2 TAWARIKH 2 - Allah Wene Fano Wene Hupla Inane

Tuhan Awi a'nogo wusuogeluk fougetukwa wene

¹ At raja Salomo a'nogo nen he Tuhan Awiba inom at onggwarek ebe werek oba awi istana misik ekhe inom wusigin iluk wene tekhogo isikhe.

² A'nogo lenggalhikhesik aren he ap o wutu mene miningisugun mene faget he inebe 70.000 nen fisasikhe. Nen tom oba helep sereli lagoin mene re inebe 80.000 nen fisasikhe. It yabu andi hilingitunem kagalek logogun mene re inebe 3.600 nen fisasikhe.

³ A'nogo hilingfisasikhesik he at Salomo nen hun raja Tinus mene enu Hiram a'nogoba re wene yi'nogo lakfesikhe, ”Noe, haren attak an neisena hinom hilingiti lagagin hakhogo re an ninom ogore a'nogoat hat hangge an noba onggo faget waluk wagunem an nen onggo palhi logogin nen ninom hunisuogo. Noe haren an neisenaba e laik o Libanon mene omanogo at ebe werek oba awi wusoageluk oba onggo wanhen.

⁴ Nen yogondak he an nen neisena Tuhan Allah a'nogo enu legeisogo fikhi logolik At obaget o enogo amu ekhe wene kabogetuba wusigin. Nen, o andiba re an inom it nagainafuri holhu mene inom At obaget wene kabogeti logolik, niren dupa amben fano mene nolhik, roti At obaget femhogo fei waga logogunat. O wurik andiba re nit nineisena Tuhan Allah along anggaluk legeisogo fikhi logolik, niren wam warogo hubet inom, hu'mokwe inom noletik, linggene sabat sambul a'nogo nolhik, tugi ket mene weinam agunem obaget kabogeti logolik warogo nolhik, linggene amu lenek werek mene omanogoba warogo nolhik, ikhi logogunat. A'nogo hilingiti logogun andi re Aren it afuni Israel mene inoba melalfisikhi logolik, a'nogo hilingitu mondok logogino iluk yaganisasikhemo re a'nogo hilingiti logogun andi.

⁵ Nen o an nen wusigin iluk nendawimo anggikhi lagi mene andi re, nit nineisena Allah andi re mondok lego agun a'nogo faget, it amu mene faget Allah higit iluk eberi'lagwi mene a'nogo faget he fuk. Arigini'mo re o andi re mondok esin mene wusigin.

⁶ Oba nen o pogoroba tulem kwe oma mondogat he At ebe werek oba obalik elo'lek hilingi'mo re ap misigen ogo o Allah ebe werek oba iluk higithogo ekhe wusu lek hak. A'nogo hilingi'mo re o an nen wusigin mene andi re we Allah obaget amben fanongge dupa nolhu mene faget enek wusigin.

⁷ A'nogo hilingi'mo re noe, at an neisena Daud en it ap Yehuda inap inom Yerusalem inap inom yabu hilingiti logouwageluk wenagaisogo fisasikhe mene oma yabu hilingiti logouwakhogo re noe haren ap misik ekhe emas inom perak inom perunggu posiemanggen meneba elalherek elu mene inom, nen aren su kain eil pogot eil hak mene inom, eil unggu mene inom, mep mene inom, selebenetu elu mene ekhe lakfei we'no.

⁸ Noe hat welagen oba andoma ap e mutu mene faget mondok inelu hilingi'mo re noe haren o Libanon oba andoma e laik inom e sendana inom hokho-pokhorogo hilingi'mo re andoma mene ekhe lak fei we'no o. O Tuhan Awi an nen wusigin mene andi re mondok hokho awi hunikhogo wusigin hilingi'mo re,

⁹ e hokhorogo miningisogo kabogesuakhogo re noe hat hagoromi yabu hilingitunem andi an nagoromi nen leberisoageluk inayonggo fagain aro.

¹⁰ Nen it ap hat hagoromi andi inamburu nunggu mene faget he, an nen gandum elokhe pire mene enggin ebe lombok he 2.000 ton mene inom, anggur he 400.000 liter mene inom nen zaitun amusu 400.000 liter mene inom noe hat hoba lak fei wesiginat, iluk surat palogo lakfesikhe.

¹¹ Lakfesikhemo re at raja Salomo nen surat lakfesikhe mene a'nogo onggo re raja Hiram en lakfei waga logolik yi'nogo palek welagaikhe, ”At Tuhan nen At againafuri faget mondok endawi hundik anggugunem a'luk he it inobaget noe hat hebe raja menhobagasikhe.

¹² At Allah nen hun Daud amlogo obabut mondok hibilik hebelek mene ungguloak kagalek mene wogete andi nen he, yogondak aren O Tuhan Awi a'nogo inom, nen at onggwarek ebe werek oba istana misik ekhe inom wusigiluk ili'lago andi nen he, it afuni Israel mene ineisena Tuhan Allah pogot kweang elalhikhe mene andi nek fogerati logogun o!

¹³ Surat palek yi inom he, ap misik ekhe elu pelurek logolik hilingisu hagenek agun enu re Huram andi noe hat hambit lakfei wagi o.

¹⁴ Hun andi agaisa re unggulenu Dan mene, nen eisena re awi Tirus mene. Aren he emas, perak, perunggu posiemanggen meneba elalhu mene inom, helep meneba inom e meneba inom wutu aplere mondok elu pelurek agun. Nen aren ogore su enggen eil hak mene inom, ungu eil hak mene inom, mep eil hak mene inom, su kain lenan oba inom, hilingisu hagenek. Hun andiba elokhe yiginik mene hilingi'no iluk yagatunem a'nogo obabut higithogo nek hesesengge wokhigik hilingitu agun, andi nen he ap ari re noe hat hagoromi a'nogo hilingitu aple inelu mene inom, noe heisena raja Daud obaget yabu hilingiti lagaikha mene omanogo inom, seberogo hilingiti logouwakhogo feino.

¹⁵ Nen nit he noe haren gandum elokhe pire mene inom, anggur inom, zaitun amusu inom, lakhinobagai wesigin iluk abok yaganisegen a'nogo nenangot hugu logogun andi.

¹⁶ Nit he e laik o Libanon tom oba omanogo noe hat hamolo mene higithogo musi lambik he i bene nen salmasuakhogo re heleba homagaisogo lakfei wagunem i nen waluk o Yobe wulibi waga logogin. Nen andoma wulibi wagunem he noe haren salmagaisogo re o Yerusalem fei laga logogin o, iluk lisu palogo lakfesikhe.

Tuhan Awi a'nogo wusuogeluk erotukwa wene

¹⁷ A'nogo hilingitukwasik he, attak at eisena Daud a'nogo nen hilingitikhe hakhogo re it ap pok meneba nen afuni Israel mene inanggelekwe welagaukwa mene omanogo inenu lisu palogo wenaginafukwa. Wenaginafunemen he ap pok mene omanogo inebe seberogo re 153.600 nen wenagaisogo fisasikhe.

¹⁸ A'nogo wenagaisogo fisasikhesik he it inebe 70.000 mene re ongge omanogo salmati logouwageluk fisasikhe. Nen it inebe 80.000 nen he tom oba omanogo helep serelhi logogun mene fisasikhe. Nen inebe 3.600 nen he yabu andi faget awene palhik, kagalek welagik ugu mene fisasikhe.