2 TAWARIKH 10 - Allah Wene Fano Wene Hupla Inane

Kerajaan Salomo a'nogo pire minggilhukwa wene

¹ It afuni Israel mene abel utara fikhit welagaukwa mene a'nogo mondogaren he at Rehabeam raja menfogoin iluk kabogetukwama re at Rehabeam ebe o andoma lagaikhe.

² Andem oba re at Yerobeam hun Nebat amlogo a'nogo re hun raja Salomo ailo nen o Mesir lagaikhesik logolik esanggo holhugunemen he, At Yerobeam a'nogo it afuni Israel mene faget raja menfaga o, iluk ugunem esanggo holhikhesik he, at ebe nekhengge o it afuni Israel mene were'ma omanogo wagaikhe.

³ A'nogo wagaikhemo re it afuni o abel utara fikhit welagaukwa mene omanogo nen ayonggo fesukwasik he inom seberogo at Yerobeam were'ma ambit logoin iluk lagaukwa. Lagaukwasik iren ikhi logolik he,

⁴ ”Nineisena hun hat heisena Salomo a'nogo nen he enggin mondok hokho mene ninoba fesikhemo welago. Enggere nineisena haren nit enggin hikhi logolik welago mene ari seabet ninobagagin halok enek he, niren hun hat ha'ma sebe igik, foget hobagagik hilinghobagakhi logogun o,” iluk yagatukwa.

⁵ A'nogo yagatukwama re at Rehabeam en ikhi logolik he, ”An nendawimo ebesimbigen yagahisagain enggere, hinenggi henagan logombigen hobuk hinambotkwe we'no,” iluk yagaisasikhemo re it afuni a'nogo inawilokwe pugulhukwa.

⁶ It a'nogo pugulhu kwelek he it ap hokho inap attak at eisena Salomo wene komo wene yagati logouwageluk welagaukwa mene omanogo yagaisikhi logolik he, ”Ap andoma inoba an nen onggo ninggi'nogo yagaisigi aplerek?” iluk isikhesik he, ”An noba ninggi'nogo hilingisin iluk yaganesugun?” iluk heinok wogisasikhe.

⁷ A'nogo heinok wogisasikhemo re iren onggo ikhi logolik he, ”It afuni holhu mene andi nen hundik-handik andoma re an noba tiphogo nek hilingiti logogun iluk anggikhi lagen halok he, haren it inendawimo anggaga mene andi hilingfisigik, fano mene hilingfisigik, hilingfembik he, it inoba hane fano liokhogo yagaisan o,” iluk yagatukwa.

⁸ A'nogo yagatukwaba nen at Yerobeam en he, iren komotukwa mene a'nogo fanorogo fut figi'legengge harak fuluk he, aren it ap yogondak at inom yabu hilingiti logogun mene, ap alagendek at inom higit mene omanogo inambit lagaikhe.

⁹ Lagaikhesik aren it inoba ikhi logolik he, ”It afuni holhu mene nen an noba ikhi logolik, enggin-fenggin ninoba fili'lago mene andi seabet ninobagain o, iluk kino yaganesi wagaikha mene andi faget he, an nen onggo ninggi'nogo yagaisa hak anggikhi lagep?” iluk heinok wogisasikhe.

¹⁰ A'nogo heinok wogisasikhemo re iren ikhi logolik he, ”Hun haren he it ap andi yi'nogo yagaisano, An he nomame lek welagi mene andem he hilingik kwelek he, an neisena re mondok maben sek kwelek an enek he mondok nomame rek welagi.

¹¹ An neisena nen hit hinoba re kombi ugu meneba fe'nengge hinoati lagaba nen, an nen he, posiemanggen kombi aik mondok ngili-ngelerek meneba lambisok hinoati logogin o!” iluk yagaisano, iluk yagatukwa.

¹² A'nogo komotukwama were'ma nen he at Yerobeam inom ap fena omanogo inom he Rehabeam en yagaisasikhe mene a'nogo higithogo nekhengge at raja Rehabeam were'ma oba wagaukwa.

¹³ It a'nogo wagaukwasik hilingitunemen he it ap inaluendek a'nogo nen komotukwa mene a'nogo puliaphogo hilingfuluk he, ap wagaukwa mene omanogo oba haroba woginafikhe.

¹⁴ Woginafikhesik he it ap ket souge mene nen komotukwa mene a'nogo higithogo re, aren ap omanogo inoba ikhi logolik he, ”An neisena nen he hit hinebe kombi ugu meneba lambisogengge hinoati laga, oba nen he an nen posiemanggen kombi aik mondok ngili-ngelengge meneba lambisok hinoati logogin. An neisena nen he enggin-fenggin mondok elo'lekhogo hilinghinobagakhi laga, oba nen he an nen enggin-fenggin andi mondok ekhe inom anggolo rogoat hilinghinobagakhi logogin o!” iluk yagaisasikhe.

¹⁵ It afuni holhu inaben kino ikhi lagaukwa mene a'nogo hol figi'legengge obakhenigik herak fisikhi lagaikhe. Oba nen he Tuhan Allah endawimo anggugu mene higithogo hilingiti lagaikhe. A'nogo andi re At Tuhan nen hun Nebat amlogo Yerobeam andiba, yi'nogo hilinglasigin isikhemo at nabi Ahia o Silo mene a'nogo nen isikhe mene higit asuageluk hilingiti lagaikhe andi.

¹⁶ It afuni Israel mene omanogo nen kwelakhasukwa re, it afuni nen hilingitu mene omanogo at raja nen esanggo hohi'lek obakhenigik hilingitunem hasukwasik he, iren inane ami'mit sup ikhi logolik, ”Eiga! Hit afuni Israel hinap ari re nenahalok hun ari ane mungurik kwikhi lageba? Herak fisaluk ninaiba louwogen we'ni a! At Daud inom, aren tagomangge mene inom oma nen he nit ninobaget ninggi'nogo mene ekhe hilingninafama? At Rehabeam andi re onggwaregen hilingirikhi logouwakhogo herakfisani o!” iluk a'mit lagakhi lagaukwa. A'nogo hilingitukwsik he it afuni Israel mene a'nogo inaiba lagaukwama re,

¹⁷ at Rehabeam a'nogo re it afuni wilayah Yehuda ba werek mene faget enek inobaget inoe raja welagaikhe.

¹⁸ A'nogo hilingik welagaikheba nen he, at raja Rehabeam en hun Adoniram it ap yabu inane omameba yagaisugu kwelek hilingiti lagaukwa mene omanogo inobaget kepala welagaikhe mene a'nogoba re, at Rehabeam alegenek he, eluk wulifikhesik weak-weak kereta wurik mene a'nogo amboloba lagasikhesik he heise o Yerusalem lagaikhe.

¹⁹ A'nogo hilingitikhe a'nogo huliba nen he, it afuni abel utara fikhit welagaukwa mene a'nogo nen he, at Daud en tagoma mene raja welagaikhe meneba re wene oak lolek aple nek yagasi waga lagaukwa.