2 SAMUEL 7 - Allah Wene Fano Wene Hupla Inane

At Natan nen he, ”Yi'nogo hilingi'no,” iluk Daud yagatikhe wene

¹ At kain raja Daud aselei mene nen wene enggin-fenggin oba fouwogeluk hilingiti lagaukwa meneat he, Tuhan nen ma'murogo serogo werek kwelek aiba istana omanogo elok welagaikhe.

² A'nogo logolik, ap Natan Allah ane yagaisikhi lagaikhe mene a'nogoba mel yagatikhe: ”Yethan, Allah nen Peti Wene Warogo wo'ninafikhe iluk hilingik mene a'nogo re we o tenda wuri'mo andoma figimo werek kwelek oba nen he, an enek he nawi istana e laik o Libanon alima agayoba nek wuri'mo welagingge yi!” iluk yagatikhe.

³ A'nogo yagatikhemo, at Natan nen he, ”Tuhan nen lebethiikhi logogin andi nen he, hat hendawimo nen hilingisigin anggegen mene andi hilingi'no nego, noe,” iluk yagatikhe.

⁴ A'nogo yagatikhe meneat he, o andi sambul hubanggo Tuhan nen Natan oba mel yagatikhe:

^5-6 ”Hat hebe an namingmingengge Daud oba lambik he, aren mel ikhe, iluk yaga'no. An nen hit Israel mene afuni Mesir mene nen fethinarek were'ma telhinafigi andi huli nen pikhit yogondak huli re, an nawi o ebe mene wuri'mo ekhe welagirek mondok lego. We, o ya lagik, ta lagik, nikhi logolik, o tenda misik wuri'mo nek welagirek andi nen he, haren o ebe mene wurogo nobagagin nogo? Elo'lego.

⁷ An hit afuni hinunggulenu Israel mene ninom o yi awi ti awi nikhi logolik, hit hinogogwi An nen wenagaisogo menfisilik wagirek mene inoba ekhe, hiren An nawi e laik o Libanon meneba wurogo nobagagi'lek hilingiti lagep andi nenahalok, iluk inoba heinok ekhe wogisigirek mondok lego.

⁸ Andi nen he, An Tuhan yi mene ti mene hilingisu hagenek mene a'nogo nen he, namingmingengge Daud yaga'nogen iluk yagahesigin mene yi, mel ikhe iluk yaga'no: Hat hanggo domba konhi logolik o leimo were'ma wokhafigisik, nagainafuri Israel mene inoe raja logoinogeluk menhobagasigi andi.

⁹ Halok he, An nen hat hebe we komakwe lagen halok setharek mondok logolik, hat haselei mene mondogat hinom weim yafunem, inebe mondok legetfisikhi lagagi andi. Ma re, it afuni o yi awi ti awi inogogwi kaindek logolik inenuwerek welagaikharek andi hak henuwerek hilinghobagagin andi.

^10-11 Andi hak, nagainafuri Israel mene afuni ekhe nen weagarinafi'lek fano inabolo'legat logouwageluk, o yoma it logogun oba tegelogo fisasigisik, wesuageluk yagaisasigimo wagaukwaat aro. A'nogo wagaukwama, it attak o yoma wagaukwa huli nen ap kaindek it ferinarek logouwageluk menfisasigi mene re, it afuni inobabut weak hilingitu inamolo mene nen he inoasuogoluk kwi waga lagaukwa andi. A'nogo meneat he, andi higit hobuk ekhe hilinglaga logogin lego. An nen he, hat hebeba abok wene watheti lagi yi, hat he haselei mene welagaikharek mene omanogo inoba hailo legengge liokhogo fanorogo logogin, nen, An nen hat hoba herembulmo ta'larik logoin mene wokheti logogin o.

^12-13 A'nogo hilingiti logombigen, hobuk hat hebe wa'lasumo, hebe warek hombalak salinafukwaba salhafunem he, hobulu'mo, hat hamlogo mene ekhe menfagain o. A'nogo menfoumo, aren enek he An nawi wusigin o. Nen, aren melalinafi logogin oba kerajaan andoma An nen mondok-mondok abolok leget foumo hambuksek logogin. Nen at ambisangma mene ekhe nen raja mendek logolik melalinafi logogin.

¹⁴ At andi eisenare anat hilinglagik, nen athe an namlogo hilinglagik, ugun o. Halok he, at weak ekhe hilingite halok, ineisugwi nen inagainafuri inelu asuageluk wene inoba fagarek a'nogo hak, An nen at oba wene fikhi logogin.

¹⁵ A'nogo meneat he, An nen, yi'nogo hilinghinafu logogin, iluk wene watheti andi hagat, at andi fanotfugu mondok logogin o. At faget wene watheti mene andi, at Saul menhobagagi raja were'ma An nen at futfuluk hat hebe raja logoinogoluk menfagagi andi hak hilingisigin mondok lego. We, nenggi ninghogo fisogo logogin o.

