2 TAWARIKH 6 - Allah Wene Fano Wene Hupla Inane

Raja Salomo nen afuni a'nogo inoba wene menfesikhe wene

¹ A'nogo hilingik kwelek arem nogo at raja Salomo nen samban ikhi logolik he mel isikhe, ”Tuhan neisena, hat he anggulok muli meneba werek aplere mondok hamolo.

² Yogondak he an nen hat hawi mondok hokho mene hat hebe mondok-mondok logogin oba wuti andi,” iluk samban isikhe.

³ A'nogo samban isikhesik he at raja a'nogo afe hebelogo it ap holhu mene a'nogo werek fikhit agaikhesik, Allah nen it afuni a'nogo inoba fanoabet fisoageluk kino isikhe.

^4-6 Aren kino yagati logolik he, yi'nogo isikhe, ”Tuhan neisena, Haren ikhi logolik, An nagainafuri o Mesir en woginarek wagagi sambul en yogondak huli re, o it afuni Israel mene were'ma andoma o An nobaget wusimbik An nawi wene kabogeti logogun oba re andem, iluk An nen o kota misik ekhe wenagaisogo fesigi lek, nen, it afuni An nagainafuri melalinafi logouwageluk ogo ap misik ekhe wenagaisogo fisasigi legat. Oba nen he yogondak An nen o Yerusalem a'nogo An nawi wene kabogetuba wenagaisogo figi. An nagainafuri andem melalinafi logoinogen iluk he hat Daud wenagaisogo hobagagi, iluk attak Tuhan Haren an neisena Daud oba a'nogo wene yagatigin. Nen, Haren a'nogo wene waretigin mene a'nogo mondogat tiphogo hilingfegenma, it afuni Israel mene ineisena Tuhan Allah andi nek fogethafu mondok logogun!” iluk isukwa.

⁷ A'nogo isikhesigen nekhengge at Salomo nen ikhi logolik he, ”An neisena Daud en he o afuni Israel mene ineisena Tuhan Allah a'nogoba wene kabogetuba faget wusigin iluk wenggelhikhe.

⁸ Oba nen he Tuhan nen at oba ikhi logolik he, Hat hendawimo hilingisigin iluk wenggelhen mene andi re fano.

⁹ Oba nen he O An nobaget wusugun mene andi re haren he fuk, at he hat hamlogo nen wu'nabigin o,” iluk yagatikhe.

¹⁰ A'nogo yagatikhe mene a'nogo, an neisena obali'mo it afuni Israel mene inobaget raja menlagagi, nen an nen enek o afuni Israel mene ineisena Tuhan Allah awene kabogetuba a'nogo wuti. Enggere At Tuhan nen wene isikhe mene a'nogo tibet fikhe andi.

¹¹ Peti Wene wasukwa mene a'nogo elonggoma helep Allah inom it afuni At againafuri Israel mene inom wene wat-wat agaukwa mene a'nogo kwalegengge logouwageluk he, O Tuhan Awi elonggoma andoma foukhogo hilingfigiat andi,” iluk yagaisasikhe.

Salomo nen samban isikhe wene

^12-13 At Salomo nen he o Tuhan Awi wuri'mo nen olulu tulem aremnogo re no perunggu meneba talogo, unggut uankwe inom horokwe inom he, 2,2 meter en, legeisogo liabekwe mene re 1,3 meter en wutikhe. A'nogo wutfesikhesik he it afuni kabogetukwa mene a'nogo ineil hanim Salomo e talek a'nogoba lagasikhesik he, elokhe mezbah a'nogo higithogo menlagaikhe. A'nogo mendek were'ma re it afuni mondogaren ineilenggen hikhi lagaukwa. It ineilenggen werek kwelek aremnogo at eindep awi yagaisogo, enggi pirenet legeisogo pogoroba liabek logolik, aren samban ikhi logolik he,

¹⁴ ”Neisena, nit afuni Israel mene nineisena Tuhan Allah! Hat hinom higit mene pogoroba inom kweangma inom ekhe werek lek! Haren wene wa'nisasigin mene a'nogo tibet figik, it afuni Hat hagainafuri inendawinggen hoba tipsek logolik hilingitik, hilingitunem haren hendawinggen hundik hilinginafi lagen aple a'nogo inuk nisigik, isigin.

