2 TAWARIKH 7 - Allah Wene Fano Wene Hupla Inane

Tuhan Awi a'nogo kwe hutukwa wene

¹ Raja Salomo a'nogo mondogat samban isikhesik hilingitunemen he, endu pogoroba nen pi waga logolik, wam Tuhan obaget warogo nolhuba fesukwa mene omanogo mondogat endu a'nogo nen nasikhe. Nen, Tuhan ombak-bak selek a'nogo re o Tuhan Awi wuri'mo a'nogoba petesi pi wagaikhemo re,

² it imam omanogo elonggoma kwi la elo'lek mondok agaikhe.

³ Ariginhikhe sambul andi it afuni Israel mene nen endu pogoroba nen pi wagik, Tuhan Aselek ombak-bak a'nogo Tuhan Awi wurik a'nogoba hoposi pi wagik, ugunem a'nogo ineilenggen mondogat hasukwasik he, At Tuhan mondok fano mene nen endawi hundik mondok-mondok ninafi logolik were'ma, iluk Tuhan fogeratukwa.

⁴ A'nogo mondogat hilingitukwasik he at raja Salomo inom, it afuni holhu mene omanogo mondogaren inom Tuhan obaget wam warogo wogetukwa.

⁵ Wam iren warogo wogetukwa mene andoma re, sebet ninabuageluk faget he at Salomo nen wam sapi 22.000 nen inom, domba re 120.000 nen inom wogetikhe. O wene kabogetuba a'nogo Tuhan wogeti logolik, at Salomo inom, it afuni holhu mene inomen he a'nogo hilingitukwa andi.

⁶ A'nogo hilingitunem he it imam a'nogo re inobalik it faget enogo fesukwaba aremnogo mendek welagaukwa. It inelokhe tukhum he it ap Lewi mene re, at Daud en a'nogo hilingiti logogun iluk mene higithogo re, inambinggong raja Daud en a'nogo hilingiti logogun iluk isikhe aplerogo re, inambinggong raja Daud en hilingitikhe mene omanogoba kong eti logolik, wuni re, ”Tuhan endawi hundik inaferek mene andi re etok mondok logogin mene o i,” iluk ikhi logolik Tuhan fogerati lagukwa. Nen, it afuni holhu mene omanogo inebe mondogat mendek werek kwelek imam omanogo re trompet a'nogo futi lagaukwa.

⁷ Andi nen he at Salomo nen mezbah perunggu meneba wutikhe mene a'nogo re obalik mondogat endepse'ma re, wam abirengge omanogo aremnogo nek nolhu aple onggok-fonggok ikhi lagaikhemo re, o wene kabogetuba a'nogo elokhe fikhit ambe ekhe tulem mene a'nogo re at Salomo nen Tuhan obaget enogo fisasikhe. A'nogo fesikhesik he, aren warogo noletu mene inom, gandum enggen inom, wam asei Tuhan endawimo agaiyek hoageluk mene omanogo inom, Tuhan nen fanoabet ninobagauwageluk mene omanogo inom, andoma nen noletukwa.

⁸ A'nogo hilingitukwasik he ariginhukwa sambul a'nogo re at Salomo inom, afuni Israel mene mondogat inom he, linggene O Sabu salhigik welagaukwa mene a'nogo obaget ebethugu logolik, inenggi sabiren welagaukwa. Linggene andi faget kabogesuogeluk he it afuni inebe o Hamat kwe lagaikharek abel utara fikhit walek po'lima nogo nen he o Mesir huli-hulimo selatan fikhit ma'lima nogo huli nen kabogesi wagaukwama re afuni inebe esa mondok hokhorogo kabogesi kwi wagaukwa.

⁹ Kabogesi wagaukwasik linggene sabiren he mezbah Tuhan obaget wutukwa mene a'nogo faget kabogeti lagaukwa, nen linggene sabiren ekhe re, O Sabu wurogo welagaukwa mene a'nogo faget kabogetukwa. A'nogo hilingirik wagalagaukwasik he, inenggi wurep kobokhogo mene a'nogoba mondogat kwe yagatukwasik he,

¹⁰ Ohealekwe re tanggal 23 bulan sabit meneba werek kwelek he it afuni omanogo inaiba loageluk at Salomo nen yagaisasikhemo, inaiba lagaukwa. Nen, iren he Tuhan nen againafuri inunggulenu Israel mene inoba inom, at Daud oba inom Salomo oba inom, mondok fano mene nek hilingfisasikhe andiba re, inagaiyegerik lagaukwa.

