2 SAMUEL 5 - Allah Wene Fano Wene Hupla Inane

Daud afuni Israel mene inom Yehuda mene inom inoe raja logouwagaluk menfesukwa wene

¹ A'nogo hilingi'luk, afuni inunggulenu Israel mene inogogwi mondogat Daud ebe o Hebron were'ma oba wagaukwasik he, mel yagatukwa: ”Helurogo, nit yoma re hat ninom ninamep minggilik mene welago o.

² Nen, o attak he, at Saul ebe nit ninoe raja logolik, fetninarek werek kwelek, hat ogore, ap tentara Israel mene weim yabuogoluk ugunem, haren woginarek weim yabi laga lagagin anggigi. Nen, nineisena Tuhan nen ogore, wene mel wathetikhe anggigi: Hat hebe an nagainafuri inoe raja asimbik ferinarek logoino o, iluk wene wathetikheat anggigi,” iluk yagatukwa.

³ A'nogo yagatukwama, at Daud en he, afuni Israel mene inogogwi omanogo inom wene wat-wat isukwasik, iren at Daud it afuni Israel mene inoe raja logouwagaluk, menfesukwa.

⁴ At Daud ebe umur 30 tahun oba afuni Israel mene inoe raja agaikhesik, ferinarek 40 tahun welagaikhe.

⁵ Nen, at o Hebron logolik afuni Yehuda mene ferinarek 7 setengah tahun welagaikhe. Hobuk, at ebe Yerusalem wagaikhesik logolik, afuni Israel mene inom, Yehuda mene inom, ferinarek 33 tahun welagaikheat.

⁶ A'nogo logolik inenggi ekhe sambul he, at Daud agoromi tentara inom afuni o Yerusalem mene inoasuogoluk wagaukwa. Wagaukwama, it afuni Yebus mene o kota andoma welagaukwa mene inendawimo nen he, ”At Daud en nit afuni Yerusalem mene higit mabenet ninobagambik ninoasigin lek,” iluk inendawimo anggasukwa andi nen he mel isukwa: ”Ap ineilenggen mum mene inom, ineisok wut warek mene inomen, hat elok mukheogoin andi nen he, o yoma kwi wesigin lego,” iluk Daud yagatukwa.

^7-9 A'nogo yagatukwama, aren agoromi tentara inoba yi'nogo yagaisasikhe: ”An nen afuni Yebus mene nabit isigirek andi hak, hit yoma mene it inoba hinabit isikhi lagep mene ekhe welageba? Eberogoat mondok hinabiren it inebe mondok inoasugun iluk welagep halok he, hinebe i anggwe hilingik kwe nen kwimbik he, ap ineilenggen puk mene inom, ineisok wut warek mene inom, an nen napsiri isigirek mene andoma inebe mondogat inoa'no nego,” iluk yagaisasikhe. (A'nogo yagaisasikhe andi nen afuni nen ikhi logolik he, ”Afuni ineilenggen puk mene inom, ineisok wut warek mene inom, nineisena Tuhan awi wuri'mo kugun mondok lego,” iluk agarek andi.) At Daud o Sion leget pa'leget wurik mene sebeli kwisikhesik ebe welagaikhe. Logolik, o andi enu O Daud were'ma, iluk salhikhe. O kota andi leget pa'leget wurik andi era'lukwe yiling-waling huli punu kweang fetakhogo waluk lagasukwaba abel mo lagai wagarek higit andoma nen pikhit mondok wutikhe.

¹⁰ Nen at Daud eisena Tuhan Allah Omame Mondok Hokho mene a'nogo nen elok lebethikhi lagaikhe andiba re, omame ekhe inomat hokho arik laga lagaikhe.

¹¹ A'nogo agu kwelek, ap kain raja Hiram en, o Daud aiba istana wusugun mene faget, at Hiram agoromi kaindek mene Daud oba lakfisa waga logolik he, e wombi hangge enu cemara o Libanon mene inom, ap tukang o ebe wusugun mene inom, helep wutu inelu mene inom, lakfisa wagaikhemo wagaukwa.

