2 TAWARIKH 13 - Allah Wene Fano Wene Hupla Inane

Abia inom Yerobeam inom weim yafukwa wene

¹ At Yerobeam a'nogo it afuni Israel mene inobaget raja menlagaikhesik melalinafu 18 tahun welagaikhesik oba nen he, hun Abia it afuni Yehuda mene inobaget raja menlagaikhesik he,

² o Yerusalem oba andoma 3 tahun melalinafu welagaikhe. At agaisa enu re he Mikhaya, hun Uriel a'logo awi kota Gibea mene. A'nogo were'ma nen he it hun Abia hilingi'luk hun Yerobeam hilingi'luk aremnogo re weim yabugun mene erotukwa.

³ A'nogo hilingirik laga logolik he, at Abia nen he agoromi sikhe fisogo mene inebe 400.000 nen kabogerinafikhe, oba nen he at Yerobeam agoromi inom weim yabugun mene re inebe 800.000 nen kabogerinafikhe.

⁴ A'nogo hilingfisasukwasik he ap esa pire mene aremnogo o Efraim tomkwe andoma inelokhe wut-wut weim tilik arik laga lagaukwa. A'nogo yafi logolik he, at Abia a'nogo Tom Zimaraim oba lagasikhesik at Yerobeam inom, it afuni Israel meneba ane humeti logolik he, An nane yi hinesanggo holini a!

⁵ It afuni Israel mene ineisena Tuhan Allah a'nogo nen he Daud inom wene wati logolik he, Hat hambisangma mene nen it afuni Israel mene yi hundik-handik andoma mondok-mondok melalinafu logogun o, iluk yagatikhe, enggere wene andi re mondok taganet fogoin he elo'lek mene hilingi'mo re, hirogo hinelurogo o.

⁶ Ariginik oba nen he at Yerobeam hun Nebat amlogo andi re at eisena raja Salomo a'nogo ane sagalfuluk hilingiti laga.

⁷ Nen at Salomo amlogo Rehabeam a'nogo andem oba re aren wene yi'nogo ti'nogo onggo lagalu elo'lek hilingi'mo re, at Yerobeam a'nogo nen ap inobabut mondok weak mene, it inendawimo anggugu aple omanogo hilingisuageluk andogosi wagaukwama re, aren it kwe palinabu mondok elo'lek agaikhe.

⁸ Hit hinebe esa hokho ari nen hit hinanggo sapi emas mene kembu dewa iluk at Yerobeam en wuthisikhe mene andiet werek andi nen he, Tuhan nen at Daud ambisangma meneba inomame werek inap logouwageluk wokhisikhe mene ari sagalogo fogoin iluk hilingiti lageba?

⁹ Hiren he it Tuhan faget imam hun Harun ambisangma mene omanogo inom, it Lewi inap omanogo inom, mondogat mugusogo wulaginafigip omanogo le'nogo a? A'nogo wulak fisegepsik inobali'mo faget iluk he, hiren ap sa nen wam sapi misiga, athe, domba sabiren mene a, waluk wesugun halok ap andi ebe imam menfogoin, iluk yugunat it afuni inunggulenu amu mene nen hilingitarek a'nogo hakhogo hiren fogerati lagep mene andi re ebe eberogoat Allah re lek oba nen, hiren imam menfisikhi lagep andi. Oba nen he nit he a'nogo hilingiti lago lego.

¹⁰ Nit he Harun ambisangma mene halok andi re mondok-mondok imam aga logogun, nen it Lewi inap halok he, it imam andoma leberisugu mondok logouwak. Nit he nineisena Tuhan Allah ebe herakfuluk lagi'lek fogeratu mondok logogun.

¹¹ O hubet inom, hu'mokwe inom, linggene hundik-hundik iren Tuhan obaget amben fano mene noletik, wam warogo noletuba omanogo noletik, roti enu warek a'nogo weragaisogo fisa lagik, hilingiri'lagwi. O hubanggo re lampu eisok posiemanggen emas mene hilingik omanogoba ibilfigik hilingiri'lagwiat. Hit he Tuhan herakfuluk laga lagep oba nen he, nit enek he, At Tuhan awene melalek a'nogo hologo hilingitu mondok welago.

¹² Ap hit Israel mene yi sani, Hit hinambu hinombalak ineisena Tuhan Allah andi ane sagalogo fugu lek! Nit melalninabi'lago mene andi re we nineisena Allah amuat were'ma re, it ap At obaget hilingiri'lagwi mene imam omanogo re, niren hit hinoasi wesugun mene andi faget he, iren enekhogo re trompet ane fusuogeluk yoma werek yi. Hit he hinalong asugun iluk hilingiti lageba? Elo'lego! iluk yagaisasikhe.

¹³ A'nogo ugu kwelek aremnogo re at Yerobeam en he it ap Yehuda inap a'nogo inoasi loageluk he, it agoromi fena inambotkwe walingisi laluk logouwageluk yagaisasikhe, nen it fena re, inolokhe fikhiren inom yabuageluk yagaisasikhe.

¹⁴ It Yehuda inap a'nogo nen hasukwa re it a'nogo hukhogo kwelakfisasukwama isasukwasik he, Tuhan nen lebetnisoageluk he enu hombuk palhukwa. Nen it imam omanogo nen he trompet ane furik lagunem he,

¹⁵ It Yehuda inap a'nogo re weim ami'mit sup isukwasik he, it a'nogo hun Abia nen woginarek he, At Allah nen Yerobeam inom, it Israel inap inom omanogo inomame leget fisasukwama re,

¹⁶ It inailo nen heise wulifukwa, nen Allah nen he it Yehuda mene inebikhit inomamet fikhi logolik he, it Israel mene omanogo inomame leget fisasikhe.

¹⁷ Hun Abia inom agoromi sikhe fisogo mene inom omanogo nen he, it Israel mene inebikhit he mondok hokhorogo inoatukwama it Israel inap ap sikhe fisogo mene mondok fini fano mene nek inebe 500.000 nen wa'lagaukwa.

¹⁸ It Yehuda inaben he it inambu-inomba lak ineisena Tuhan Allah a'nogo omameba inendawinggen himbirik logolik hilingitukwaba it inebikhit inomame agaukwa andi.

¹⁹ At Abia nen Yerobeam agoromi inom, a'nogo muginarek laga logolik he, aren o kota fena o sili horok-horokwe andoma welagaikhe mene telhikhe. Nen o aren telhikhe mene andem he, o enu Betel inom, Yesana inom, Efron inom.

²⁰ Hun Abia raja logolik melalinafi lagaikheba re at Yerobeam a'nogo re at omame welagaikhe mene a'nogo halu elo'lek agaikhemo re at ebe Tuhan nen pinggi watikhe.

²¹ Oba nen at Abia nek he ekhe inom omame hokho aga lagaikhe. Hun andi agagwi re inebe 14 nen welagaukwa, nen againafuri ap mene re 22 nen, helime re inebe 16 nen welagaukwa.

²² Hun Abia andi nen hilingiti lagaikhe mene fena inom, at ane ikhi lagaikhe mene inom, at hilingiti lagaikhe mene inom he buku nabi Ido nen it attak hilingiti lagaukwa aple palhukwa mene andiba palek werek.