2 SAMUEL 24 - Allah Wene Fano Wene Hupla Inane

Daud en afuni inenu palogo wenatikhe wene

¹ Tuhan nen it afuni Israel mene inoba a'mage lagakhi lagaikhesik, it inunggulenu andi mene inoba enggin mene lakfei wesigiluk at Daud a'nogo konogo hakhogo hilingitikhesik, At Tuhan nen wene at Daud oba yagati logolik he, ”It afuni Israel mene were'ma inom, Yehuda mene were'ma inom, inenu lisu palogo wenaginabin o,” iluk yagatikhe.

² A'nogo yagatikhemo at Daud en Yoab tentara inoe lego mene panglima a'nogoba yagati logolik, ”It afuni Israel mene inebe miren hakhogo werek iluk nelu asuak hogore, it hagoromi tentara inogogwi lego mene perwira omanogo hinom he, o it afuni Israel mene werekwe omanogo mondogat lambik ap inenu lisu pali lani o,” iluk yagatikhe.

³ A'nogo yagatikheba nen he at Yoab en raja a'nogoba ikhi logolik he, ”Hat heisena Tuhan Allah andi nenat it afuni Israel mene inebe yogondak lambulogo werek mene andem he we endep hak werek kwelek, ekhe seratus nen hakhogo oba loukhogoat hilinghobagakhi logouwak, nen noe hebe heluk ekhe inomat logolik heilenggen isagainat logou hak. Oba nen he hun hokho haren inenu lisu pali lani iluk yaganisikhi lagen yi re ninggi'nogo mene faget nogo?” iluk yagatikhe.

⁴ Oba nen he at raja a'nogo re aren hilingisigiluk wene lenggalogo wulafikhe mene a'nogo faget enek hilingiti lagaikhe mo re, at Yoab inom, it perwira fena omanogo inom he, it afuni Israel mene wenaginabugun iluk lagaukwa.

⁵ Lagaukwasik he, it inebe i Yordan palogo wulibi lagaukwasik, at Yoab a'nogo agoromi inom he it Gad mene inawi wilayah meneba tonggoma tulem heire'ma andoma o kota misik ekhe enu Aroer andi abel a'makwe selatan fikhit andoma inawi tenda sali lagaukwa. Andoma nen hiling-hiling he abel utara fikhit o enu Yaezer andoma lagaukwasik,

⁶ andoma nen o Gilead kwi lagaukwasik he, o Kades it afuni Het mene inawi wilayah fikhit andoma lagaukwa. Andi nen it a'nogo o Dan fikhit lagaukwasik he andoma nen haningisogo re o Sidon mo ubuk ikherek fikhit andoma asi lagaukwa.

⁷ Andoma nen it inebe mo liabi wagarek fikhiren he pelabek o Tirus kota leget pa'leget mondok omamerogo wagane'ma andoma fikhit lagaukwa. Andoma nen he it o kota afuni Hewi mene inawilokwe inom, it Kanaan mene inawilokwe inom ya kwigik ta kwigik laga lagaukwasik wurep kobokhogo re o Yehuda abel a'makwe selatan fikhit andoma nen o Bersyeba fikhit andoma lagaukwa.

⁸ It o yi awi ti awi omanogo wulibu ku hilingirik nugu kwelek he tugi sogo nen inukhogo re inenggi linggene sirek fenaba hilingitukwa. Mondogat a'nogo hilingitukwasik he it a'nogo o Yerusalem hun raja were'ma yagasugun iluk palhukwa mene omanogo

⁹ waluk wagaukwa. Palhukwa mene omanogo it ap mene nek inebe tentara ku higit mene nek it Israel mene wenagaisogo re 800.000 nen wenaginafukwa. Nen it Yehuda inap mene re 500.000 nen wenaginafukwa.

¹⁰ Oba nen he at Daud en afuni a'nogo mondogat wenaginafikhesigen he, ”An weak hilingiti o,” iluk anggasikhesik he, aren Tuhan oba ikhi logolik he, ”Eige, neisena Tuhan, an mondogat weak hilingiti o! An nen hilingiti mene andi re mondok kemburogo hilingitimo re, an naweak hilingiti mene andi honggorabethogo nobagain o, neisena,” iluk yagatikhe.

^11-12 A'nogo yagatikhemo, At Tuhan nen hun Gad Tuhan hilingi'luk Daud hilingi'luk tulem wene waluk lagu mene faget welagaikhe agun a'nogo oba ikhi logolik he, ”Hat Daud ambit lambik he, Tuhan nen yi'nogo ikhe iluk yagasi lan, An nen he ero henagan mene menfigi andi, enggere aren ki mene helagain halok andi re An nen higithogo hilingisogo fagain ikhe ino,” iluk yagatikhe. Yagatikhemo re ohealekwe re at Daud a'nogo nogoli'lagoba nen eluk agaikhesik hilingitunemen he,

¹³ at Gad a'nogo wagaikhesik he Tuhan nen wene melalek yi'nogo ino-ti'nogo ino iluk isikhe mene a'nogo yagasigin iluk wagaikhesik oba yagati logolik he, ”Tuhan nen he yi'nogo ikhe: O yoma mondogat tahun henagan inukhogo sumburu ouwak lagaumo logogin andi hamolo a, athe hun hokho hebe ap selei mene nen tugi henagan hambukhogo logolik sikharek-mukharek nikhi logogun andi hamolo a, athe o yomaba mondogat ou mondok amben weak mene linggene henagan inukhogo sagarek logogin mene andi hamolo a? Neisena haren he ki mene wenakhagain? Iluk ikhe, hilingi'mo re we yogondak yaat haren katokhogo umore an nen Tuhan yagasi lagain o,” iluk yagatikhe.

