2 TAWARIKH 1 - Allah Wene Fano Wene Hupla Inane

Raja Salomo nen endawinggen kagalek mene wo'nesuageluk samban isikhe wene

¹ Hun raja Daud amlogo Salomo a'nogo re, it kerajaan Israel oba omanogo raja mondok omame mene menlagaikhe. A'nogo menlagaikhemo re, eisena Tuhan Allah nen at ebeba fanot figik, at ebe mondok omame hokho mene logouwageluk hilingfigik isikhe.

² It afuni Israel mene nen esa inebe 1.000 nen higik, 100 nen higik, faget inogogwi kepala inom, it pemerintah ba yabu hilingiti logolik ap kain mene mendek werek inap inom, it ineisok erokwe faget kepala werek mene faget inom he, at raja Salomo a'nogo nen,

³ at inom o Gibeon samban ugunem omanogo logoin nen iluk miminginafikhe. It andoma lagaukwa andi re, o andoma at Musa Tuhan amingmingengge a'nogo o leimo logolik Tuhan Awi Sabu wutikhe mene a'nogo andoma were'ma a'luk lagaukwa.

⁴ (Oba nen he Peti Tuhan nen Wene warogo wo'ninafikhe mene a'nogo re at raja Daud nen o Kiryat-Yearim en waganogo o Yerusalem aren Peti andi faget o Sabu salfesikheba omanogo fei wagaukwama welagaikhe.)

⁵ Wam warogo nolhu mene obuluk (mezbah) at Besaleel, hun Uri amlogo, hun Hur omba a'nogo nen no perunggu ba wutikhe mene a'nogo ogore o Gibeon Tuhan Awi sabu sale'ma elokhoma omanogo welagaikheat. A'nogo were'ma re at raja Salomo a'nogo inom, it afuni holharek mene mondogat inom he, andoma wene kabogetukwasik samban ikhi lagaukwa.

⁶ Tuhan Awi Sabu a'nogo wuri'mo nen mezbah perunggu meneba hilingi'mo aremnogo re, at raja nen wam Tuhan obaget ebe 1.000 nen warogo noletikhe.

⁷ A'nogo noletikhemo hup a'nogo sambul he, Allah at Salomo ambit weinam asi wagaikhesik yagati logolik he, ”Salomo ahwi, Hat hendawimo hamolo anggegen mene yaganom o, An nen hat wokhesigin enggere!” iluk yagatikhe.

⁸ A'nogo yagatikhemo re at Salomo nen onggo ikhi loglik he, ”Allah neisena o, Haren an neisena Daud oba hendawi hundik logolik hilingfikhi lagagindik, Harenat obali'mo an nebe raja mennobagegen.

⁹ Ma re, yogondak he neisena Tuhan Allah, Haren an afuni inunggulenu hokho mene mondok wenasu elo'lek mene ari faget raja logouwageluk menogo nobagegen andi re, Haren an neisenaba wene waretigin mene a'nogo tiphogo hilingnobagain o.

¹⁰ Andi halok he, an nen afuni yi melalinafi logogin mene faget an namolo mene neisena Haren nendawimo kagalek mene inom, wenggelek mene inom, wo'nom o. Nen a'nogo hilingnobagagin lek halok he, an nen afuni Hat hagainafuri hokhorogo yi re ninggi'nogo melalinafi logogin?” iluk yagatikhe.

¹¹ A'nogo yagatikhemo, Allah nen onggo Salomo oba yagati logolik he, ”Haren he henggi werek logogin iluk ogo, nen hangge yi mene ti mene inom ogo, raja logouwageluk ogo, it ap haselei mene inoasuageluk ogo, Hat honggwarek hebe heluk uanhogo logogin iluk ogo yaganeten lek, at he afuni An nagainafuri haren halinafi logouwageluk hoba lomboget hobagagi mene andi melalinafi logogin nen iluk hendawinggen kagalek mene inom, wenggelek mene inom, faget kino yaganeten. Ma re haren kino yaganeten mene andi re fano egen.

¹² Arigini'mo re, hendawinggen kagalek mene andi inom, wenggelek mene andi inom he, An nen wokhesigin. Andi nen fena amu mene re hat hangge mondok hoporogo logouwageluk hilinghobagagik, sik-pikhogo hilinghobagagik, henu werek hilinghobagagik, ap raja attak mendek welagaukwa mene inom, hobuk logogun mene inom, andoma inenu we sebelek hangge werek kwelek he, harenek he henu werek hilinghobagagik, igin o,” iluk yagatikhe.

At raja Salomo angge welagaikhe mene inom, nen at omame welagaikhe mene inom a'nogo.

¹³ A'nogo yagatikhemo re, at Salomo a'nogo o Gibeon Tuhan Awi tenda sale'ma wene kabogetukwaba andoma herakfuluk he ambotkwe o Yerusalem wagaikhe. Andoma nen he it afuni Israel mene a'nogo aren melalinafi logolik welagaikhe.

¹⁴ Aren he agoromi sikhe fisogo mene tentara omanogo, angge kereta ba lagaluk weim yabi lagu mene re inebe 1.400 nen, nen wam kuda ba laga logolik yabik lagu mene re 12.000 nen fougeratikhe. A'nogo hilingfesikhesik he it inebe fena omanogo re o Yerusalem logouwageluk fisigik, fena o kota ekhema-ekhema andoma logouwageluk fisigik, isikhe.

¹⁵ At hun Salomo a'nogo nen melalinafi lagaikheba andem he, o Yerusalem oba andoma re no emas inom perak inom andoma re hesangge mene hakhogo hilingi'mo, helebenggen hakhogo hilingik welagaikhe. Nen e laik o Libanon mene andoma re, hokho-pokhorogo hilingi'mo re, e ara hesangge agayo hakhogo hilingik welagaikhe.

¹⁶ It ap yi mene ti mene onggo pali waga logolik, at raja lebethikhi lagaukwa inap andoma nen he wam kuda re o Mesir inom, Kewe inomen waluk kwelabi waga lagaukwa,

¹⁷ nen kereta weim yabi lagu mene faget he o Mesir en waluk kwelabi wagunem he, andoma nen it raja Het mene inoba inom, Siria mene inoe raja oba inom, kereta misik faget onggo re uang perak 600 nen meneba huniti lagaukwa, nen, wam kuda re onggo 150 uang perak oba huniti lagaukwa. Andi nen iren wokhigik ekhe kwe wulafi lagaukwa.