2 SAMUEL 6 - Allah Wene Fano Wene Hupla Inane

E Peti Wene Warogo wo'ninafikhe iluk hilingik a'nogo o Yerusalem waluk wagaukwa wene

¹ A'nogo hilingitukwasik, hobuk at Daud en ap tentara Israel mene weim inanini weak mene nek folhigik fisasukwa mene omanogo wesuagaluk wolinafikhemo, inebe 30.000 nen andogosi wagaukwa.

² A'nogo wagaukwama, Peti Wene Warogo wo'ninafikhe iluk hilingik a'nogo waluk wesuogoluk, at Daud en he, it andi mondogat o Baale-Yehuda woginarek lagaikhe. Peti andi enu re Tuhan Omame Mondok Hokho mene, it pogoroba yonggo mene inunggulenu ekhe kerub agarek mene a'nogo amboloba takhta ba hurek werek mene enu igisogo agarek mene a'nogo andoma nen waluk wesugun iluk lagaukwa.

³ Lagaukwasik, Peti a'nogo ap Abinadab awi punuba wuri'mo welagaikhe agun a'nogo nen fisogo were'ma wanhukwasik, kereta lisogo woginarek lagarek mene a'nogo enu hilingik meneba liakfesukwasik, ap Abinadab againafuri Uza inom, Ahio inom, emberegen waluk wagaukwa. A'nogo waluk waga logolik, at Uza ebe Peti andi abel fena horokhogo wagu kwelek,

⁴ at Ahio ebe Peti a'nogo elokhoma attagat waga lagaikhe.

⁵ A'nogo wagunem, at Daud ebe inom, afuni Israel mene mondogat inom, Peti a'nogo elokhoma attagat waga logolik, wuni nineisena Tuhan fogerasuogoluk, yi pinggong ti pinggong gitar hokho mene inom, gitar endep mene inom, inenggi nen watarek mene iwak hangge mene inom, ane lelo'lelogengge watarek mene ebe mage mene inom, piring hangge hokho mene inom, wati logolik wuni inomamerogo warik wagaukwa.

⁶ Wuni a'nogo warik, ap Nakhon gandum enggen folherek oba andoma asi wagaukwa hak he, sapi a'nogo nen kereta lisogo waluk wagunem eisok peikhogo warikhi lagaikhemo re, at Uza nen Peti a'nogo kobokhogo pinogo iluk enggi nen agot fesikhe.

⁷ A'nogo fakfesikheba nen aremnogo sambul at Uza nen hilingitikhe mene andi re Tuhan enu sebelogo fou hakhogo hilingitikhemo re, At Tuhan Allah a'mage Uzaba fesikhesik, at ebe e Peti Wene Warek a'nogo era'lu aremnogo nen ebe pinggi warogo fesikhe.

⁸ A'nogo watikhe andi nen he, o andoma huli andi sambul en yogondak huli nen he enu ”Beret-Uza,” iluk agarek. At Tuhan nen Uza watikhe mene a'nogo faget he, at Daud a'mage lagasikhe.

⁹ At Daud a'mage a'nogo hetperisikhe meneat he, nineisena Tuhan ailo agaikhesik mel yagatikhe: ”Haren wene warogo wo'ninafigin mene Peti hilingik mene yi, an ninggi'nogo waluk lagain? Elo'lek higi,” iluk yagatikhe.

¹⁰ A'nogo hilinglagaikhe andi nen, at Daud ailo agaikhemo re, Peti a'nogo o Yerusalem waluk wesu abiren he, ap Obed-Edom unggulenu Gad mene andi aiba fesikhe.

¹¹ Peti andi andoma werek kwelek enek he tugi henagan fisogo were'ma re, At Tuhan nen ap Obed-Edom a'nogo ebe inom, againafuri at mene eisok erokwe mene inom, fanorinafi lagaikhe.

¹² A'nogo fanorinafunem, afuni nen he, ”Peti Wene warogo Tuhan nen wo'ninafikhe iluk hilingik mene a'nogo, ap Obed-Edom aiba were'ma re, at Obed-Edom againafuri inom fanorinafik, inangge yi mene ti mene inom fanotfigik, ili'lago o,” iluk isukwama at raja Daud esanggo holhikhe. Esanggo holhikhesik lagaikhesik he, Peti a'nogo o Yerusalem waluk waga logolik he, inendawimo inagaiyek hokhorogo hilik-hilik waluk wagaukwa.