¹⁴ A'nogo yagatikhemo at Daud en onggo ikhi logolik he, ”Eige! An a'nogo re alomat lagi o! Oba nen he At Tuhan andi re endawi hundik hilinginafu aple andi re mondok hokho hilingi'mo afuni nen unggum noba fogoin andi re elo'lek hilingi'mo we nit ninebe mondogat At Tuhan nen unggum ninoba fagain andiat fano o,” iluk yagatikhe.

¹⁵ A'nogo isikhemo at Tuhan nen ou amben weak mene afuni Israel mene inoba lakfei wagaikhemo re, linggene a'nogo sambul hubet eroratikhesik werek kwelek enek he linggene enfesikhe mene a'nogoba huli higit asi lagaikhe. It afuni Israel mene were'ma andoma afuni inebe re 70.000 nen mene wa'lagaukwa.

¹⁶ At pogoroba yonggo mene nen wa'lagu mene waluk wagaikhe mene a'nogo hun Arauna o Yebus agun a'nogo nen gandum enggen lolhuba aremnogo asi lagaikhesik were'ma, At Tuhan eilenggen hasikhe re malaikat pogoroba yonggo nikherek mene a'nogo nen he o Yerusalem a'nogo mondogat wolelenggenhogo feigiluk ugunem hasikhesik, At Tuhan nen, a'nogo inoasi lan, iluk wene katokhogo isikhe mene a'nogo hebekhogo re it afuni inunggulenu a'nogo mene unggum inoba feigiluk isikhe mene a'nogo herakfisasikhe. A'nogo herakfisasikhesik, Aren malaikat oba ikhi logolik he, ”Arat hilingiten! Palfein o!” iluk yagatikhe.

¹⁷ At Daud en he malaikat afuni inoasigiluk wagaikhe mene a'nogo eilenggen hasikhesik Tuhan oba yagati logolik he, ”Weak andi re an nenat kwanirogo hilingitimo re anat weak hilingiti o. Oba nen he afuni inunggulenu yi inap, inonggwaregen yi'nogo ti'nogo mel hilingisu mondok elo'lek mene yi nen he ninggi'nogo mene weak hilingitama? An inom, an neisok erokwe mene inom enek unggum ninoba fein o!” iluk yagatikhe.

¹⁸ Linggene a'nogo sambulat, at Gad a'nogo Daud oba wagaikhesik yagati logolik he, ”Neisena hat hebe re at Arauna nen gandum enggen lolherek oba aremnogo lagai lambik he, Tuhan obaget helep amboloba noletuba enu mezbah a'nogo mene ekhe wusi lan o,” iluk yagatikhe.

¹⁹ A'nogo yagatikhemo re at Daud a'nogo Tuhan nen wene melalek at Gad ebene nen yagatikhe mene aremnogo higithogo hilingi'luk he lagasikhe.

²⁰ At a'nogo lagagunem a'nogo re, at Arauna a'nogo eil filik-filik pelakhasikhe re at raja a'nogo agoromi eiso'marogo lagagunem pelagisasikhesik, at Arauna a'nogo eindep awi yagaisogo at Daud heinok wokhikhi logolik,

²¹ ”Neisena hat he ninggi'nogoluk wagen?” iluk heinok wokhasikhe. A'nogo heinok wokhasikhemo re at Daud en ikhi logolik, ”Ou amben weak mene nen ap warogo fit ikhe mene ari legasuageluk he, an nen Tuhan obaget mezbah helep wurogo warogo noligin nen iluk he, kweang gandum enggen lolhi lagen oba ari onggo palisouwogen iluk wagi o, ”iluk yagatikhe.

²² Andi isikhemo at Arauna nen ikhi logolik he, ”Neisena hat hendawimo hilingisigin anggegen mene andi higit asuakhogo re wanimbik Tuhan obaget wogom o. Nen wam sapi ebe warogo nolesigin mene re yoma, nen e nolhu mene faget he hun hokho hangge kweang meisalik lili'lago mene andi e enggi hilingik mene andoma inom, e kagalek talek mene andoma inom wanigin o,” iluk yagatikhe.

²³ At Arauna nen he mondogat omanogo raja ba wogetikhesik ane ikhi logolik he, ”We hat heisena Tuhan Allah nen he, haren wogeten engge andoma wanuago,” iluk isikhe.

²⁴ A'nogo isikheba nen he at raja nen ikhi logolik he, ”A'nogo re lego! An he onggo paligin namolo. An nen onggo palhi'legengge nen neisena Tuhan Allahba we onggolek wanigin andi re nabiro,” iluk yagatikhe. Andi isikhesik at Daud en he gandum enggen lolhuba a'nogo inom sapi omanogo inom he uang perak mene 50 nen oba onggo palhikhe.

²⁵ A'nogo onggo palhikhesik he at Daud en he Tuhan obaget warogo nolhu mene iluk inom, Allah ninom sebesugun iluk mene inom, warogo nolhikhemo At Tuhan nen Daud samban isikhe mene a'nogo esanggo holhikhesik he, ou amben weagen ap warek enek hilinglaga lagaikhe mene a'nogo re it afuni Israel mene inoba nen palagaikhe.