¹² A'nogo lakfisa wagaikhe andi nen, at Daud endawimo nen he, ”Neisena Tuhan nen, an nen At againafuri Israel mene inoe raja logouwagaluk eberogoat mennobagaikhesik, an nen ferinarek were'ma nomamet fikhi logogin higi,” iluk futfesikhe.

¹³ At Daud ebe o Hebron nen o Yerusalem wagaikhesik he, agagwi inebe miren mene hakhogo ekhe woginafi logolik, agagwi amingmingengge mene ekhe woginafikheat. A'nogo woginafikhemo, againafuri alage mene inom, helime mene inom, inebe hokhorogoat hilinglagaukwa.

¹⁴ At ebe o Yerusalem logolik, againafuri ap taginafikhe mene inenu re: Syamua inom, Sobab inom, Natan inom, Salomo inom,

¹⁵ Yibhar inom, Elisua inom, Nefeg inom, Yafia inom,

¹⁶ Elisama inom, Eliyada inom, Elifelet inom, andem taginafikhe.

At Daud en afuni Filistin mene mabenet fisasikhesik, omame agaikhe wene

¹⁷ Afuni ekhe nen he, ”Afuni Israel mene nen, Daud ebe it inoe raja logouwageluk menfaga,” iluk isukwama ap Filistin mene inesa-nggo holhukwasik he, Daud ebe fakfouwogoluk wagaukwama, at Daud esanggo holhikhesik he, ebe leget pa'leget wuri'mo omanogo lagaikhe.

¹⁸ Lagaikhesik werek kwelek, ap Filistin mene omanogo o Refaim tonggoma andoma asi wagaukwasik welagaukwa.

¹⁹ Werek kwelek, at Daud en eisena Tuhan oba mel yagatikhe: ”An nen ap Filistin mene andi inoasi lagain anggegen a? Haren he, an nen it inoasuagaluk nenggiba fagain a? Lega,” iluk heinok wokhasikhemo, Aren he, ”Inoasi lan o. An nen it inebe henggiba fagain o,” iluk yagatikhe.

²⁰ A'nogo yagatikhemo, at Daud o Baal-Perasim lagaikhesik, ap Filistin mene omanogo mabenet fisasikhesik inoa'luk wagaikhesik he, Tuhan mel yagatikhe: ”Haren an naselei mene, i yagarek mene houwakhogo laga logolik, yi mene ti mene waluk lagarek andi hak, iren fangeti'lek mondogat sagatfisegen andi o. neisena,” iluk yagatikhe. A'nogo yagatikhe andi nen, o andoma enu Baal-Perasim salhikhe.

²¹ A'nogo sagatfisasikhemo, it ap Filistin mene omanogo inandugwi kembu wanu elo'lek agaikhemo re, at Daud agoromi tentara mene omanogo inomen helasukwa.

²² A'nogo hilingitukwasik, inenggi welagi'legat, it ap Filistin mene omanogo hobuk o Refaim tonggoma andoma wagaukwasik welagaukwaat.

²³ A'nogo werek kwelek, at Daud eisena Tuhan nen, ”Yi'nogo hilingi'no,” iluk yagasuageluk heinok wokhasikhemo, At Tuhan nen he, ”Hat hebe yikwe nen inoasi lagun o. We, hebe inambotkwe higit kwanirogo lambik, e malibet hangge mene eroma andoma horokhogo lambik kwe andi kwe nen inoasi kwino o.

²⁴ Andoma lagunemen inoasigiluk ugunem, e andoma erembul oba nen ap tentara esa logalogo lagunem ineisok ane ikherek hak ugunem ane hesanggo holhen halok he, An nen ap tentara Filistin mene inoasigiluk An Nebe hat helokhoma An tak lagain andi nen he, hinebe weak-weak it inoba wulibino o,” iluk yagatikhe.

²⁵ A'nogo yagatikhemo, at Daud en Allah nen yagatikhe higithogo hilingiti logolik, it ap Filistin mene omanogo o Geba nen inoarik-inoarik, huli o Gezer huli fisa lagaikhe.