2 TAWARIKH 16 - Allah Wene Fano Wene Hupla Inane

Ap Israel mene inom weim yafukwa wene

¹ At Asa a'nogo it afuni Yehuda mene faget raja menlagaikhesik melalinafu werek kwelek 36 tahun huli welagaikhesigen he, it afuni Israel mene inoe raja Baesa a'nogo o it afuni Yehuda mene inoasi kwi lagain iluk wagaikhesik o Rama a'nogo omamerogo logolik he o it ap Yehuda mene were'ma andoma ebekwe wilibuku hilingiti lagaukwaba a'nogo kwe latikhe.

² A'nogo hilingitikhe mo re at Raja Asa a'nogo nen he, o Tuhan Awi wuri'mo omanogo nen inom, o at raja werek oba omanogo nen inom o ekhe yi mene ti mene wokhigik fikhi lagaukwa ba omanogo nen no emas inom perak inom, wanhikhesik he aren raja Siria mene hun Benhadad a'nogo ambit o Damsyik lakfikhi logolik he, wene yi'nogo inom warogo lakfesikhe,

³ ”Raja Israel mene hun Baesa a'nogo agoromi inom o wilayah an nen meneba kwi wagaikhasik hilingiri'lagwi mene andi inambotkwe inaiba loageluk, noe hat hinom hundik welagep mene a'nogo palogo feinogen kino yagaheti logolik he, hagaiyekhogo iluk an nen emas, perak inom lakfei wagi andi. Enggere, it nineisugwi nen hundik welagaukwa hakhogo nit ogo a'nogo sebesuogen he we'no o,” iluk lakfesikhe.

⁴ A'nogo lakfesikhemo re hun Benhadad a'nogo nen he aren ikhe mene andi fano anggasikhesik he, agoromi it tentara inogogwi perwira omanogo inomen he o it afuni Israel mene werekwe kota omanogo pin kuageluk yagaisasikhe. A'nogo yagaisasikhemo it omanogo nen ikhi logolik he, o Iyon, Dan, Abel-Bet-Maakha inom, o it afuni inunggulenu Naftali mene nen inangge yi mene ti mene kabogera waga lagaukwaba kota omanogo inom, mondogat inalong legaphogo fisasukwa.

⁵ It a'nogo hilingitukwa mene a'nogo at raja Baesa a'nogo nen holhikhesik he o Rama omamerogo iluk wurik kwikhi lagaikhe mene a'nogo obokhogo figik, nen o kota ebe a'nogo herak figik, isikhe.

⁶ A'nogo hilingitikhemo re at raja Asa nen he at Baesa nen e inom, helep inom, o wutikhe mene omanogoba o kota Rama inom, Geba inom, Mizpa inom. omamerogo wusugun nen iluk it afuni Yehuda mene omanogo yagaisasikhe.

Ap Nabi Hanani nen isikhe wene

^7-8 Andem oba re nabi Hanani a'nogo hun Asa ambit wagaikhesik yagati logolik mel yagatikhe, ”It Sudan inom Libia inom he ap sikhe fisogo mene inebe mondok hokho-pokhorogo were'ma, it inangge kereta elonggoma kuluk weim yabik lagaikharek mene inom, no kuda amboloba lagaluk weim yabik lagaikharek mene inom ogore mondok hokhorogoat welagaikhe lek nogo? Oba nen he haren Tuhan Allah a'nogoba hendawinggen tibet figi'legengge nen at raja Siria mene a'nogoba tibet fesiginmo re, haren it tentara Israel mene inomame leget fisare elo'lek agaikhe lek nogo?

⁹ It afuni inendawinggen Tuhan oba tibet fuluk hilingitu halok At Tuhan nen omame wogisagain iluk o kweangma yoma mondogat Tuhan nen eil halinafi logolik werek. Haren mondok kemburogo hilingiten ma re yogondak huli nen he ap hinom weim yabi waga logolik enek were'ma hikhi logogin o,” iluk yagatikhe.

¹⁰ A'nogo yagatikhemo re at nabi Hanani nen yagatikhe mene andiba re at Asa a'nogo a'mage lagasikhesik he aren nabi a'nogo o afuni hele warogo kwelaginafarek oba omanogo kwelafikhe. Andem oba re at Asa nen it afuni holhu mene fenakwe inom enggin-fenggin inoba hokhorogo fikhi lagaikheat.

At Asa nen melalinafi lagaikhe mene a'nogo wurep kobokhogo hilinglagaikhe wene

¹¹ At Asa raja mendek logolik melalinafi lagaikhe mene omanogo eroma nen pilingisogo erembul oba asi lagaikhe mene a'nogo mondogat he, buku it afuni Yehuda mene inom, Israel mene inomen, hilingiti lagaukwa mene palogo fesukwa mene a'nogoba palek werek.

¹² At Asa a'nogo raja logolik melalinafi lagaikhe mene a'nogo 39 tahun asi lagaikhemo re at Asa ebe eisok pirenet ou hokho mene oba agaikhemo ou wanhu welagaikhe. A'nogo logolik he, Tuhan nen lebetnabuageluk At herasu mene re, aren he dokter ap ou hilinginaferek meneba fano hilingnabuageluk kinosi lagaikhe.

¹³ A'nogo hilingitikhesik welagaukwasigen tahun hilingfuluk enek he hun a'nogo ebe wa'lagaikhe.

¹⁴ Wa'lagaikhemo re at ebe warek a'nogo re it aben afuni wa'lagu halok amben esinogo iluk fagarek engge, no amben-ambenengge meneba ebene warogo fesukwasik he it ap raja-raja salinafi lagaukwaba o kota Daud aiba omanogo sali lagaukwa. A'nogo sal fesukwasik he at ebe along anggikhi logolik iluk he it afuni nen he endu nonggalek agandou hokho mene nolhukwa.