¹³ A'nogo waluk waga logolik, it ap Peti a'nogo waluk, horogat ineisok 6 oba fei wagunem, at Daud en he, ”Hinebe andem kamo ini o,” iluk yagaisasikhesik kamo ugunem, aren Tuhan faget wam sapi ai mene ekhe inom, nen sapi eak otholik mene ekhe inom warogo noletikhe.

¹⁴ A'nogo noletikhesik wagaikhesik he, at Daud su linen horok mene obakhe hele pukhogo homakfesikhesik, wuni eisena Tuhan fogararik agaiyekhogo warik wagaikhe.

¹⁵ At Daud ebe inom, afuni Israel mene mondogat inom, nineisena Tuhan nen Peti Wene Warogo wo'ninafikhe iluk hilingik mene a'nogo waluk o Yerusalem waga logolik, inane a'mit suphogo wuni watik, pinggong ineleage futhugunem ane hokho ikherek mene anethigik, ilik wagaukwa.

¹⁶ A'nogo waga lagaukwasik, peti a'nogo waluk kota kwi wagunem he, at he Mikhal ebe kwe jendela ambe palekwe nen eilenggen wulakha wagaikhe hak he, at kain Daud eisena Tuhan fogerarik waga logolik wuni figil-fogoil hilik, lagik, wagik, warik wagunem he Mikhal a'nogo nen he Daud eilenggen asik-sikhogo yethasikhe.

¹⁷ A'nogo hilingirik wagaikhesik he, Peti Wene Warogo Allah nen wo'ninafikhe, iluk hilingik a'nogo obuluk at Daud en o su mene wutikheba andoma fesukwa. A'nogo fesukwasik, at Daud en wam nineisena Tuhan faget warogo noletik, Allah ninom lambulho, iluk warogo noletik, isikhe.

¹⁸ A'nogo noletikhesik aren, nineisena Tuhan Omame Mondok Hokho mene a'nogo enuba afuni Israel mene mondogat fanot fisasikhe.

¹⁹ A'nogo hilingitikhesik, afuni andoma welagaukwa mene inebe mondogat ap lek hemi lek inebe lombok wam kurik endu enggen oba werago mene inom, sumburu roti mene abirengge ekhe inom, kue anggur enggen mene inom, misi'mo sebethigik wogisilik lagaikhe. A'nogo sumburogo wogisasikhemo inailokwe lombok helaluk lagaukwa.

²⁰ A'nogo lagaukwama, at Daud againafuri hai warinabigiluk aiba istana lageluk lagunemen he, at he Mikhal wulibi wagaikhe hak emberek ambi agaukwasik mel yagatikhe: ”O yogondak yire, ibi-eberogo nen afuni Israel mene inoe raja it afuni nen agaukhogo fogetnabuageluk hilingite andi ri! Afuni kembu mene nen inenggali lek inasu nonggologo lakfisaluk hilingitarek hak, at raja kursng bsrik mene agoromi at aiba onggwarek ebe werek oba halharek mene inamingmingengge helime mene omanogo ineilhanem asu nonggologo lakfisikhesik enggali lek hilingirik waga andi ri!” iluk lagokhogo wenagetikhe.

²¹ A'nogo yagatikhemo, at Daud en he, ”An nen hilingiti andi re At Tuhan hat heisena inom, at eisok erokwe mene inom, kofologo lakfisikhesik an wenagaisogo afuni Israel mene melalinafi logouwageluk men-nobagaikhe mene a'nogo legeisogo fikhi logolik hilingiti o. Arigini'mo re, an he neisena Tuhan faget fogerati logolik, wuni lagik-wagik watu mondok logogin o.

²² Nen haren tak hendawimo seramet fanhen andi endebat hangge meneat he, hobuk hokhorogoat inendawimo seramet nobagagun halok mene ogore nendawimo nen fano nek anggagain o. Haren he, at elo'lek, iluk hendawimo seramet fanhen andi higirat meneat he, it namingmingengge mene egen andi nen an agaukhogo hilingnafi logogun aro,” iluk yagatikhe.

²³ Nen he Mikhal hun Saul a'logo andi re at eluk welagaikhe huli andoma re omalik ekhe taginafi'lek mondok welagaikhe.