2 TIMOTIUS 1 - Allah Wene Fano Wene Hupla Inane

Hai watikhe wene

^1-2 Timotius nendawi mene namlogo e. Allah nen he, ”Hit Kristus Yesus hinom hundik were'ma hinelugethinaferek,” iluk, abok yaganisasikhe mene andi, an Paulus nen yagaisilik nikhi logouwageluk, endawimo anggasikheba Kristus Yesus nen nayonggo fesikhesik laknobagai wagaikhemo, yoma logolik wene yi lisu palogo hoba lakfei wagi andi o. Nineisena Allah inom, ninoe Enupogot Kristus Yesus inom, emberek inobabut fano a'nogo nen, fano mene wokhetik, inendawithafik, hendawinggen hambugethafik, ikhi logouwago.

Timotius endawinggen Allah oba himbirik logouwageluk, komorogo yagatikhe wene

³ An nombalak Allah awe a'ma logolik, inonggwarek inendawinggen misigat fano logolik, at faget hilingitik, fogeratik, ikhi lagaukwa hak, an a'nogoat hilingiti logolik, hat hoba mondok eberegat, hat faget linggene hubanggo samban ugu mondogat logolik, Allah hai wati lagi o.

⁴ Hat le agagin a'nogo nen, nemberek ambi a'luk, hendawimo fano agunem, nendawimo nagaiyek fanorogo anggageluk, ”Nemberek ambi a'lo e,” iluk, hoba eberek welagi o.

⁵ Logolik, hendawinggen Allahba eberogoat himbirik welagen iluk nendawimo eberegat welagi. Attak hombalo Lois inom, hagaisa Eunike inom, inendawinggen Allah oba himbirik welagaukwa hak, hat hendawinggen a'nogoat welagen iluk futhobagakhi lagi aro.

⁶ A'nogo himbirik welagen andi nen he, an nen nenggi hunggul sebelhunem, Allah obabut fano nen, ”Hat yi'nogo hilingiti logoino,” iluk hobabut wokhetikhe mene andi, endu nonggwalharek hak, hendawimo aganhan asimbik logoinogeluk hendawimo kagalogo yagaheti o.

⁷ Allah nen ninobabut wo'nisikherek andi re, ninailorogo logouwageluk wo'nisikherek fuk. We, ninomamerogo welagik, afuni ekhe ninendawirogo welagik, ninendawinggen sebelek welagik, ikhi logouwageluk wo'nisikherek andi.

⁸ Andi nen he, ninoe Enupogot abok afuni ekhe yagaisageluk henggali legat fakhogo yagaisigik, nen, an at fagerat nenggi hele warogo nobagagama welagi yi faget, henggali lek halonghogo welagik, ikhi logoino. A'nogo ikhi logolik, afuni ekhe nen fano wene andi faget, yi enggin ti enggin hilingninafu kwelegat, an Allah omameba welagirek hagat, hafe morogo logoino.

⁹ At Allah nen ninebe telninafik, at onggwarek againafuri asuageluk ninayonggo figik, isikhe andi re, niren ekhe hilingituguba ninayonggo fesikhe fuk. Athe, Allah obabut fano nen, attak yi mene ti mene oan elalhi'lek logolik, hobuk Kristus Yesus hilingisigin oba fanotninabigeluk, onggwarek endawimo nen anggaluk ninayonggo fesikhe andi.

¹⁰ A'nogo anggasikhe mene hinago were'ma, hobuk Kristus Yesus telninaferek mene ebe weinam agaikhe andiba enegat agaikhe andi. At ane fano wene andiba, wa'lari'lagwi ero andi mabenetfisigik, wa'lagi'lek nineluk mondok logogun mene andi, weinametfigik, isikhe.

¹¹ A'nogo isikhesik, an fano wene andiat yagaisigik, komorinafik, ilik nikhi logouwageluk nayonggo fesikhesik laknobagai wagaikhemo nikhi lagi andi.

¹² A'nogo laknobagai wagaikhemo nikhi lagi andi nen, afuni nen yi enggin ti enggin hilingnafu kwelegat he, nendawinggen sa oba himbirik welagi, iluk nelu andi nen nenggali agi'lek, nendawimo hambukhogo welagi. Aren he, ”An mene yi fetnarek logoino. Fetnarek were'ma, huli an nebeat wesigin o,” iluk, noba fesikhesik nayonggo fesikhe mene andi, onggwarek omameba elok fetnarek logogin o, iluk nendawimo futfikhi lagi.

¹³ Wene an nen yagahetigimo wanhigin a'nogo, an nobabut wanimbik, nit Kristus Yesus ninom hundik logolik, ninendawinggen at oba himbiret figik, afuni ekhe ninendawirinafik, ogorek hak ikhi logolik, hendawimo nen he, ”Fanotninaferek mene wene ebe yi aro,” iluk, ninghogo fisogo logolik yagaisikhi logoino.

¹⁴ Allah nen he, ”Wene fano mene andi afuni ekhe nen weagetfeinogo iluk, fanorogo fetnarek logoino,” iluk, ninoba fesikhe mene andi, at Areagun ninendawimo fesikhemo werek mene andi omameba fanorogo fisogo logoino.

¹⁵ It afuni o propinsi Asia yi awi ti awi mene omanogo inebe mondogat an heraknobagaluk pugulogo wulifi logolik, at Figelus inom, Hermogenes inom, inomat pugulha andi hat heluat welagen o.

¹⁶ A'nogo meneat he, at Onesiforus againafuri inom enek he, hundik-handik, nendawimo fanorogo nendawinggen sebeli weri'lagwi andi nen he, ninoe Enupogoren endawirogo ferinarek logouwago. An nenggi hele warek were'ma noba wesu enggali legat,

¹⁷ o Roma wagasik he, weak-weagat heinok wo'nafi lagasik, nebe hera'nabi waga andi.

¹⁸ Ninoe Enupogot obabut fano nen higithogo hilingisigin andi sambul, at Onesiforus andi ebe endawi asuago. At fageat he, o Efesus logolik, an hokhorogo lebetniikhi lagaikhe a'nogo, hat furogo helu aro.