¹⁶ Haren hagainafuri hokhorogo taginafi logoinogoluk hilinghafik, afuni Israel mene ferinarek mondok-mondok logoinogoluk homametfigik, ikhi logogin o, iluk igi mene andi, Daud yagasi lano o,” iluk yagatikhe.

¹⁷ A'nogo yagatikhemo, at Natan nen wene Allah nen yagatikhe mene andi mondogat at Daud yagasi lagaikhe.

Daud en Allah hai wati logolik samban isikhe wene

¹⁸ A'nogo yagatikhemo, at raja Daud nineisena Tuhan awi tenda wuri'mo a'nogo kwisikhesik he, ebe hu'lagaikhesik, samban mel isikhe: ”Allah Henupogot mene neisena. An nebe inom, nagainafuri inom, ninebe hat heilhanem mondok elo'lek meneat he, fanorogo fetninarek welagen andi, neisena.

¹⁹ Neisena Tuhan nen, nit fetninarek welagen mene andi esin meneat he, andi endebat hangge. Oba nen he, hobuk afuni an nen tagongge mene fano hilinginafi logogiluk wene wa'neten andi nek he mondok esin hokho mene o, neisena. An nebe afuni meneat, hat hebe Tuhan Allah nen wene nit hobuk hilingninafi logogin mene faget yaganeten andi, neisena.

²⁰ An nobabut hilingitirek mene mondogat hat helu andi nen he, an nen ninggi'nogo yagahesigin nogo? Neisena.

²¹ Hat hendawimo hamolo anggegen higithogoat wene wa'neten hak hamingmingengge yaganeti logogiluk an faget hokhorogo hilingiti lagen andi.

²² Nit attagat yaganisikhi logolik he, Nineisena Allah Enupogot andi hangge ekhe mondok lek, we, At amuat esin welagarek, iluk yaganisasukwama habok ninelu o. Hat hamuat esin welagen o, neisena.

²³ Afuni inunggulenu lombok o yi awi ti awi welagaikharek mene andi, nit afuni Israel mene ninom higit lego. Nit afuni ninunggulenu Israel mene andiat hat honggwarek hagainafuri logouwagaluk afuni Mesir mene nen inamingmingengge higit fetninarek were'ma, telninafigin mene nit ninamunek welago o. Nit faget elalin mene hokhorogoat hilingitigin andiba, henu o yi awi ti awi mondogat lili'lago andi, neisena. Hat hagainafuri weim yabik wagunem, afuni inunggulenu hunogoat mene inebe inom, it inandugwi kembu inom, mugusogo wulakfisasigin andi.

²⁴ Nit ninunggulenu Israel mene andi, hat honggwarek hagainafuri mondok logouwagaluk, wo'ninafigindik, nineisena Allah harat agagin andi, neisena.

²⁵ Andi nen he, Allah Henupogot mene neisena. An nebe faget inom, an nen tagongge mene faget inom, yi'nogo hilinghinafi logogin, iluk wene wa'neten andi ninghogo fisogo logoino o, neisena. Haren he, yi'nogo hilinghinabigin, iluk wene wa'neten andi eberogoat tiphogo hilingninafi logoino aro, neisena.

²⁶ Afuni o yi awi ti awi nen henu hokhotfugu mondok logolik mel ikhi logogun: Allah Homame Mondok Hokho mene afuni Israel mene ineisena Tuhan andi re we Hat hamuaro, iluk ikhi logogun o, neisena. Ap an nen tagongge mene mondok ekhe enupogot asimbik afuni Israel mene ferinarek mondok logogun o, neisena.

²⁷ Neisena Tuhan Homame Mondok Hokho mene o. Haren yaganeti logolik, ap haren tagomangge hombalak ta'larik laga logogun mene mondok afuni Israel mene inogogwi inenupogot hilinglarik lagunem menfisilik laga logogin o, iluk wene wa'neten andi nen, nane nailo legat, hoba liakfei wagi o, neisena.

²⁸ Neisena Allah Henupogot mene, Allah hebe aro, neisena. Haren, yi'nogo hilinghinabigin, iluk wene warisegendek mene mondogat ebe tiphogo nek hilingitendek mene a'nogo nen, wene esin mene andi an wa'neten andi, neisena.

²⁹ Andi nen he, hat ninebe hendawinggen hundik mene logouwagaluk an nen tagomangge mene andi fanorinafi logoino o, Neisena Henupogoren, yi'nogo hilinghinafi logogin, iluk wene mondogat wa'neten andi re, an nen tagomangge mene andi, haren fanorinafu mondok logogin o, neisena,” iluk samban isikhe.