¹⁵ Haren an neisena Daud oba wene waretigin mene a'nogo mondogat tibet fegenma, an nen yogondak hilingiti mene yi ogore Haren wene waretigin mene andi higithogoat hilingiti o.

^16-17 An neisena ba Haren wene wareti logolik he, Hat hambisangma mene nen, haren hilingiti lagen hakhogo, An nawene melalek a'nogo hologo nek hilingitu halok he, mondok-mondok andoma ap misik ekhe hat hambisangma mene nen afuni Israel mene inobaget raja mendek logolik melalinafi logogin, iluk yagatigin. Nit afuni Israel mene nineisena Tuhan Allah, yogondak he Haren hamingmingengge an neisena Daud andiba wene waretigin mene andoma mondogat tiphogo nek hilingfein o, neisena.

¹⁸ Oba nen he, neisena Allah, Hat he afuni inanggele'ma kweangma yoma higit logou hak nogo a? Pogot abirengge mene ogore Hat logou oba obalik higitsek lek, nen o kabogetuba iluk an nen wuti mene yi re mondogat ebenagaik!

¹⁹ Tuhan Allah neisena, an he Hat hamingmingengge! Oba nen he an nen samban igi mene inom, kino yagaheti mene inom, holnobagambik onggo tiphogo nek hilingnobagain o, neisena.

^20-21 Haren o hat awiba wene kabogetuba iluk wenagaisogo fegen mene ari, linggene inom, hubanggo inom, halhi logoino. Niren o yi fikhit asi we'luk samban oba yagahetu halok, Hat hebe pogoroba welagen oba andoma nen hesanggo holhaluk, an ninom, nen it afuni Israel mene Hat hagainafuri ari inom, ninaweak lek hilingisogo ninobagakhi logoino.

²² Ap ekhe nen agailak amu mene ekheba weak hilingiten iluk, oba hikhibet hugu halok, at andi nen weak hilingiti lek iluk hombuk paligiluk halok he, Hat haiba mezbah era'lu aremen we'luk iwagu halok,

²³ Tuhan neisena Hat hebe pogoroba andoma logolik hesanggo holhaluk he, nit hamingmingengge ninawene andi sikhibet nisa pi waga logoino. It fano hilingitu mene halok he lologo fisikhi logolik, it weak hilingitu mene re unggum wogisikhi logoino.

²⁴ It Hat hagainafuri Israel mene yoma inaweak hilingitu onggo it inaselei mene nen inalong legaphogo fisugunem, it inendawimo waraluk nekhengge Hat nit nineisena Tuhan iluk foget habuogeluk we'luk, ninaweak leget ninobagain iluk samban hoba yagahetu halok,

²⁵ Hat hebe pogoroba nen inane hesanggo holhu nogo. Haren it hagainafuri yi inaweak leget fisigik, inambotkwe woginarek o kweang it inom, it inombawi inom, wogisasigin oba yoma woginarek wagu nogo.

²⁶ Tuhan neisena hebe pogoroba mene, it hagainafuri yi nen hoba kwanirogo hilingitunem, Haren he unggum it inoba meiso pelagisa wagu le'ma, it inaweak hilingitu mene a'nogoba nen inobabut hebela'luk, nineisena Tuhan iluk legeisogo hobagauwogeluk o hat hawi wuri'mo yoma we'luk samban oba yagahetu halok he, Haren inane hesanggo holhi logoino.

²⁷ Holfisaluk he it Hat hamingmingengge Israel inap andi inaweak legaphogo fisikhi logino. Nen, iren eberogo mene nek hilingiti logouwageluk yagaisikhi logoino. Nineisena Tuhan, it a'nogo hilingfisaluk enek he, meiso o kweang it hagainafuri yi mondok-mondok asugun iluk wogisasigin mene yiba pelagisa wagu nogo.

