logogun halok, afuni At awe a'ma kuluk logogun mene andi, nit ninomenat ferinarek logogun o. Niren he, ”Yesus ninoe lego,” iluk, At ebe mondok herakfisogo halok, Aren he, ”It an nagoromi legaro,” iluk, herakninobagagin aro.

¹³ Mene re, At onggwaregen, ”An nobabut attak welagi mene andi lego, iluk hunogoat munenagarek lek andi nen, nit At oba hundik logogun lek halok, aren nit ninoba hundik mondogat welagarego,” iluk, agarek andi eberogo aro.

”We wene herakfisaluk, ebe wene andiat komorinafi logoino,” iluk, yagatikhe wene

¹⁴ Wene yagaheti mene andi mondogat it ekhe inendawimo eberogo yagaisikhi logoino. Yagaisikhi logolik, we, inane mene fagerat wene pali'lagwi andi Allah eilhanem fanorogo komorinafi logoino. A'nogo wene pali'lagwi andiba, fano hilinglasigin lego. We, it ekhe inesanggo holiluk, weak asugun aro.

¹⁵ Allah nen he, ”Hat an faget fano hilingiti lagen,” iluk yagahesuagen he, ho mamerogoat hilingiti logoino. It ekhe yi mene ti mene hilingisuageluk inayonggo fugunem he, fanorogo hilingiti logolik, inenggali lekhogo hilingitarek andi hak, haren ebe wene andiat higithogo yagaisikhi logoino.

¹⁶ Mene re, it afuni ekhe nen ebe wene andi le'maat, tulemat, lek asigin mene ili'lagwi andi, herakfisaluk kwanirogo laga logoino. It andi a'nogo ikhi logolik, Allah ebe herakfisaluk yatma hak hela wulibi'lagwi andi.

¹⁷ Wene ebe wene le'maat yagaisili'lagwi mene andi, afuni inoumo aik palinafunem, ebema a'luk hokho agarek hak, it andi inane a'nogoat ili'lagwi andiba, it ekhe hokhorogoat weagerinabi'lagwi andi. Ap Himeneus Filetus emberek a'nogo hilingiti logolik,

¹⁸ ebe wene herakfisaluk kwanirogo wulifukwasik, iren he, ”Allah nen afuni warek mene inelugerinabigin iluk abok isikhe a'nogo arat hilinglagama yi,” iluk, it ekhe yagaisugunem, inendawinggen Allah oba himbirik werek mene weagerinabi'lagwi andi.

¹⁹ Mene re, Allah nen o tik hak watikhe mene ningsek mondogat logogin andiba lisu mel iluk palek werek andi: ”Ninoe Enupogot onggwarek againafuri wenaginafikhe mene andi inebe elu o,” iluk isikhe. Nen, wene ekhe re, ”It ekhe nen he, An nebe ninoe Enupogot amlogo aro, iluk, ili'lagwi mene halok, Weak hilingisugun ninabiro, iluk herakfisaluk kwanirogo helalaga logouwago,” iluk, isikhemo lisu palek werek andi.

²⁰ O hokho wuri'mo elonggoma re, yi mene ti mene emas mene inom, perak mene inom, hilingitarek mene onggo hokho andi mene nek welagarek fuk. We, e mene inom, kweang mene inom, hilingitarek mene welagaregat andi. Wene hokho mene hilingisuogeluk halok, mondok fano mene wanhik, wene endep mene hilingisuogeluk halok, we meneat wanhik, agarek andi.

²¹ Andi hak he, sa nen onggwaregen weak hilingitarek mene andi horogo herakfisaluk, ebe Allah faget fisaluk were'ma, arenat yi mene ti mene fano mene hilingisigeluk, ”Arat fano,” iluk, ayonggo fagain andi.

²² Andi nen he, hat he, it ap alage mene nen inoba aigage lagaluk weak hilingiri'lagwi mene andi herakfisaluk, heise laga logoino. It afuni ekhe inendawinggen fano misigat logolik, ninoe Enupogot ayonggo fili'lagwi mene andi hinom lambulogo logoino. Hinomat he, higithogo hilingitik, Allah oba hundik welagik, afuni inebe hinendawirogo welagik, afuni inom liokhogo welagik, agarek andi meneat murok laga logoino.

²³ A'nogo hilingiti logolik, it afuni ekhe inendawinggen mum mene nen wene inonggot logolik, inane mari'lagwi mene andi ambisangma re, wene it-it inom weim hak yabi'lagwi andi nen he, it hinom sebeti logou fuk.

²⁴ At sa nen ninoe Enupogot faget hilingiti logolik, a'nogo hilingisugun lek. We, afuni mondogat obabut liokhogo inom logogun o. Afe morogo logolik, afuni wene fanorogo yagaisikhi logogin.

²⁵ A'nogo yagaisugunem, it afuni ekhe nen at ane sebeluogeluk ugunem, aren ane liokhogoat komorinafi logogin. A'nogo komorinafunem, it weak hilingitarek mene herakfisaluk, ebe wene andi wanuageluk, Allah nen inendawimo kagaluago, iluk komorinafi logogin.

²⁶ A'nogo komorinafunem, at Iblis endawimo anggikherek mene hilingiti logouwageluk inebe paik hele fugunem ke'nok ikherek hak ke'nok uba nen, hobuk inobabut hebelumo Allah nen fikhalogo wulakfisagain aro.