Nekhengge At Tuhan Salomo oba weinam asi wagaikhe wene

¹¹ At Salomo nen o wusigin iluk wenggelhikhe mene higithogo re, o Tuhan Awi a'nogo inom, at raja onggwarek werek oba a'nogo inom, ambisangma mondok fanorogo nek wut fesukwama re,

¹² o hubanggo nekhengge At Tuhan Salomo oba weinam asi wagaikhesik, yagati logolik he, ”Haren samban egen mene andi re An mondogat nesanggo holhi, nen o yire enogo An nobaget wam yi mene ti mene warogo nolnesi waguba iluk An mondogat heligi o.

¹³ It afuni An nagainafuri yi weak hilingitu aple nen An nen he meiso pelabi wagi lek welagik, ineabu kwe yago mene andoma mondogat legasuageluk pulue lakfei wagik, ou amben sanghogo wanharek mene lakfei wagik, hilingitunem,

¹⁴ it An nagainafuri An nenu hombuk palogo agarek mene andoma inendawi sebel fakhigik, samban An noba yaganesi wagik, weak hilingiri'lagwi mene andoma herak figik ugun halok he, An nebe pogoroba nen iren yaganesugun mene andi nesanggo holhi logogin. Holfuluk he An nen it inaweak leget figik, it inaggweang oba nekhengge inangge yi mene ti mene mondogat sik-pikhogo hilingik fisigik, ikhi logogin.

¹⁵ An nen o An nawi yi ba neilenggen lourek mondok welagik, o yi nen yaganetu mene inane nesanggo holek mondok welagik, ikhi logogin.

¹⁶ O yi re An nen, it afuni nen wene kabogeti logogun oba, iluk wenatirik enogo figimo re, mondogat andi re An nen hilingiti logogin. Mondok-mondok andomaba re An nen fut figik, halogo figik, hilingitu logogin.

¹⁷ At heisena Daud en hilingiti laga hakhogo, harogo, An nen anggugu aple nek hilingitik, An nawene melalek yi'nogo hilingi'no ti'nogo hilingi'no iluk An nen isigi mene a'nogo hologo hilingitik, hilingiti logogin halok he,

¹⁸ An nen hat heisena Daud oba wene wareti logolik, Hat hambisangma mene re hundik-hundik it afuni Israel mene faget raja menlaga logogun, iluk wene waretigi mene a'nogo tiphogo hilingisigin.

¹⁹ Oba nen he hat inom it afuni hagainafuri holhu mene andoma inom, An nawene melalek werek mene a'nogo sagalogo herakfuluk tugwi kembuba nen allah ap-ap hilingfuluk fogeratarek mene omanogoba fogerati logogun halok he,

²⁰ o kweang hit wokhisigiba yi nen hit hinebe wulak hinobagagin. Nen, o wene An nobaget kabogeti logogun oba iluk An nen katukhogo figi mene yi herakfuluk lagainat. A'nogo hilingisumo re o ekhe kwe ekhe kwe nen he o yi faget enu weagerogo figik, endo yagaisogo figik, ikhi logogun.

²¹ Yogondak he o wene kabogetuba yi faget he mondok lego mane anggaluk legeisogo fili'lagwi, oba nen he, andem oba afuni kwe andoma lagu mene nen ineilenggen haluk he, Yago o yi inom, kweang yi inom, oba ari re Tuhan nen he ninggi'nogoluk hilingitikhe? iluk inailoti logogun.

²² A'nogo hilingitunem he afuni nen ikhi logolik he, iren ineisena Tuhan Allah inambu inombalak o Mesir en woginarek wulibi lagaikhe mene a'nogo herakfagasik, iren allah amu mene omanogo inom wene wathasik he oba fogeratu weregen o. A'nogo hilingiri'lagwi andiba re enggin mene yi Tuhan nen it inoba fei waga yi, ikhi logogun,” iluk yagatikhe.