²⁸ It Hat hagainafuri yi inaiba yoma ambi, sumburu ouwak lagagik, ou saga igik, sogoi aganhan mene nen inangge yi mene ti mene yago mene unggul watik, eluk-elugengge nen inom, pulue nen inom palhik, athe it inaselei mene nen inoasi wagik, hilingitunem,

²⁹ Hat hoba samban ugu halok he inane hesanggo holhi logoino o. Nen, it hagainafuri Israel mene yi inanggele'ma nen ekhe inendawinggen heiselikhi logolik, inenggi earogo Hat Hawi wurik fikhit liabek logolik samban ugu halok he,

³⁰ Hat hebe pogoroba welagen oba andoma nen hesanggo holiluk inaweak honggorabethogo hilingfisano. Afuni mondogat inendawimo hilingik mene we Hat hamuat helu welagendek. Nen it Hat hagainafuri o kweang nit ninombawi inoba wogisasigin oba yoma logolik, Hat hane hologo hilingitik, Hat halong anggaluk ninailorogo welagik, hilingiti logogun nen he,

³¹ Haren afuni inenu inobabut hilingitarek mene tomok onggo higithogo hilingfisikhi logoino.

³² Hat hebe mondok lego welagik, homame hokho welagik, nen Haren hundik-hundik leberinafik, hilingitendek mene andi faget o yatma nen ap pok mene misik ekhe nen hol hambik, Hat hoba samban igin iluk o Hat Haiba yi wagu halok,

³³ Hat hebe pogoroba welagen oba andoma nen, aren samban ugu mene andi holinapluk, kino igin engge andi wogo'no aro. A'nogo hilingisigin oba re, it afuni mondogat o kweangma yoma welagaikharek mene mondogat he, it hagainafuri Israel mene hilingik hakhogo Hat hebe inelu asimbik, hane hologo hilingitu logogun. Nen, o an nen hat hawi wene kabogetuba iluk wuti mene yi inelu asugunat.

³⁴ Nen it Hat hagainafuri yi Haren it hinaselei mene inom weim yabi lani, iluk miminginafunem laluk, it inebe yi kwe ti kwe logolik, iren o kota Haren wenagaisogo fesigin mene yi fikhit, inelokhe logolik samban ugun halok he,

³⁵ Hat hebe welagen oba pogoroba andoma nen it samban ugu mene andi hesanggo hol fuluk, it inebikhit inalongabet fisikhi logoino.

³⁶ Ap misik ekhe weak hilingitu lek mene ekhe werek lek hilingi'mo, it Hat hagainafuri Hat hoba weak hilingitunem, Hat ha'mage nen it inaselei mene nen inomame leget fisoageluk Hat heil fugunem, it hinaselei mene nen tok ambisangma senfisambik o yatma ogo, horo'ma ogo fisa lagunem,

³⁷ iren samban oba yagahesugun mene andi Haren inane holhi logoino. Tuhan neisena, o it fisa laguba andoma nen ambi, nit he weak mene inom kwanirek mene inom hilingiti lagoma o, iluk fakhogo herakfuluk, Hat hoba kino yagahetu halok he, iren yagahesugun mene andi inane hesanggo holino o.

³⁸ O andoma logolik, it inendawingenma nen ibi-eberogo inaweak herakfuluk, o kota Haren nit ninombawi wogisasigindik wenagaisogo fesigin fikhit, inelokherek logolik samban hoba yagahetu halok he,

³⁹ Hat hebe pogoroba welagen oba andoma nen, it samban ugu mene andi hesanggo holiluk, hendawirinafi logoino o. It hagainafuri inaweak andi mondogat leget fisano.

⁴⁰ Neisena Allah o, yogondak o ya nen niren samban Hat hoba kino yagaheti lago mene andi hesanggo holiluk, fut ninobagain o.

⁴¹ Neisena Tuhan Allah! Yogondak he hebe menla'luk, Hat hebe homame welagen aple a'nogo agaukhogo Peti Wene Warek andi inom o Hat Hawiba yi kwi laluk mondok-mondok andoma logoin o. Nen, haren it imam en yabu hilingitu mene andiba fanoabet fisikhi logoino, nen Haren it inoba fano aple nek hilingfisugunem it hagainafuri mondogat inagaiyek anggikhi logogun.

⁴² Tuhan Allah neisena, ap raja mene yi herakfisa fuk. Nen, Haren hamingmingengge Daud oba hendawi hundik logolik, welagagin aple a'nogo ebethan o, neisena,” iluk samban isikhe.