2 TAWARIKH 8 - Allah Wene Fano Wene Hupla Inane

At Salomo enggiba nen hilingitikhe wene

¹ Salomo nen he o Tuhan Awi inom, at raja onggwarek ebe werek oba inom wutu kwelek enek he 20 tahun nen hilingitikhe.

² Raja Hiram en o kota wogetikheba omanogo ogo nekhengge wutikhesik it afuni Israel mene andoma logouwageluk yagaisasikhe.

³ Aren he o Hamat inom, Zoba inom, teligik,

⁴ o leimo ekhe kota enu Tadmor a'nogo omamet figik, hilingfesikhesik he yi mene ti mene foukhogo werek oba iluk o Hamat andoma wutikhe.

⁵ O kota Bet-Horon abel ambolkwe mene inom, Bet-Horon a'makwe mene inom, telhikhe mene aremnogo re ambotkwe o kota ebe inom kwe sou inom mondok omamerogo wutfesikhe.

⁶ Andi nenhe aren nekhengge o kota Baalat a'nogo wutik, o kota mondogat yi mene ti mene foukhogo fuguba omanogo wutik, kota wam sapi nen li'luk lagarek oba weim yabik laga lagaukwa mene kereta inom, wam kuda inom, eroma a'nogo wutik hilingitikhe. Aren o Yerusalem kwe inom Libanon kwe inom wilayah at a'ma welagaikhe kwe inom wusigin iluk endawimo ebetikhe kwe omanogo mondogat wurik lagaikhe.

^7-8 It afuni inunggulenu Kanaan mene inambisangma nen tagomangge mene, Het inap inom, Amori inap inom, Feris inap inom, Hewi inap inom, Yebus inap inom, it Israel inaben o kweang andomaba kwi laga logolik, mondogat inoatukwa lek mene omanogo re at Salomo nen ane omameba yagaisugu kwelek yabu hilingiti logouwageluk kwelaginafukwa. Iren tagomangge mene re yogondak huli nen he it Israel mene inamingmingengge aga logolik enek werek.

⁹ It afuni Israel mene re yabu ane omameba hilingisuageluk yagaisigi'legenggere, it he ap sikhe fisogo mene welagik, nogogwi perwira welagik, kereta elelema kuluk weim yabik lagaikharek mene a'nogo melalinafu mene welagaik, nen it kuda amboloba lagaluk weim yabi lagu mene fisigik, ikhi lagaikhe.

¹⁰ Nen, it ap yabu inane omameba melalinafu kwelek hilingiti logouwageluk he, ap halinafi logogun mene inebe 250 nen fisasikhe.

¹¹ At Salomo nen endawinggen wenggel hikhi logolik he, ”It afuni Israel mene inoe raja Daud welagaikhe kwe mondogat andoma re, peti Wene warek a'nogo fisogo welagaikhemo obalik mondok enek oba enggere, an nagwe re Daud ailoba oma logogin lek,” iluk wenggelhikhesik he at Salomo nen agwe hun raja awi Mesir mene a'logo waganek welagaikhe mene a'nogo o Daud awi kota ba omanogo nen waluk he o aren agwe andi faget wutikheba omanogo fei lagaikhe.

^12-13 At Musa nen wene melalek palhikhe mene a'nogoba higithogo re linggene hokho mene aremnogo hilingik aplerogo wam wati logogun iluk isikhemo re: Linggene Sabat sambul faget inom, Linggene Tugi Ket mene folelhu halok faget inom, Linggene tahun misik oba misik sambul kabogeti lagaukwa mene faget inom, Linggene Roti Fiterek lek meneba werago nunggu sambul faget inom, Linggene Enggen Ugu Palhu mene faget inom, Linggene O Sabu Enggaba salhigik welagaukwa mene ebetikhi logolik faget inom, at Salomo nen o Tuhan Awi elokhoma aremnogo Tuhan faget warogo noletuba mezbah wutikhe meneba a'nogo wam warogo noletikhe.

¹⁴ A'nogo hilingitikhesik he at eisena Daud en wene melalek yagatikhe mene higithogo re it ap imam omanogo nen yabu linggene hundik-hundik hilingitu mene faget inom, it ap Lewi inaben wuniba Tuhan enu fogeratik, it imam en wene kabogeti logolik hilingitunem omanogo leberisigik, hilingiti logouwageluk wenagaisogo fisasikhe. Nen, andi nen he at Daud Allah amingmingengge a'nogo nen wene yi'nogo ti'nogo iluk isikhe mene higithogo re it ap o Tuhan Awi wurik mene a'nogoba kagalek werek mene iluk welagaukwa mene a'nogo re o ebekwe kwi lagukwe aremnogo higit-higit wenagaisogo fisilik lagaikhe.

¹⁵ It imam omanogo nen inom, it Lewi inaben inom, o yi mene ti mene fuguba gudang a'nogo faget yi'nogo hilingiti logogun iluk at Daud en enekhogo yagaisasikhe mene a'nogo re iren futfuluk higithogo nek hilingiti lagaukwa.

¹⁶ A'nogo hilingitukwa huli andi nen he at Salomo nen o wusigin iluk wenggelhikhe mene a'nogo, tik watukwa huli nen o Tuhan Awi a'nogo ebe mondogat wutukwa huli andi re mondok fanorogo nek wutukwa.

¹⁷ A'nogo hilingitukwasik he at Salomo a'nogo o Edom en i laut unggul fikhit, o enu Agaba kapal andoma kwi wagarek oba o kota wurik welagaikhe mene enu o Ezion-Geber inom, Elot inom, andoma huli lagaikhe.

¹⁸ At a'nogo lagaikhesik hilingitunemen he hun Raja Hiram a'nogo nen he at Hiram onggwarek agoromi nen kapal waluk nikharek mene inom, it kapal andiba nikhi logolik, hilingirik nikharek mene mondok inelu-pinelurek inap inom, ambit lakfisa wagaikhe mo re at Salomo agoromi inom he o Ofir lagaukwasik andoma nen emas enggin he 15.000 kilogram hilingik engge waluk Salomo ambit wagaukwa.